1 Tadikakagu bona tamagu logora e, sivaraigu aina hamaorolaimui mani a kamonai.

2 Idia ese e kamonai ia na Heberu gadodia ai e hereva henidia, bena asi reḡereḡedia e hakala henia.

3 Bena ia ma eto, Lau na Iuda taugu, Kilikia tanona ai na vara, Taso hanuana ai; to ina hanua lalonai na bada oho bada oho. Gamaliel ese e hadibaguva negana ai, ia ese seneda edia taravatu kaladia metaudia e hadibalaiguva. Bena Dirava ena ḡaukara na goadalaiava, harihari umui ese o goadalaiamu heḡereḡerena. 4 Ina dala matamatana danu na daḡedaḡe heniava, tatau bona hahine na ḡuidiava, dibura rumadia ai na koudiava, bae mase na tomava. 5 Una na hahelaḡa tauna badana bona hanua tau-badadia bae hamomokania diba. Idia ese revareva e henigu, varavarada Damasko ai edia; bena nala, unuseni ai e nohova taudia ma baina ḡuidia, Ierusalem baina hakaudia mai, matadia ihakanidia totona. 6 To na laova ai, Damasko e kahira-kahira, dina tubua sisivana diari badana ta guba amo e tara dagu, e ḡeḡegu ahu. 7 Tano ai na hekida diho, bena gado ta na kamonai, eto “Saulo e, Saulo e, dahaka dainai o daḡedaḡe henigumu?” 8 Bena na haere, nato “Lohiabada e, oi na daika?” Ia e helada hato, eto “Lau na Iesu, tau Nasaret, o daḡedaḡe henigumu”. 9 Bamogu danu diari e itaia, to e hereva henigu gadona na asie kamonai. 10 Bena na henanadai, nato “Lohiabada e, ede baina kara toma?”, Lohiabada e haere, eto “A tore isi, Damasko ai ba raka vareai, unuseni ai ta ese baine hamaoromu ede ba kara toma”. 11 Una diari badana ese matagu e paia, ḡau ta asina itaia; bena bamogu ese imagu ai e abi, e hakaugu lao bona Damasko ai.

12 Unuseni ai tau ta na dekegu ema, ladana na Anania; ia be Dirava garina e gariva bona taravatu e badinaiava tauna; Iuda taudia danu iboudiai unuseni ai e nohova ese ia e imodaiava. 13 Ia na badibadigu ai e gini, eto “Tadigu Saulo e, matamu bae papa”. Una negana ai matagu vada e papa, na itaia. 14 Bena ia eto “Seneda edia Dirava ese vada e abimu hidi, ena ura vada ba diba, Kara Maoromaoro Tauna do ba itaia bona uduna herevadia danu ba kamonai. 15 Badina be iena amo vada o ita bona o kamonai ḡaudia na do ba gwaurai hedinarai, iena taunimanima iboudiai vairadiai. 16 Dahaka o halahemu? A tore isi; bapatiso avabia, emu dika ihuri-ohodia; bona ia ladana ba hahanea”.

17 Bena Ierusalem na lou henia, Dubu Helaḡa lalonai na ḡuriḡuriva ai na mata hanai, 18 Iesu na itaia. E hereva henigu, eto “A kara haraḡa, Ierusalem a rakatania haraḡa-haraḡa; badina be sivaraigu na bo gwauraimu basie abi daemu”. 19 Lau na haere, nato “Lohiabada e, idia dibadia, lau ese oi ibadinamu taudia na dubu iboudiai amo na abidia, dibura rumadia ai na koudia, na dadabadia danu. 20 Igwauraimu tauna Stefano danu rarana e hahebubua negana ai lau danu idia dekediai gini, ia iala-masena taudia edia kara na hanamoa, bona edia dabua na nari”. 21 A Iesu ese e hereva henigu, eto “Vada aola; bainda be gabu daudau bdina siaimu lao, bese idau-idau dekedia baola”.

22 Idia ese e hakala henia ela bona ia na unu e gwau toma, bena e lolo, eto, Ina tau na tanobada amo baine heabi oho; baine mauri na dia namo. 23 E lolova ai edia dabua danu e taho nege, bona ḡahu e taho dae taho dae.

24 Una dainai tuari biaguna badana ese ena orea taudia e haduadia, Paulo na kohoro lalonai bae hakaua vareai, unuseni ai bae dadabaia, bona bae nanadaia, unu e lolo henia tomava anina be dahaka.

25 Idia ese boromakau kopina varodia amo e mataia, bena ia ese tuari biaguna, ia badibadinai e gini tauna, e nanadaia, eto, Roma tauna na do basie hahemaoro henia a vada bae dadabaia guna na maoro a? 26 Tuari biaguna una hereva e kamonai, bena ela, tuari biaguna badana e hamaoroa, eto, Ede bo kara tomamu? Badina be hari tau na Roma tauna.

27 Bena tuari biaguna badana na Paulo dekena ela, eto, A hamaorogu, oi na Roma taumu a? Ia eto, Oibe. 28 Tuari biaguna badana eto, Una dagi be moni badana amo na hoia. Paulo eto, A lau be una dagi ai na vara. 29 Bena bae dadabaia eto taudia ese e rakatania haraḡa-haraḡa; tuari biaguna badana danu kudouna e hetaha, badina be ia dibana Roma tauna vada e ḡuia kava.

30 Kerukeru, tuari biaguna badana e urava Iuda taudia ese Paulo e habadelaia badina baine diba. Una dainai ia ese e ruhaia, bena hahelaḡa taudia bona kaunsil taudia iboudiai e haduadia, bae hebou eto. Bena ia ese Paulo e hakaua diho, idia vairadiai e haginia.