1 Ioab Seruia lalona vada e parara, hanua pavapavana ese Absalom e laloa badava. 2 Bena Ioab e hesiai, aonega hahinena ta Tekoa amo e boiria, e hamaoroa, eto, Mase tauna taina e taimu hahinena ba tohotohoa, guma dabuadia ba dokilai; taumu na dehoro amo basio dahua, a dina momo mase tauna taula vada e tai hahinena heḡereḡerena ai baola; 3 bena hanua pavapavana dekenai ba raka vareai, ini ba hereva henia toma. Bena baine gwaurai herevadia na Ioab ese e henia.

4 Hari Tekoa hahinena na hanua pavapavana dekenai e kau negana ai, ia na tano ai e goru diho, e toma henia diho, eto, Pavapava e, a kahagu. 5 Hanua pavapavana ese e nanadaia, eto, Emu hekwarahi be dahaka? Hahine na e haere, eto, Lau na vabu, adavagu na vada e mase. 6 Lau binai emu hesiai hahinena natugu mamaruanedia na rarua. Nega ta idia na tano paka ai e heai; asi tauna ta unuseni ai baine dogodia, bena ta ese ta e alaia mase. 7 Harihari egu iduhu taudia iboudiai ese emu hesiai hahinena vada e daḡedaḡe henigumu, e tomu, Tadikakana e alaia tauna a henimai, baia alaia mase, hari tadikakana e alaia tauna ena mauri davana. Unu amo idia ese dihi danu bae ha-orea; unu amo egu gida tamona doini e aramu na bema habodoa, adavagu na ladana eiava garana basiema mia tanobada latanai.

8 Bena hanua pavapavana ese hahine na e hamaoroa. eto, Emu ruma aola, taravamu do baina atua. 9 Tekoa hahinena ese hanua pavapavana ma e hamaoroa, eto, Egu lohia bona egu pavapava, kerere na lau latagu ai bona tamagu ena ruma latanai baine mia; hanua pavapavana bona ena terono na asi kereredia. 10 Hanua pavapavana eto, Bema tau ta ese hereva ta baine hamaorolaimu, dekegu ba hakaua mai; ia na nega ta basine daumu toho lou. 11 Hahine ma eto, Namona be hanua pavapavana ese Iehova, emu Dirava, do ba hahanea, bena rara davana iabina tauna basine ala-ala lou, bona natugu na basine mase. Hanua pavapavana eto, Iehova e maunmu heḡereḡerena, natumu huina tamona na tano ai basine moru.

12 Bena hahine eto, Mani emu kara, lau binai emu hesiai hahinena ese egu lohia bona egu pavapava na hereva ta aina hamaorolaimu. Ia eto, A hereva. 13 Bena hahine na eto, Dahaka dainai Dirava ena orea taudia na kara idauna amo o kara henidiamu? Badina be ina hereva amo hanua pavapavana ese sibona e hahemaoro henimu; badina be hanua pavapavana ese natuna vada e negea daure bena se hakaua lou mai. 14 Ita iboudai baita mase; ita na ranu tano ai e hebubumu na heto, tau ta ese basine haboua lou diba. A vada e murimuria tauna se negea daure vaitanimu to iabi-louna dalana e haeroamu tauna na Dirava ese ena mauri basine abia oho. 15 Ina hereva na egu lohia, hanua pavapavana, ihamaorolaina totona vada nama, badina be taunimanima ese vada e hagarigu. Bena emu hesiai hahinena ese lalona e hadaia, eto, Hanua pavapavana baina hereva henia; reana hanua pavapavana ese ena hesiai hahinena ena noinoi heḡereḡerena baine karaia. 16 Badina be hanua pavapavana baine kamonai, bena ia ese ena hesiai hahinena baine hamauna, lau bona natugu na Dirava ena orea lalona amo baine habuamai tari eto tauna imana amo. 17 Bena emu hesiai hahinena ese lalona e hadaia, eto, Egu lohia bona egu pavapava ena hereva ese lalogu baine hamarumarua; badina be egu lohia bona egu pavapava na Dirava ena aneru na heto, namo bona dika itadia mai dibana. Iehova, emu Dirava, ese baine bamomu.

