1 Peroveta oreana tauna ta vabuna ese Elisaia e tai henia, eto, Emu hesiai tauna, lau adavagu, na vada e mase. Oi dibamu emu hesiai tauna na Iehova garina e gariva, to enai e abi torehai tauna na vada ema, natugu raruosi baine abidia oho, ena hesiai memerodia ai baine halaodia e tomamu. 2 Elisaia ese e hamaoroa, eto, Ede baina karamu toma? A hamaorogu, emu ruma ai na dahaka ḡau mia? Hahine na eto, Emu hesiai hahinena na asi ena ḡau ta ruma ai mia, dehoro kavabu tamona mo. 3 Bena Elisaia eto, A raka lasi, bamomu dekediai kavabu haida do a ha-abi, kavabu asi anidia taina momo. 4 Bena ba raka vareai, iduara ba koua, natumu raruosi danu oi ida ruma lalonai ba hekou ahu. Bena dehoro na kavabu iboudiai lalodiai ba vedadia; ta baine honu, bavatoa siri.

5 Taunabunai, hahine ese ia e rakatania, mai natuna raruosi ida e raka vareai, iduara e koua; bena dehoro e seia negana ai, idia ese kavabu na ia dekena e mailaidia. 6 Kavabu iboudiai e honu, bena ia ese natuna ta e hamaoroa, eto, Kavabu ta ma a mailaia. Hari mero ese e hamaoroa, eto, Ta dia mia. Bena dehoro ena aru e doko. 7 Hahine na ela, Dirava ena tau e hamaoroa; bena ia eto, Aola, dehoro ba hoia, emu abi-torehai davadia ba heni; orena na oi bona natumu raruosi emui mauri ḡauna.

8 Dina ta Elisaia na Suneme ela. Taḡa hahinena ta unuseni ai e nohova, bena ia ese Elisaia e ura henia bada, baine aniani. Taunabunai, una dala amo e laova negadia iboudiai ia na unuseni ai e dae kau, baine aniani totona. 9 Bena una hahine ese adavana e hamaoroa, eto, A itaia, lau vada name diba ina eda gabu e rakaia hanai louloumu tauna na Dirava ena tau helaḡana ta. 10 Mani emu kara, atai ai daiutu maraḡina ta baita karaia, unuseni ai mahuta ḡauna bona pata bona helai ḡauna bona lamepa baita atodia iena; bena dekedai bainema negadia ai ia na unuseni ai baine dae kau.

11 Dina ta ia na unuseni ai e kau, bena una daiutu ai e dae kau, 12 laḡana e ania. Bena ia ese ena hesiai tauna Gehasi e hamaoroa, eto, Hari hane Suneme a boiria. E boiria, bena ia vairanai e gini. 13 Bena ia ese Gehasi e hamaoroa, eto, A hereva henia, aogwa “O itaiamu, ina idoinai vada o hekwarahilaia ai daimai ai; dahaka baia kara henimu? Oi daimu ai hanua pavapavana eiava tuari oreana biaguna baia hereva henia a?” Hahine e haere, eto, Lau na varavaragu bogaragidiai na nohomu. 14 Elisaia ma eto, Vada dahaka baita kara henia? Gehasi na e haere, eto, O, ia na asi natuna merona ta, bona adavana na vada e buruka. 15 Elisaia eto, A boiria. E boiria; bena hahine na iduara ai e gini. 16 Elisaia eto, Laḡani vairai, nega inihetomana ai, natumu merona ta ba rosia. Hahine eto, Egu lohia, Dirava ena tau e, lasi; emu hesiai hahinena basio koia. 17 A hahine na e rogorogo, bena tubu-kau negana sisivana ai mero ta e abia, Elisaia ese e hamaoroa negana heḡereḡerena ai.

18 Mero na e bada oho bada oho, bena dina ta ia na e raka lasi, tamana dekena ela, uit iutuna taudia bogaragidiai. 19 Bena ia ese tamana e tai henia, eto, Kwaragu o, kwaragu o. Bena tamana ese ena hesiai tauna e hamaoroa, eto, A rosia, sinana dekena a laohaia. 20 E abia isi, sinana dekena e laohaia; bena mero na sinana mamuna ai e helai ela bona dina tubua, bena e mase. 21 Bena hahine ese e daelaia, Dirava ena tau ena mahuta ḡauna ai e kurea kau, bena iduara e koua. Bena e diho. 22 Bena ia ese adavana e boi henia, eto, Hesiai tauna ta dekegu a siaia, bona doniki ta danu; lau na Dirava ena tau dekena baina lao haraḡa, bena ma baina lou mai. 23 Adavana eto, Dahaka dainai hari dina ai ba lao henia? Ina na dia hua matamata dinana eiava dia dina helaḡana. Hahine eto, Vada baine namo. 24 Bena ia ese doniki e haheḡaeḡaea, bona ena hesiai tauna e hamaoroa, eto, Ba haḡavaia, ena raka basio hametaua ela bona lau ese baina hamaoromu dahaka. 25 Taunabunai ia na ela, bona Dirava ena tau enai e kau, Karamele ororona ai.

