1 Iehova ese Samuel e hereva henia, eto, Lalomu baine hisihisi Saulo dainai ela bona edena negai? Lau ese ia na Israel pavapavana dagina ai vada na dadaraia. Emu doa na dehoro amo ba hahonua, bena baola. Lau na Iese, tau Betelehem, dekena baina siaimu lao, badina be natuna mamaruanedia bogaragidia amo pavapava ta vada na abia hidi. 2 Samuel eto, Ede bainala toma? Saulo bema kamonai, ia ese bema alagu mase. Iehova ma eto, Boromakau hahinena matamatana ta ba laohaia, baoto “Lau na Iehova ibouna totona vada nama”. 3 Iese danu ba boiria, emu boubou karana ai baine vareai; bena baina hadibamu ede ba kara toma. Emu ai ladana baina hatoa tauna na ba horoa egu.

4 Bena Samuel ese Iehova ena haheḡani heḡereḡerena e karaia, Betelehem ela. Hanua tau-badadia na e raka lasi, ia ida e hedavari, mai kudou-hetahadiaida, eto, Mai mainomu ida vada oma eiava? 5 Ia eto, Mai mainogu ida vada nama, Iehova baina boua totona. Sibomui ba hahelaḡa, lau ida boubou karana baita karaia. Bena ia ese Iese mai natuna mamaruanedia ida e hahelaḡadia, bena e boiridia, boubou gabuna baela.

6 Idia ema negana ai, ia ese Eliab e raraia tao, bena lalona e hadaia, eto, Momokani, Iehova ese baine horoa tauna binai, ia vairanai e ginimu. 7 A Iehova ese Samuel e hamaoroa, eto, Oromana eiava ena lata basio laloa, badina be lau ese vada na dadaraia. Badina be Iehova ese ḡau se itamu taunimanima ese e itadiamu heḡereḡerena; taunimanima ese oromana e itaiamu, a Iehova ese lalona e itaiamu.

8 Bena Iese ese Abinadab e boiria, e hagania, Samuel vairanai baine raka hanai. A ia eto, Ina tau danu Iehova ese se abia hidi. 9 Bena Iese ese Sama e haḡania, baine raka hanai. A ia eto, Ina tau danu Iehova ese se abia hidi. 10 Iese ese natuna mamaruanedia hahitu e haḡanidia, Samuel vairanai bae raka hanai. A Samuel ese Iese e hamaoroa, eto, Ini na Iehova ese se abidia hidi.

11 Samuel ese Iese e nanadaia, eto, Natumu mamaruanedia iboudiai bini, eiava? Ia na e haere, eto, Tau muritai na dounu noho; ia ese mamoe e reḡudiamu. Samuel ese Iese e hamaoroa, eto, Hereva a siaia, bainema; badina be ita na basita helai diho ela bona ia baine kau. 12 Hereva e siaia, bena haida ese e hakaua mai. Ia vairana na tonika-tonika, matana na mai hairaina, bona mero raho-namona. Iehova eto, A tore isi, a horoa. tauna benai. 13 Bena Samuel ese doa mai dehorona e abia, kakana bogaragidiai e horoa. Bena Iehova ena Lauma ese David e rohea badabada, una dina amo. Bena Samuel e tore isi, Rama ela.

14 Iehova ena Lauma ese Saulo e rakatania, lauma dikana ta Iehova ena amo ese e hahisia. 15 Bena Saulo ena hesiai taudia ese e hamaoroa, eto, Madi, lauma dikana ta Dirava ena amo ese e hahisimumu. 16 Harihari emai lohiabada ese emu hesiai taumai vairamu ai gigini boma haḡanimai, gitara ihataina dibana herea tauna ta baiama ha tahua; bena hari lauma dikana Dirava ena amo emu ai baine kau negadia ai, ia ese gitara baine hataia, bena lalomu do baine namo. 17 Taunabunai, Saulo ese ena hesiai taudia e haḡanidia, eto, Tau ta bavabia, gitara ihataina dibana herea tauna ta, bena dekegu ai ba hakaua mai. 18 Eregabe tauna ta e haere, eto, Lau na Iese, tau Betelehem, natuna ta vada na itaia, ia na gitara ihataina dibana herea; ia danu goada tauna bona tuari tauna; ena hereva be nanamo bona ita-itana danu namo; Iehova na ia ida.

19 Taunabunai, Saulo ese gwaukau taudia na e siaidia lao Iese dekenai, eto, Natumu David, mamoe ireḡudia merona, na ba siaia mai dekegu ai. 20 Bena Iese ese flaoa, bona vine ranuna kopi ta, bona nani natuna ta, e abidia, doniki ta doruna ai e ato, natuna David imana amo e siaidia, Saulo dekenai.

21 David na Saulo dekenai e kau, bena ena hesiai tauna ai ela. Saulo ese e lalokau henia bada, ena kesi ihuana tauna ai e halaoa. 22 Bena Saulo ese hereva e siaia Iese enai, eto, David na lau isiaigu ilao-henina ai baine noho, badina be lau ese na lalo namo heniamu. 23 Bena lauma dikana Dirava ena amo Saulo enai e kau negadia ai, David ese gitara e abia, imana amo e hataia; bena Saulo lalona vada e matamata bona vada e namo, bona lauma dikana ese e rakatania.