18 Bena hanua pavapavana ese hahine na e haere henia, eto, Na noimumu, ḡau ta egu ai basio hunia. Hahine na eto, Egu lohia bona egu pavapava na aine hereva. 19 Bena hanua pavapavana eto, Ina kara ai Ioab imana na oi ida a? Hahine na e haere, eto, Mornokani, egu lohia bona egu pavapava o maurimu heḡereḡerena, egu lohia bona egu pavapava emu hereva amo taunimanima ta basine raka sin diba, idiba kahana ai eiava lauri kahana ai. Emu hesiai tauna Ioab ese e haḡanigu; ia ese ini hereva iboudiai na emu hesiai hahinena uduna ai e atoa. 20 Kara iha-idaudia totona emu hesiai tauna Ioab na unu e kara toma. A egu lohia na Dirava ena aneru heḡereḡerena, tanobada ḡaudia iboudiai na mai dibana.

21 Bena hanua pavapavana ese Ioab e hereva henia, eto, A kamonai, na gwau maoromu: aola, eregabe tauna Absalom ba hakaua lou mai. 22 Bena Ioab na tano ai e goru diho, hanua pavapavana e toma henia diho, bona e hanamoa. Ioab eto, Egu lohia bona egu pavapava, hari dina ai emu hesiai tauna dibana oi ese vada o lalo namo henigumu, badina be hanua pavapavana ese ena hesiai tauna ena noinoi vada e abia dae. 23 Taunabunai, Ioab na e tore isi, Gesuru ela, Absalom e hakaua mai Ierusalem ai. 24 Bena hanua pavapavana eto, Ia na sibona ena ruma ai baine noho edea, vairagu basinema. Taunabunai, Absalom na sibona ena ruma ai e noho edea, hanua pavapavana dekenai se raka vareai.

25 Israel idoinai raho-namo tauna ta asie imodaiava, Absalom heḡereḡerena; aena henuna amo ela bona kwarana tubuana ia na asi bebeka-bebekana. 26 Laḡani ta ta dokodia ai ia ese huina e utua, e metauva dainai; bena e utua negadia ai na huina metauna e hahetohoa; metauna na sekele sinahu-rua,*Sekele sinahu-rua = 6 Ibs sisivana. hanua pavapavana ena metau hahetohona ḡaudia amo. 27 Absalom natuna na e vara, mamaruanedia tatoi, hahine tamona. Natuna hahinena ladana e hatoa Tamara; ia na hane namo.

28 Taunabunai, Absalom na Ierusalem ai e nohova, hanua pavapavana dekenai se raka vareai, ela bona Iaḡani rua vada e ore. 29 Bena Absalom ese gwau-kau e siaia, Ioab na hanua pavapavana, dekenai bainela; a Ioab na e gwau edeede. Nega iharuana ia ese gwau-kau e siaia, a Ioab ma e gwau edeede. 30 Bena ia ese ena hesiai taudia e hamaorodia, eto, A itaia, Ioab ena uma na lauegu uma badibadinai; ena bali na unuseni ai; aola, a doua. Taunabunai, Absalom ena hesiai taudia ese uma na e doua.

31 Bena Ioab e tore isi, Absalom dekena ela, ena ruma ai, e nanadaia, eto, Badina be dahaka emu hesiai taudia ese egu uma vada e doua? 32 Bena Absalom ese Ioab e haere henia, eto, Badina be gwau-kau na dekemu ai na siaia, nato “Baoma, hanua pavapavana dekena baina siaimu lao, ba henanadai, baoto: Dahaka dainai Gesuru amo nama? Unuseni ai bama noho ema bona harihari bema namo.” Taunabunai, hanua pavapavana dekenai aina raka vareai na tomu; bena bema mai egu kerere, ia ese baine alagu mase.

33 Bena Ioab na hanua pavapavana dekena ela, e hamaoroa. Bena hanua pavapavana ese Absalom e boiria. Absalom na hanua pavapavana dekenai e kau, bena tano ai e igo diho, hanua pavapavana vairanai. Bena hanua pavapavana ese Absalom e harahua.