1 Sedekia ena lohia laḡanina ihataurahani-tana ai, hua ihagwautana dinana ihagwautana lalonai, Nebukadnesara, Babulono pavapavana, na ena tuari oreana idoinai ida Ierusalem ihadikana ema, e koua heḡeḡe bona tano e larebaia heḡeḡe. 2 Taunabunai, hanua e koua heḡeḡe ela bona King Sedekia ena lohia laḡanina ihagwauta-tana. 3 Bena hua ihahanina dinana ihatamahani-tana ai, hanua lalonai doe vada e bada herea, bona tano idoinai taunimanima na asi adia. 4 Una negana ai, hanua maḡuna e hamaurua. Ena be Kaldea taudia na hanua vada e koua heḡeḡe, to hanua pavapavana bona tuari taudia iboudiai na hanuaboi e heau, maḡu ruaosi padadia ikoukouna amo, hanua pavapavana ena uma-uma badibadinai; bena Araba kahana ela. 5 A Kaldea taudia edia tuari oreana ese hanua pavapavana na e ḡavaia, ela bona Ieriko taorana ai e lasi tao; ena tuari oreana idoinai na iena amo e karoho rohoroho. 6 Bena idia ese hanua pavapavana e abia mauri, Babulono pavapavana dekena e laohaia, Ribla ai. Ia ese e revaia. 7 Bena Sedekia natuna mamaruanedia na ia vairanai e aladia mase; bena Sedekia matana e hakepuludia, bena auri gadeadia amo e ḡuia, Babulono e laohaia.

8 Hua iha-imana dinana ihahituna ai, (una na King Nebukadnesara, Babulono pavapavana, ena lohia laḡanina ihagwauta-taurahani-tana ai), Nebusaradana, hegima oreana biaguna, Babulono pavapavana ena hesiai tauna ta, na Ierusalem ai e kau. 9 Bena ia ese Iehova ena dubu bona pavapava ena ruma bona Ierusalem rumadia iboudiai e doudia; ruma badadia iboudiai e dou. 10 Bena Kaldea tuari oreana taudia iboudiai, hegima oreana biaguna ida ema taudia, ese Ierusalem heḡegemadai maḡudia e haheḡigidia dobi. 11 Bena hanua taudia kwabukwabudia dounu hanua ai e nohova, bona e heau Babulono pavapavana enai e hanai taudia, bona taunimanima oredia, na Nebusaradana, hegima oreana biaguna, ese dauha e laohaidia. 12 A hegima oreana biaguna ese ogoḡami dikadika taudia haida e rakatanidia, vine imeadia ireḡudia bona tano iruana.

13 Auri labora-labora au-tubuadia Iehova ena dubu ai, bona rerue bona auri labora-labora nauna badana Iehova ena dubu ai, na Kaldea taudia ese e hamakohidia, bona auri labora-laborana na e laohaia Babulono. 14 Bona uro bona gaga bona lamepa ihaḡoevadia ḡaudia, bona muramura mai bonadia urodia, bona auri labora-labora ḡaudia, kara helaḡadia ai e ḡaukaralaiva ḡaudia, na iboudiai e laohai. 15 Gida keberedia bona bio, bona gold amo bona silver amo e kara ḡaudia ibouboudiai na hari hegima oreana biaguna ese e laohai. 16 Hari au-tubua ruaosi, bona nau badana, bona rerue, Solomon ese e kara Iehova ena dubu ena, auri labora-laboraidia lalodiai metauna na asi ihahetohona. 17 Au-tubua ta ena lata na kiubit gwauta-taurahani; ia latanai na kwarana ikorona, auri labora-labora ḡauna, ena lata na kiubit toi; bona reke-hetomana bona rimono huahuadia laulaudia, iboudiai na auri labora-labora amo e kara, na hari au-tubua kwarana ikorona ḡauna e ḡeḡelaia. Au-tubua iharuana danu unuheto, mai ena reke-hetomana.*Siri 13 ela bona 17. Hanua Pavapavadia Buka Gini-gunana Karoa 7 ba itaia.

18 Bena hari hegima oreana biaguna ese hahelaḡa tauna badana Seraia, bona hahelaḡa tauna ihararuana Sefania, bona dubu iduarana inaridia taudia tatoiosi, e abidia. 19 Hanua amo danu tuari oreana biaguna ta bona hanua pavapavana ena kaunsil taudia laima hanua lalonai e davaridia na e abidia; bona tuari biaguna ena toretore tauna, ena ḡaukara be tano taudia ihagaudia, bona tano taudia tauratoi-ahui hanua lalonai e davaridia danu, 20 Nebusaradana, hegima oreana biaguna, ese e abidia, Babulono pavapavana dekena e laohaidia Ribla ai. 21 Bena Babulono pavapavana ese e rahudia mase Ribla ai, Hamat tanona ai, e aladia mase. Taunabunai, Iuda taudia na edia tano amo e abidia oho, dauha e laohaidia.

22 Taunimanima kwabukwabudia na Iuda tanona ai e nohova, Nebukadnesara, Babulono pavapavana, ese e rakatanidia dainai. Bena ia ese Gedalia, Ahikama Safana natuna, e duanaia, baine biagudia. 23 Bena tano paka ai e nohova oreadia biagudia iboudiai, mai edia orea taudia ida, e kamonai Babulono pavapavana ese Gedalia vada e duanaia baine biagudia negana ai, idia na edia orea taudia ida Gedalia dekena ela, Mispa ai. Taudia bini: Ismael Netania; lohanan Karea; Seraia Tanahumete, tau Netofa; bona Iaasania, tau Maakata natuna. 24 Bena Gedalia ese idia bona edia orea taudia e gwau henidia hamata, eto, Basio gari Kaldea lohiadia daidiai; tano lalonai ba noho, bona Babulono pavapavana isiaina ba lao heni, bena ba namo.

25 A hua ihahituna ai, Ismael, Netania Elisama natuna, hanua pavapavana ena iduhu tauna ta, na tatau gwauta ida ema. Idia ese Gedalia bona Iuda taudia bona Kaldea taudia ia ida Mispa ai e nohova na e tuari henidia bona e aladia mase. 26 Bena taunimanima iboudiai kikina-badana, bona orea biagudia, na e tore isi, Aigupto ela; badina be idia na Kaldea taudia garidia e gariva.

27 Iehoiakini, Iuda pavapavana, ena noho-hedoa laḡanina ihatoiahui-hituna ai, hua ihagwauta-ruana dinana iharuahui-hituna ai, Evil-merodak, Babulono pavapavana, e lohia matama. Bena ena lohia laḡanina gini-gunana ai ia ese Iehoiakini, Iuda pavapavana, e bogaia hisi, dibura rumana amo e ruhaia nege; 28 ia ese e hereva namo henia, bona helai ḡauna hereana e henia, pavapava iboudiai ia ida Babulono ai e nohova daediai. 29 Taunabunai, Iehoiakini na ena dibura dabuadia e doki oho. Una murinai ena mauri dinadia iboudiai lalodiai ia na hanua pavapavana ena pata ai e anianiva; 30 bona hanua pavapavana ese ahuna e henia, dina ta ta amo, ena mauri dinadia iboudiai lalodiai.