Dirava ena tau ese maina ai e itaia negana ai, ia ese ena hesiai tauna Gehasi e hamaoroa, eto, A itaia, Suneme hahinena bunai; 26 a heau lao haraḡa, ia ida ba hedavari, baoto “Oi namo a? Adavamu bona natumu danu nanamo a?” Hahine na e haere, eto, Nanamo. 27 Ororo ai e kau, Dirava ena tau dekenai, bena ia ese aena e abi tao. Gehasi ema, baine doria oho eto; a Dirava ena tau eto, Aine noho, badina be darana e dokomu. Iehova ese e hunia egu ai; se hamaorogu. 28 Bena hahine eto, Lau ese egu lohia emu ai natugu na noia a? Lau nato “Basio koigu” ani?

29 Elisaia ese Gehasi e hamaoroa, eto, Emu rami ba hekasilaia, egu itotohi na imamu ai bavabia, baola. Ta ida boma hedavari, Basio hahenamo henia; bona ta ese bema hahenamo henimu, basio haere henia. Bena egu itotohi na mero vairana latanai ba dagaia diho.

30 Bena mero sinana eto, Iehova e maurimu bona oi o maurimu heḡereḡerena, lau na oi basina rakatanimu. Taunabunai, ia na e tore isi, hahine murina amo e raka. 31 Gehasi na e raka guna, itotohi na mero vairana latanai e dagaia diho, a mauri reḡena ta eiava toana ta enai se hedinarai. Taunabunai ia na e lou ela, Elisaia ida e hedavari; bena e hamaoroa, eto, Mero na do se noga.

32 Elisaia na ruma ai e dae kau, bena iena mahuta ḡauna latanai mero hekurena ai e itaia, mase. 33 Taunabunai, ia na e raka vareai, e hekou ahu, idia raruosi mo nonoho. Bena ia ese Iehova e ḡuria. 34 Bena ia na ela, mero latanai e goru kau, ia uduna mero uduna latanai, ia matana mero matana latadiai, ia imana mero imana latadiai; bena latanai e goru parapara negana ai hari mero tau-anina e siahu-siahu. 35 Bena ia na e tore isi lou, ruma lalonai e raka lao e raka lou; bena ma e dae kau, ma latanai e goru parapara. Bena mero na nega hitu e asimana; bena matana e papa. 36 Bena Elisaia ese Gehasi e boiria, eto, Hari Suneme hahinena a boiria. Bena e boiria. Hahine na ema, bena Elisaia eto, Natumu avabia isi. 37 Hahine na ema, ia aena badidiai e igo diho, tano ai e goru diho; bena ia ese natuna e abia isi, e raka lasi.

38 Elisaia na e lou lao, Gilgal ela. Una negana ai doe vada e vara una tano ai. Peroveta oreana taudia na ia vairanai hehelai; bena ia ese ena hesiai tauna e hamaoroa, eto, Uro badana na lahi ai ba laia kau, vasiahu ba nadua, peroveta oreana taudia adia. 39 Idia ta e raka lasi, tano paka ai aniani avadia baine gogo eto; bena uda varovarona ta e davaria, bena huahuana e gogo, vairana ramina e hahonua, bena ela, e reredia, vasiahu urona lalonai e udadia. Asi dibana unu be dahaka ḡau. 40 Bena e seia, tatau bae inua totona. A vasiahu inuna ai idia na e lolo, eto, Dirava ena tau e, mase na uro lalonai. Idia na asie inua diba. 41 Elisaia eto, Flaoa taina a mailaia. Bena uro ai e udaia. Ma eto, Ma a seia, tatau adia, bae inua. Dika ta dia mia uro lalonai.

42 Tau ta Baal-salisa amo ema, Dirava ena tau ana e mailai, uma anidia roboadia flaoana, bali igabudia ruahui, bona uit anidia matamatadia, na ena puse ai. Bena Elisaia eto, Tatau a henidia, bae ani. 43 A ena hesiai tauna eto, Tatau sinahu ta vairadiai ede baina dabarai toma? Ma e hamaoroa, eto, Tatau a henidia, bae aniani, badina be Iehova na ini e gwau tomamu: Bae aniani, bona bahudia na bae mia. 44 Bena e dabaraia idia vairadiai. Bena idia na e aniani, bona bahudia na e mia, Iehova ena hereva heḡereḡerena.