1 Ahasuero ena nega ai, (una Ahasuero na basileia sinahu-ta ruahui-hitu e lohiadia, India amo ela bona Etiopia), 2 unu dinadia ai King Ahasuero na ena pavapava teronona ai e helaiva, hanua badana ladana Susa ai. 3 Bena ena Iohia laḡanina ihatoina ai, ia ese aria ta e karaia, ena Iohia taudia bona ena hesiai taudia iboudiai, bona Parasa bona Media tuari lohiadia, bona basileia lohiadia bona ikwaradia taudia, adia. 4 Una negana ai ia ese ena basileia herea-daena taḡadia bona ena siahu hairaina bada-herea e haheitalaidia, dina momo lalodiai; unu dina iboudiai na sinahu-ta taurahani-ahui. 5 Unu dina vada e ore murinai, hanua pavapavana ese aria ta ma e karaia, hanua badana Susa lalonai e nohova taudia kikina-badana iboudiai adia. Una aria na hanua pavapavana ena ruma uma-umana maḡuna lalonai e dabaraia, ela bona dina hitu e ore. 6 Seseahu dabuadia kurokurodia bona vaiundia na e taudia dae, bona varo aukadia bona varo kakakakadia amo silver ikekedia ai bona nadi hururu-hururu au-tubuadia ai e matadia kau. Helai ḡaudia na gold bona silver amo e kara, bona reireina na nadi hururu-hururudia kakakakadia bona kurokurodia amo e karaia, bona mairi bona dava-bada nadidia amo e haheraia. 7 Inuinu ḡaudia na gold keheredia ai e sei bona e diu henidia; unu kehere na idau-idau; bona vine ranuna momo, pavapava e inumu ḡauna, hanua pavapavana ena harihari-bada heḡereḡerena. 8 I'inuna na taravatu heḡereḡerena, ta asie haduaia baine inu; badina be hanua pavapavana ese ena ruma ireḡuna taudia iboudiai vada e haḡanidia, eto ta ta ena ura ena ura heḡereḡeredia bae kara. 9 Queen Vasati danu aria ta e karaia, hahine adia, King Ahasuero ena ruma ai.

10 Dina ihahituna ai hanua pavapavana lalona e moaleva, vine ranuna e inuava dainai, bena ia ese Mehumana bona Bisita bona Harabona bona Bigita bona Abagata bona Setara bona Karakasa, King Ahasuero ena ruma irefiuna taudia hahituosi, na e haḡanidia, 11 idia ese Queen Vasati na bae hakaua vareai hanua pavapavana vairanai, mai ena havava ḡauna kwarana ai, hanua taudia bona hanua hanua lohiadia na ia hairaina baine haheitalaidia totona; badina be ia na hane namo, mai hairaina. 12 A Queen Vasati e gwau edeede; hanua pavapavana ena haheḡani hari ruma ireḡuna taudia ese e mailaia na ibadinana se ura. Una dainai, hanua pavapavana lalona e siahu, e badu ḡaraḡara.

13 Bena hanua pavapavana ese aonega taudia, nega mai dibadia taudia, na e hereva henidia. (Hanua pavapavana na vaia ena kara unu e kara tomava, taravatu bona hahemaoro mai dibadia taudia ediai. 14 Ia badinai e giniva taudia be Karasena bona Setara bona Adamata bona Tarasisi bona Merese bona Marasena bona Memukana, Parasa bona Media lohiadia hahituosi; idia na nega idoinai hanua pavapavana vairana e itaiava, bona helai gabudia hereadia ai e helaiva una basileia lalonai.) 15 Ia na eto, Taravatu ai ede e torea tomamu, Queen Vasati ede baita kara henia toma? Badina be ia ese King Ahasuero ena haheḡani, ena ruma ireḡuna taudia ududia amo e siaia, na se badinaia.

16 Bena Memukana na hanua pavapavana bona hanua hanua lohiadia vairadiai e hereva, eto, Queen Vasati vada e kerere, dia hanua pavapavana mo enai, to lohia iboudiai bona taunimanima iboudiai ediai, King Ahasuero ena basileia iboudiai lalodiai. 17 Badina be ina hanua pavapavana adavana ena kara na hahine iboudiai ese sivaraina bae kamonai, bena idia ese adavadia basie matauraidia; badina be idia na baeto “King Ahasuero na e hahedua, Queen Vasati na ia vairanai bae hakaua mai, to sema”. 18 Hari ina dina ai, hanua pavapavana adavana ena kara sivaraina vada e kamonai dainai, Parasa bona Media lohiadia adavadia ese hanua pavapavana ena lohia iboudiai ediai bae herevalaia, bena hemarai bona badu na bae bada herea. 19 Bema hanua pavapavana lalona baine heḡereḡere, pavapava haheduana ta na iena amo bainela, Parasa taudia bona Media taudia edia taravatu ai baine hetore, bena ta ese basine ha-idaua diba. Hahedua na iniheto: Vasati na King Ahasuero vairanai ma basine raka vareai lou; a hanua pavapavana ese ena dagi na hahine ta, ia e hereaiamu hahinena, baine henia. 20 Taunabunai, hanua pavapavana ena haheḡani herevana na ena basileia bada-hereana idoinai bae piua, bena hahine iboudiai, lohia hahinedia bona hanua hahinedia, ese adavadia bae matauraidia.

21 Ina hahealo herevana na hanua pavapavana bona hanua hanua lohiadia ese e moalelaia; bena hanua pavapavana na Memukana ena lalo-hadai heḡereḡerena ai e kara. 22 Ia ese revareva e siaidia, e lohiadia basileiadia iboudiai ediai, basileia ta ta edia revareva daladia amo, bona bese ta ta edia gado ai, tatau ta ta ena ruma ena ruma bae biagudia, bona edia bese herevadia korikoridia bae gwaurai.