1 Hahelaḡa tauna badana eto, Edia hereva na momokani a? 2 Stefano e haere, eto, Varavaragu bona tamagu loḡora e, egu hereva a kamonai. Hairai Diravana ese seneda Abraham enai e hedinarai Mesopotamia ai, Haran ai do se nohova negana ai; 3 eto, Emu tano bona varavaramu ba rakatanidia, baina hadibamu tanona baola. 4 Bena ia ese Kaldea taudia edia tano e rakatania, Haran ai eha noho. Bena tamana e mase murinai Dirava ese unu amo ma e hakaua, ema bona harihari o noho heniamu tanona ai eme lasi. 5 A tano sisina taina se henia; oibe, aena ihadaina gabuna taina asine henia. Ḡau tamona, e gwau henia hamata do baine henia, bona ia murinai garana danu baine henidia. Una negana ai Abraham na asi natuna.

6 Dirava ese ma e hamaoroa eto, garana loḡora idau tano ai bae ha noho, bena una tano taudia ese isiaidia ilao-henidia taudia ai bae halaodia, bona bae hahisidia laḡani sinahu-hani. 7 Dirava ma eto, Hesiai taudia ai baine halaodia besena na lau ese baina hahemaoro henia; gabeamo idia na bae raka lasi, iniseni ai bae toma henigu diho. 8 Peritome taravatuna danu e henia. Taunabunai, Abraham ese Isaak e havaraia, bona dina ihataurahanina ai e peritomea. Isaak ese danu Iakob e havaraia; bona Iakob ese eda iduhu ikwaradia taudia gwauta-raruosi e havaradia.

9 Hari iduhu ikwaradia taudia ese Iosef e vaḡeḡe henia, Aigupto taudia ediai e hoia. A Dirava ese e bamoa, 10 bona ena hisihisi iboudiai amo e hamauria; hahenamo bona aonega danu e henia, Farao, Aigupto pavapavana, vairanai; bena Farao ese siahu e henia, Aigupto tanona bona iena ruma taudia baine lohiadia. 11 A doe be Aigupto idoinai bona Kanaan ai e vara, hisi ani bada danu; bena seneda e hitolodia maseva. 12 Iakob e kamaonai Aigupto na mai uitina, bena ia ese seneda e siaidia lao, nega gini-gunana. 13 Nega iharuana ai Iosef sibona ese kakana e hahedinarai henidia; bona Iosef besena haridia Farao danu e kamonai. 14 Bena Iosef ese gwau-kau e siaia, tamana Iakob bona varavarana iboudiai danu e vavedia, taunimanima hitu-ahui laima. 15 Bena Iakob na Aigupto ela; unuseni ai e mase; bona seneda danu unuseni ai e mase. 16 Bena Sekem e huadia lao, gara lalonai e atodia; una gara na Abraham ese Hamoro natuna edia amo silver monidia ai e hoia.

17 Dirava ena gwauhamata Abraham enai ihamomokanina negana e kahirakahira ai, taunimanima Aigupto ai vada e vara rohorohova bona e hutumava; 18 ema bona pavapava idauna ta Aigupto vada e lohiaia; ia na asi dibana Iosef. 19 Ia ese seneda e dibaḡanidia bona e hahisidia; bona e haduadia, natudia karukarudia bae negedia, bena bae mase.

20 Una negana ai Mose vara, raho-namo merona bena hua toi tamana ena ruma ai e ubua. 21 Bena e negea; to Farao natuna kekenina ese e abia, natuna ai e haloa. 22 Taunabunai, Aigupto taudia edia aonega idoinai na Mose e hadibmaia; bena ena hereva bona ena ḡaukara na mai siahudia. 23 Ena laḡani e hari-ahui negana ai lalona vada e hadaia, varavarana Israel taudia baine igodia ita eto. 24 Tau ta e itaia, Aigupto tauna ese e hadikaia, bena e durua, Aigupto tauna e alaia mase. 25 Ia banava eto varavarana lalodia bae parara, Dirava ese ia imana amo baine hamauridia, to asi dibadia. 26 Kerukeru tatau rarua e heatuva ai dekediai e kau, bena ia ese e hamarumarudia toho, eto “Tatau e, umui raruosi na varavara; dahaka dainai o hahedika hehenimu?” 27 A varavarana e hadikaiava tauna ese e doria oho, eto “Oi be daika ese emai lohia bona emai hahemaoro tauna ai vada e halaomu”? 28 O uramu bavalagu a, varani Aigupto tauna o alaia na heto?” 29 Mose ese una hereva e kamonai, bena e heau ela, Midian tanona ai eha noho, unuseni ai natuna mamaruanedia rarua e havaradia.

