2 Hanua pavapavana ena haheḡani ba badinaia, bona emu gwauhamata helaḡana dainai kudoumu basine hetaha. 3 Ia vairana amo ba raka oho; ena be ḡaukara mamina na dika to basio halahe, badina be ia ese ena ura iboudiai heḡereḡeredia ai e karamu. 4 Badina be hanua pavapavana ena hereva na herea; daika ese baine nanadaia, baineto “Dahaka o karamu?” 5 Haheḡani e badinaiamu tauna na basine dika; bona aonega tauna lalona baine parara, nega bona dala be ededia. 6 Badina be, ena be taunimanima edia hekwarahi na metau, to ḡaukara iboudiai na mai negadia bona mai daladia. 7 Badina be ia na asi dibana dahaka baine vara, bena daika ese baine hamaoroa diba ede baine vara toma? 8 Asi tauna ta mai siahuna ia laumana baine dogoa tao eiava mai siahuna ena mase dinana enai. Tuari ai tau ta basine raka siri diba; bona dika ese kara dika tauna basine hamauria. 9 Ina idoinai na itaia, kara iboudiai dina henunai e karamu na haerodia negana ai. Na itaia danu, taunimanima haida ese bamodia e biagudiamu bona e hahisidiamu.

10 Na itaia danu, kara dika taudia na e guridia; gunaguna-idia na gabu helaḡana ai e raka vareai e raka lasi, bona hanua lalonai e imodaidia edh kara daidiai. Ina danu asi anina. 11 Kara dika davadia na asie heni haraḡamu dainai, taunimanima natudia lalodia ese kara dika e ura heni badamu. 12 Ena be kara dika tauna na nega sinahu-ta e kara dikamu bona ena mauri e hadaudauamu, to lau dibagu Dirava garina e garimu taudia na bae namo, badina be ia vairanai e garimu. 13 A kara dika tauna basine namo; ena mauri basine hadaudaua laulau na heto; badina be ia na Dirava vairanai se garimu.

14 Kara ta tanobada ai na asi anina: kara namo taudia haida na kara dika taudia ahudia heḡereḡeredia ai e abimu, bona kara dika taudia haida na kara namo taudia ahudia heḡereḡeredia ai e abimu. Lau nato una danu asi anina. 15 Moale na hanamoamu, badina be taunimanima na asi ena ḡau namona ta dina henunai; a baine aniani, baine inuinu bona baine moale; badina be unu ese ena hekwarahi ai bae bamoa, ena mauri dinadia Dirava ese dina henunai baine henia lalodiai.

16 Lalogu na hadaia, aonega baina diba, bona tanobada ai e karaiamu ḡaukarana baina itaia; e kara boimu e kara ranimu, matadia asie mahutamu. 17 Bena Dirava ena kara idoinai na itaia, dina henunai e karamu ḡaukaradia anidia na taunimanima ese basine davaridia diba. Ena be itahudia ai baine hekwarahi bada, to basine davaridia; ena be aonega tauna baineto mai dibana, to basine davaridia diba.