1 Umui ese kara havara bona kara dika lalodiai o maseva; 2 gunaguna ina tanobada ena kara o karava, guba padana siahuna lohiana o badinaiava, laumana bunai gwau-edeede memerodia lalodia ai e ḡaukaramu.

3 Ai iboumai ai danu, gunaguna idia ida a nohova, tau-anina ena ura a karava; tau-animai edia ura bona lalomai edia ura a badinava, bena ahumai korikorina na badu, taunimanima oredia heḡereḡeredia. 4 A hebogahisi-bada Diravana ese, e ura henimai lalo-dika dainai, 5 kara havara ai a mase taumai na Keriso ida e hamaurimai. Umui danu harihari-bada ese e hamaurimuimu.

6 Ia ida vada e hatoreda isi, ia ida danu guba ai vada e hahelaida, Keriso Iesu lalonai. 7 Vairada negadia ai danu ena harihari-bada bona ena gado namo ita edai baine hedinarai, Keriso Iesu lalonai.

8 Badina be harihari-bada ese vada e hamaurimui, abidadama dainai; dia sibomui ese, a Dirava ena harihari-bada ese; 9 bona dia ḡaukara daidiai, tau ta baine heaḡi na garina. 10 Badina be ita na ia imana ai e karada tauda, Keriso Iesu lalonai vada e havarada, ḡaukara namodia ikaradia totona: ḡaukara namodia bunu Dirava ese vada e heḡaeḡaelai, ita ese baita kara.

11 Taunabunai, ba helalo: umui na gunaguna idau bese taumui; peritome taudia na tau-anidia vada e ivadia dainai “asi peritome taumui” e gwauraimuiva. 12 Una negana ai umui bona Keriso na mai padamui; umui bona Israel besena danu mai padamui; herohemaino gwauhamatadia na asi dibamui; asi emui helaro bona asi emui Dirava tanobada ai. 13 A gunaguna dauhai o nohova taumui na harihari Keriso Iesu lalonai vada o kahikahimu; Keriso rarana ese vada e harakamui kahi. 14 Badina be ia na eda maino; ia ese bese ruaosi vada e hatamonada; e hapararada maḡuna vada e raḡaia. 15 Ia tau-anina ai ia ese taravatu ena hahedua iboudiai vada e ha-ore, beseda ruaosi amo matamatana ta baine havaraia, bona maillo baine haginia, 16 bona ena satauro dainai ruaosi Dirava enai baine hatamonada, helaoreana. Eda heinai-heheni ia ese satauro dorina ai e ha-orea.

17 Benaini, ia ema, maino e harorolaia, umui dauhai o nohomu taumui emui, bona gabu kahikahidia ai e nohomu taudia edia. 18 Ia dainai umui bona ai na Tamada dekenai baita raka vareai diba, Lauma tamona lalonai. 19 Taunabunai, umui na harihari dia idau bese taumui, dia noho-hedoahedoa taumui; umui na helaḡa taudia ida hanua tamona taumui; umui na Dirava ena ruma taumui. 20 Aposetolo taudia bona peroveta taudia latadiai vada e hadaimui, ruma na heto; ruma daigunina nadina na Iesu Keriso sibona. 21 Ia latanai ruma idoinai e larebaia daemu, dubu helaḡana ai bainela, Lohiabada lalonai. 22 Ia latanai danu umui e larebamui heboumu, Dirava ena ruma ai baola, Lauma lalonai.