30 Laḡani hari-ahui e ore, bena aneru ta ese tano ḡaḡaena ai, ororo ladana Sinai ai, e hahedinarai henia, au ḡiniḡini e arava hururuna lalonai. 31 Mose ese e itaia, bena e hoa. Itana totona e raka kahiva ai Lohiabada gadona ese e hereva henia, eto, 32 Lau na tubumu tamamu edia Dirava; Abraham bona Isaak bona Iakob edia Dirava. Mose na e heude-heudle, au iraraitaona vada e gari. 33 bena Lohiabada ese e hamaoloa, eto, Emu tamaka a daki oho, badina be o ginimu gabuna na tano helaḡana. 34 Momokani, egu taunimanima Aigupto ai edia hisihisi vada na itaia, edia ḡanaḡana danu vada na kamonai, bena ihamauridia totona vada na diho nama. Harihari baina siaimu, Aigupto baola. 35 Hari Mose na idia ese e ihi-ihiraia, eto “Daika ese emai lohia bona emai hahemaoro tauna ai vada e halaomu?”: Mose na bunai Dirava ese e siaia, edia lohia bona edia hahemaoro tauna ai vada e halaoa; bona au ginigini lalonai e itaia aneruna ese e durua.

36 Una tau ese e hakaudia lasi, hoa karadia bona toa danu e karava Aigupto ai bona Davara Kakakakana ai bona tano ḡaḡaena ai, laḡani hariahui lalodiai. 37 Una Mose ese danu Israel taudia e hamaorodia, eto, Dirava ese peroveta tauna ta do baine haginia umui emui ai, varavaramui edia amo, lau bamogu. 38 Una tau danu tano ḡaḡaena ai hegogo lalonai, bona Sinai ororona dorina ai ia ida e hereva-hereva aneruna ida, bona ita seneda ida, e nohova. Ia ese mauri herevadia e abi, ita ma baine henida helaoreana. 39 A seneda na ia ikamonai-henina asie urava; e dadaraia, bona lalodia ai Aigupto ma e ura henia louva. 40 Bona idia ese Aaron e hereva henia, eto “Dirava haida a karadia ita eda, ita vairadai bae raka; badina be asi dibada hari Mose, Aigupto amo e hakauda lasi tauna, na ede eha heto”. 41 Una negana ai idia ese boromakau natuna laulauna ta e karaia, bena boubou ḡauna danu una kaivakuku vairanai e atoa; imadia ai e kara ḡaudia na e moalelaiva. 42 Bena Dirava na edia amo e raka oho, sibodia guba ḡaudia bae toma heni diho, peroveta taudia edia buka ai e torea heḡereḡerena eto, Israel taumui e, laḡani hari-ahui tano ḡaḡaena ai o alava boromakaudia bona boubou ḡaudia na vairagu ai o ato a? 43 Lasi, Molok ena dabua dubuna, bona dirava ta ladana Refan ena hisiu, o loalaiva, laulaudia bunu o karava, ba toma henidia diho helaoreana. Babulon unukahana do baina laohaimui.

44 Dabua dubuna, taravatu ihahedinaraina ḡauna, na seneda ese tano ḡaḡaena ai e abia; e karaia Dirava ese Mose e haduaia bona Mose ese oromana e itaia heḡereḡerena. 45 Bona seneda haida, gabeai e vara taudia, ese ma e abia, Iosua negana ai e huaia mai, idau bese taudia edia tano iabina negana ai; unu idau bese taudia na Dirava ese seneda vairadia amo e luludia ohova, ema bona David negana.

46 David ese Dirava ena hahenamo e abia, bona e noinoi, Iakob ena Dirava ena dubu baine karaia eto. 47 To ena dubu ihaginina be Solomon. 48 Ḡau tamona, Herea Mikamika na taunimanima imadia ese e karava rumadia ai se nohomu; peroveta tauna ena hereva heḡereḡerena eto,

51 Aio auka taumui e, lalomui bona taiamui e kara asie peritomedia taudia na heheto, umui ese nega idoinai Lauma Helaḡa o laoa ahumu. Tamamui edia kara na umui ese danu doini o badinamu. 52 Peroveta tauna be daika umui senemui ese asie daḡedaḡe henia? Kara Maoromaoro Tauna maina e gwauraia gunava taudia na idia ese e aladia mase; harihari umui ese ia taona vada o torea, bona vada o alaia mase. 53 Umui na aneru ese e heni taravatuna vada o abia, to asio badinaia.

54 Idia ese unu hereva e kamonai ai, e badu dikadika, gadigadidia danu e haheḡiri henia. 55 A Stefano na Lauma Helaḡa ese e rohea; bena guba ai e gaga dae, Dirava hairaina e itaia, bona Iesu danu, Dirava idibana kahana ai gini. 56 Bena ia eto, Guba na itaiamu, e hekehomu, Taunimanima Natuna danu na itaiamu, Dirava idibana kahana ai gini.

57 Bena idia na e lolo badabada, bona taiadia e kodobe. Bena dekena e heau lao, e abia, 58 hanua murimurinai e veria lasi, nadi amo e hodoa. Herarai taudia ese edia dabua na eregabe tauna ta, ladana Saulo, aena badibadinai e ato. 59 E hodoa negana ai Stefano e ḡuriḡuri, eto, Lohiabada Iesu e, lau laumagu na avabia dae. 60 Bena e hetuitui, e lolo, eto, Lohiabada e, ina kara dika na davana-basio henidia. Unu e hereva toma, bena e mahuta.