1 Una murinai Mose bona Aaron ela Farao dekenai, e hereva henia, eto, Iehova, Israel emai Dirava, ini e gwau tomamu: Egu bese taudia ba kahudia nege, idia ese agu aria bae karaia, tano ḡaḡaena ai. 2 A Farao eto, Iehova be daika? Ia erena baina kamonai, Israel taudia baina kahudia nege, badina be dehaka? Iehova na asi dibagu; Israel taudia danu basina kahudia nege. 3 Raruosi eto, Heberu taumai emai Dirava na dekemai ai vada ema; mani emu kara dina toi tano ḡaḡaena ai baia raka lao, emai Dirava, Iehova, baia boua, dai-hanai gorerena amo eiava dare amo baine alamai mase na garina. 4 Bena Aigupto pavapavana ese e haere henidia, eto, Mose bona Aaron, dahaka dainai emui orea taudia na edia ḡaukara amo ba hakaudia siri? Aola, emui ḡaukara ba lou henia. 5 Farao ma eto, Momokani, ina tano taudia vada e hutuma e laomu, a umui na ḡaukara ai o rudiamu.

6 Una dina ai Farao ese ḡaukara biagudia bona heitatao taudia e haḡanidia, eto, 7 Ḡaukara taudia na uit momona, raro ida e buloamu ḡauna, na basio henidia lou, dina iboudiai vada o henidiamu heḡereḡerena; ina murinai idia na sibodia bae ha gogoa. 8 Ḡau tamona, raro amo e kara nadidia e karamu na basie gadoi, ahudia korikoridia do bae kara; badina be idia na lalahedo, una dainai idia na e tai henigumu, e tomu “Mani ba kahumai nege, emai Dirava baia boua”. 9 Edia ḡaukara ba hametaua: bae ḡaukara goada, koikoi herevadia basie hakala heni.

10 Taunabunai ḡaukara biagudia bona heitatao taudia e raka lasi, Heberu taudia e hamaorodia, eto, Farao na e tomu “Uit momona basina hunimui lou; 11 vada baola, sibomui uit momona ba ha tahua; ḡau tamona, emui ḡaukara ahuna basine maraḡi”. 12 Taunabunai, iboudiai e karoho rohoroho, Aigupto tanona idoinai uit momodia eha gogo. 13 A ḡaukara biagudia e gwaugwau, eto, Dina ta ta ahudia ba haḡuḡuru, gunaguna uit momona a henimui negadia ai heḡereḡerena. 14 Bena idia ese Israel edia heitatao taudia, hari Farao ena ḡaukara biagudia ese e badinadia taudia, na e dadabadia, a gwau henidia, eto, Dahuka dainai hari dina ai emui ḡaukara ahuna korikorina asio haḡuḡurua?

15 Bena Israel edia heitatao taudia na Farao dekena ela, e tai henia, eto, Dahaka dainai emu hesiai taudia ini o karamai tomamu? 16 Uit momona asie henimai, to e hamaoromaimu, e tomu “Raro amo e kara nadidia a kara”. E dadabamai danu. A kerere be oiemu orea taudia edia kerere. 17 A ia na e haere, eto, Umui na lahedo taumui, lahedo dikadika taumui; una dainai umui na o tomu “A kahumai nege, Iehova baia boua”. 18 Vada aola, emui ḡaukara a lou henia: uit momona na basie henimui, to emui ḡaukara ahuna korikorina do ba haḡuḡurua.

19 Israel taudia edia heitatao taudia vada e diba idia na ihadikadia totona e haduadia, eto “Dina ta ta ai emui ḡaukara ahuna na basine maraḡi”. 20 Bena Farao ena amo e raka lasi ai idia na Mose bona Aaron ida e hedavari, raruosi ese e naridiava. 21 Bena idia ese raruosi e gwau henidia, eto, Iehova ese baine he-geremui bona baine hahemaoro henimui; badina be Farao bona ena hesiai taudia vairadiai ladamai vada o hadika, e kara ialalaimai darena imadia ai vada o atoa na heto.

22 Bena Mose ese Iehova e lou henia, eto, Ḡaubada e, dahaka dainai ina bese taudia vada o hadikadia? Dahaka dainai o siaigu? 23 Badina be Farao dekena nama, emu hereva na hamaorolaia; una negana ema bona hari ia ese ina bese taudia vada e hadikadia, bona oi ese so hamauridiamu.