1 Lalogu na hadaia nato basina vasi lou, lalo-hisihisi baine vara na garina. 2 Badina be lau ese bama hahisimui, daika ese bema hamoalegu? Umui, na hahisimuimu taumui mo. 3 Bena egu revareva ta na torea, baina vasi negana ai ihamoalegu taudia ese bae hahisigu na garina. Na abidadama henimuimu, lauegu moale ai umui danu ba moale.

4 Badina be na tore henimui negana ai na lalogu e hisihisiva bona e metauva; mai taigu ida na tore henimui, dia ihahisimui totona, to egu uraheni badana emui ai ba diba totona. 5 A hisihisi e havaraia tauna ese dia lau mo se hahisigu, a umui danu taina (herevana basina ha-aukaia) e hahisimui. 6 Una tau ena dika davana umui hutuma ese vada o gwauraia vada e heḡereḡere; 7 harihari ena dika ba gwau tao bona tauna ba haloa, dara-doko ese baine gugubaia mase na garina. 8 Taunabunai na noimuimu, emui iura-henina lalonai bavabia lou. 9 Una dainai na tore henimui: toamui baina diba, hereva iboudiai o badina eiava lasi. 10 Umui ese tau ta ena dika ba gwau tao, lau danu ena dika baina gwau tao. Badina be tau ta ena dika bama gwau tao una na umui daimui ai bona Keriso vairanai bama gwau tao, 11 Satana ese bema hadarereda garina; badina be iena dibaka karadia na dibada.

12 Lau be Troa nala, Keriso ena sivalai namo iharorolaina, bena Lohiabada ese iduara ta e kehoa egu; 13 to asina noho namonamova, badina be tadigu Tito asina davaria. Taunabunai na hatonidia, Makedonia nala. 14 A Dirava aita hanamoa, ia ese Keriso ena kwalimu ai nega idoinai e hakaumaimu, bona ia sivaraina bonana namona na gabu iboudiai ai emai amo e hahedinaraiamu. 15 Badina be, ai na Keriso bonana namona Dirava vairanai, e hamauridiamu taudia ediai bona bae mase taudia ediai; 16 ini idia ediai mase bonana, mase ihavarana, a unu idia ediai mauri bonana, mauri ihavarana.

Ini ḡaukara ai daika baine heḡereḡere? 17 Ḡau tamona, ai na dia haida na heheto, Dirava ena hereva asia hoihoilaiamu, to mai momokanimai ida Dirava ese Keriso lalonai e henimaimu heḡereḡerena Dirava vairanai a herevamu.