1 Taunabunai, hanua pavapavana bona Hamana na e raka vareai, Queen Eseta ida bae aniani hebou totona. 2 Dina iharuana ai, idia na vine ranuna e inuva ai, hanua pavapavana ese Eseta ma e nanadaia lou, eto, Queen Eseta e, emu noinoi be dahaka? Do baina henimu. Emu ura ḡauna be dahaka? Ena be egu basileia kahana ba gwauraia, to bavabia vaitani. 3 Bena Queen Eseta e haere, eto, Pavapava e, bema o lalo namo henigumu bona lalomu na bema heḡereḡere, egu noinoi dainai egu mauri ba henigu, bona egu ura dainai egu bese ba hamauria. 4 Badina be vada e hoimai, lau bona egu bese taudia, bae habuamai tari, bae alamai mase, bona bae ha-oremai vaitani totona. Bema hoimai, hesiai taudia bona hesiai hahinedia ai bema halaomai, lau na basinama hereva; badina be ai emai hisihisi na ḡau maraḡina, a hanua pavapavana imamu bema pari be ḡau badana, basita haheḡereḡeredia diba. 5 Bena King Ahasuero ese Queen Eseta e nanadaia, eto, Tauna na daika ina kara baine karaia e tomu? Ia be edeseni ai? 6 Bena Eseta e haere, eto, Daḡedaḡe tauna, inai tauna, ina tau dikana Hamana. Bena Hamana na e gari dikadika, hanua pavapavana mai adavana ida vairadiai. 7 Bena hanua pavapavana na aniani gabuna amo e tore isi mai baduna ida, e raka lasi, ena ruma uma-umana ai. A Hamana na e noho, Queen Eseta enai ena mauri baine noia eto; badina be lalona vada e parara, hanua pavapavana ese ia ihadikana baine gwauraia. 8 Bena hanua pavapavana na ena ruma uma-umana amo e lou, vine ranuna e inuva gabuna ai ma e raka vareai; una negana ai Hamana na Eseta ena ege-diho patana ai vada e goru diho. Bena hanua pavapavana eto, Egu ruma ai bona vairagu ai adavagu baine eno henia a? Hanua pavapavana na dounu e hereva ai, idia ese Hamana vairana e ḡovaia ahu.

9 Bena Harabona, hanua pavapavana isiaina e lao heniva tauna ta, eto, Ina danu, Hamana ena tau-dae auna, Morodekai, ena hereva amo hanua pavapavana e hamauria tauna, imatana totona e heḡaeḡaelaia ḡauna, na ena ruma ai gini; ena lata na kiubit imahui. 10 Bena hanua pavapavana eto, Una ḡau ai a mataia. Taunabunai idia ese Hamana e mataia, ia ese Morodekai imatalaina e heḡaeḡaelaia ḡauna dorina ai. Bena hanua pavapavana ena badu vada e keru.