1 Varavaramai e, orena binai: Lohiabada Iesu ladana ai a noimuimu, bona a haḡanimuimu, emui raka dalana bona Dirava ihamoalena dalana, emai ai o abia, ba goadalaia. 2 Badina be haheḡani, Lohiabada Iesu ena amo a abi a henimui, na dibamui. 3 Badina be Dirava ena ura binai: ba helaḡa, mata-bodaga kaladia basio kara; 4 bona iboumui ai ba diba, ta ta adavamui bavabidia mai helaḡamui bona mai hematauraimui ida, 5 dia mata-dika ena ura bodagadia daidiai basio abidia, Dirava asi dibadia besedia na heheto. 6 Bona ta ese varavarana basine koia bona basine hurea hanai; badina be ini kara iboudiai davadia ihenina tauna na Lohiabada, ai ese a hamaoromui gunava bona vada a gwauraia hedinaraiva heḡereḡerena. 7 Badina be Dirava ese vada e boirida, dia mata-dika enai, to helaḡa enai. 8 Taunabunai, e dadaraiamu tauna ese dia taunimanima se dadaraidiamu, a ena Lauma Helaḡa e henimuimu Diravana e dadaraiamu.

9 Varavara iura-henidia herevadia na basina tore henimui, badina be Dirava ese vada e hadibamui umui ta ta ba heura heheni. 10 Momokani, umui ese varavara iboudiai Makedonia ai o lalokau henidiamu; to, varavaramai e, a noimuimu, una kara ba habadaia. 11 Mai manaumui ida ba noho, sibomui emui ḡaukara ba kara, imamui amo ba ḡaukara, a haḡanimuiva heḡereḡerena. 12 Unu amo murimuri taudia vairadiai ba raka bena idia ese bae matauraimui, bona ḡau ta ai basio dabu.

13 Varavaramai e, a uramu umui na basio daradara mase taudia daidiai; bona daramui basie doko, asi edia helaro taudia na heheto. 14 Ta abia daemu herevana binai: Iesu e mase, ma e tore isi lou. Benaini, Iesu enai e masemu taudia na Dirava ese ia ida baine hakaudia vareai mauri ai. 15 Badina be Lohiabada ena hereva a henimuimu, a tomu, Lohiabada ena mai dinana ai tanobada ai ta nohomu tauda ese mase taudia basita laidia oho. 16 Badina be Lohiabada na guba amo mai lolona ida baine diho; bona aneru badana danu mai gadona ida bona mai kibi be Dirava ena. Bena Iesu enai e mase taudia na hae tore isi guna; 17 gabeamo, doini tanobada ai ta maurimmu tauda baine abida isi, ori latadiai Lohiabada ida baita hedavari, guba padanai. Bena Lohiabada ida baita noho hebou hanaihanai. 18 Benaini, ini hereva daidiai ba hahegoada heheni.