1 Ma na roha lao, hahehisi karadia iboudiai dina henunai e karamu na itadia. Hahehisi ese e hahisidiamu taudia iruru-matadia na itadia, bona tau ta ese taudia se halodia. Siahu na hahehisi taudia ediai; bona taudia ihalodia tauna ta lasi. 2 Bena na laloa, vada e mase guna taudia na nanamo; idia ese doini e maurimu taudia na e hereadiamu. 3 A herea-daena be do se vara bena kara dikadia dina henunai e karamu na do se ita tauna hari.

4 Bena na itaia, hekwarahi idoinai bona ima-idibaka ḡaukaradia iboudiai na tau ta ese dekena tauna e vaḡeḡelai heniamu amo e varamu. Ina danu asi anina, lai ianina mo.

5 Kavakava tauna ese imana e lokumu, bona sibona tau-anina e aniamu.

6 Ima tamona na laḡa-ani amo baine honu be namo; ima ruaosi na hekwarahi bona lai ianina amo bae honu na dika.

7 Bena kara asi anina dina henunai ma na itaia. Kara na binai: 8 tau ta na asi bamona ta, asi natuna, asi tadikakana; ḡau tamona ena hekwarahi na se dokomu, bona ena roharoha ai ena taḡa na nega ta se heḡereḡeremu; bena nega ta se henanadaimu, seto “Daika bagunai na hekwarahimu bona moale ai na dabumu?” Ina danu asi anina, kara asi moalena.

9 Rarua ese tamona e hereaiamu; badina be edia hekwarahi davana namona e abiamu. 10 Badina be ta bema keto, bamona ese bema abia isi; a ta bema raka edea bena bema keto negana ai asi iabi-isina tauna, ia madi ihabaina. 11 Ina danu, rarua bema hekure hebou, tau-anidia bema siahu; a ta bema hekure edea, tauna ede bema siahu toma? 12 Tau ta ese tau tamona baine hadarerea diba reana, a tatau rarua ese bae laoa ahu diba. Varo ere toi na basie motu haraḡa.

13-14 Eregabe tauna mai aonegana, ena be ia na e vara ogoḡami tauna mo basileia lalonai bena dibura rumana lalona amo e raka lasi pavapava ai ela, to ia ese pavapava burukana mai ena kavakava, aonega taudia edia hahealo iabi-daena vada e rakatania tauna, na e hereaiamu. 15 Mauri taudia iboudiai dina henunai e raka eva-evamu na itadia, bona una pavapava burukana baine boloa eregabena danu. 16 Unu taunimanima iboudiai na asi iduahidia; ia ese iboudiai e biagudiava. Ḡau tamona, gabeai baema taudia ese basie moalelaia. Momokani, ina danu asi anina, bona lai ianina.