1 A Dina ima e ore ai, Anania, hahelaḡa tauna badana, e gini dae, hanua tau-badadia haida ida, bona haroro mai dibana tauna ta, ladana Teretulo. Bena idia ese gavana e hereva henia, Paulo e habadelaia.

2 Taunabunai Paulo e boiria. Bena Teretulo ese e habadelaia matama; eto, Namo-herea taumu Feliki e, oi daimu ai maino ai a nohomu; bona emu aonega dainai ina bese ena dala vada eme maoromaoro; 3 taunabunai ai ese nega idoidiai bona gabu iboudiai emu hereva a abi daemu bona a hanamomumu. 4 A baina haturiamu na garina na noimumu, mani ame bogamai hisi, emai hereva kwadogina na ba kamonai. 5 Badina binai: ai ese ina tau a davaria, ia na dika ihavarana tauna, Iuda taudia iboudiai tanobada kahadia idoidiai ia ese e haheloḡo-heloḡodiamu; ia danu Nasaret oreana ihakauna tauna ta. 6 Ia ese Dubu Helaḡa e hadikaia toho, to ai ese a dabaia tao, baia hahemaoro henia emai taravatu heḡereḡerena ato. 7 A Lusia, tuari biaguna badana, ema, imamai amo e abia oho mai daḡedaḡena ida; 8 bona e habadelaia taudia e haganidia, oi dekemu baema. Mani oi ese ba nanadaia, bena hari kara idoidiai a habadelaiamu herevadia sibomu ba diba. 9 Bena Iuda taudia ese ena hereva e durua, eto, Unu hereva iboudiai na momomo-kakani.

10 Gavana ese Paulo e lodu henia; bena Paulo ese haere. Eto, Lau dibagu oi ese laḡani hoho ina bese vada o hahemaoro henia, una dainai sibogu herevagu aina gwaurai mai moalegu ida. 11 Badina boma tahua boma diba, dina gwauta-rua vada ela, lau na toma-diho tolona Ierusalem ai na lla dara dae. 12 Dubu Helaḡa ai lau tau ta ida hepapahuahumai ai asie davarigu; bona dubu maraḡidia ai eiava hanua ariaradia ai heloḡo-heloḡo ta asina havaraia. 13 Idia danu harihari e habadelaigumu herevadia na oi vairamu ai basie hamomokani diba. 14 A ina na na gwauraia hedinaraimu: idia ese kererena e gwauraiamu dalana ai lau ese senemai edia Dirava na toma henia dihomu; ḡau tamona, ḡau iboudiai taravatu ai bona peroveta bukadia ai e tore na na abi daemu danu. 15 Mai egu helaro danu Dirava enai, ini hahebade taudia heḡereḡeredia. Emai helaro binai: mase taudia do bae tore isi lou, kara maoromaoro taudia bona asi edia kara maoromaoro taudia danu. 16 Ina danu na goadalaiamu, lalogu na basine kerere helaoreana. Dirava vairanai bona taunimanima vairadiai. 17 Laḡani haida vada e lao bubuni; bena nala, harihari ḡaudia bona boubou ḡaudia egu hanua baina laohai nato. 18 Unu na kara toma, bena na haheḡoeva negana ai na Dubu Helaḡa ai e davarigu; aru taudia na lasi, heloḡo-heloḡo danu lasi. 19 A Iuda taudia haida Asia amo be unuseni ai; idia na egu kara dika ta bema diba, oi vairamu ai bema mai, bema habadelaigu, una na bema maoro. 20 Eiava ini vada ema taudia ese bema hamaorogu, egu kara dika be edena, kaunsil taudia vairadiai na gini negana ai e davaria. 21 A ina hereva tamona idia bogaragidiai ginigu ai na gwauraia badabada, nato “Mase taudia edia tore-isi-lou herevana dainai hari dina ai o hahemaoro henigumu”.

22 Hari “dala” herevana vada e diba maoromaoro dainai, Feliki ese idia e gwaudia tubu, eto, Lusia, tuari biaguna badana, bainema negana ai na emui hereva baina tahua namonamo. 23 Bena tuari biaguna e haduaia, Paulo baine gimaia, to basine koua kunuka-kunuka; turana haida ese danu bae igoa ita, basine gwaudia tao.

24 Dina Haida muridiai, Feliki na adavana Drusila, Iuda hahinena, ida ema; bena Paulo e boiria, Keriso Iesu iabiabiraina herevana na iena amo e kamonai. 25 A Paulo ese kara maoromaoro bona boga auka bona bainema hahemaorona danu e herevalai; bena Feliki e gari bada, eto, Harihari aola; nega baine namo ma baina boirimu lou. 26 Ia danu mai ena helaro, Paulo ese moni baine henia, ia iruhana davana; una dainai ia ese e boiria loulouva, ia ida e hereva-herevava. 27 A laḡani rua vada e lao bubuni, bena Porokio Festo ese Feliki e boloa. Bena Feliki na Iuda taudia lalodia ihanamodia urana e urava dainai, ia ese Paulo na iḡuina ai e rakatania.