1 Taunabunai, Keriso ida vada o tore isi dainai, atai ḡaudia ba haero; gabuna bunai Keriso na Dirava idibana kahana ai e helaimu. 2 Atai ḡaudia ba haero; tanobada ḡaudia basio haero. 3 Badina be vada o mase; emui mauri na Keriso ida Dirava lalonai vada e hehunimu. 4 Keriso, eda mauri badina, baine hedinarai negana ai, umui danu ia ida hairai ai ba hedinarai.

5 Taunabunai, tau-animui edia ura dikadia ba hamase: heuda-hanai, kara dika, mata-dika, lalo-heḡani, mata-ḡaniḡani. Ena na kaivakuku itomadiho-henina na heto. 6 Ene ḡau daidiai Dirava ena badu e kaumu, gwau-edeede taudia latadiai. 7 Gunaguna umui danu ene dala ai o rakava, idia bogaragidiai o nohova negana ai. 8 A harihari ini ḡau iboudiai ba nege: badu, daḡedaḡe, lalo-dika, ere-dika, udumui herevadia dikadia. 9 Basio hekoi heheni. Badina be tau gunana mai ena dika vada o dokia oho, 10 tau matamatana vada o hahedokilaia; ia na aonega ai e hamatamataia, ikarana Diravana heida-idana. 11 Tau matamatana lalonai asi Helene tauna, asi Iuda tauna, e peritomea tauna na lasi, bona se peritomea tauna danu lasi, idau tauna ta lasi, asi Skute tauna, asi hesiai tauna, bona asi ura-kwalimu tauna, a Keriso mo sibona, taunimanima bona ḡau iboudiai lalodiai.

12 Dirava ena abi-hidi taumui, ena helaḡa taumui, ena lalokau taumui e, ini na ba hahedokilai: hebogahisi, gado namo, manau, manada, haheauka. 13 Ba haheauka heheni. Ta ese bamona baine habadelaia negana ai, emui dika ba hegwau tao heheni; Lohiabada ese emui dika vada e gwau tao; umui danu unu ba kara toma. 14 A unu ḡau iboudiai latadiai, lalokau ba hahedokilaia; ia na ihatamonada ḡauna herea-daena. 15 Keriso ena maino danu lalomui baine biagudia; e boirimui, tau-anina tamona ai e haboumui, badina bunai. Dirava ba hanamoa. 16 Keriso ena hereva be lalomui ai bae mia, nega idoinai bae hataḡamui. Salamo ai, ane ai, lauma anedia ai, ba hahediba heheni bona ba hahealo heheni. Dirava ihanamolaina anedia bavabi mai lalomui ida. 17 Emui hereva ai bona emui ḡaukara ai, ḡau iboudiai Lohiabada Iesu ladana ai ba kara; bona Dirava ba hanamoa ia bagunai.

18 Hahine e, adavamui ba kamonai henidia; una na maoro, Lohiabada lalonai.

19 Tatau e, adavamui ba lalokau henidia, basio lalo dika henidia.

20 Memero kekeni e, ḡau iboudiai lalodiai tamamui sinamui eredia ba kamonai, bena Lohiabada ese baine lalo namo henimui.

21 Tama e, natumui basio turia riki henidia, lalodia bae hesiku na garina.

22 Hesiai memeromui e, ḡau iboudiai lalodiai biagumui ina tanobada ai ba kamonai henidia, dia vairadiai mo, taunimanima ihamoaledia karana, a mai lalomui idoidiai, Lohiabada imatauraina karana. 23 Emui kara iboudiai na ba kara balaheni, Lohiabada vairanai, dia taunimanima mo vairadiai; 24 ba diba, ahumui na Lohiabada ena amo bavabi, badina be umui na Lohiabada Keriso ena hesiai taumui. 25 A kara dika tauna ese ena kara dika davana do baine abia; eda Lohiabada na taunimanima toadia se lalomu.