1 Iehova ena hereva na egu ai e kau, eto: 2 Taunimanima natuna e, henanadai hepuina ba gwauraia, bona hereva heḡereḡerena ta na Israel besena ba gwaurai henia. 3 Baoto, Ḡaubada Iehova na ini e gwau tomamu: Ugava badana ta mai hanina badadia bona hape latadia, huina oromadia danu idau-idau, na Lebanon ema, sida auna ta dorina e bitua. 4 Ia ese dorina rigirigina e bitua kwaidu, hoihoi tanona e laohaia, hoihoi taudia edia hanua lalonai e hadoa. 5 Bena tano uhena e abia, tano namona ai e hadoa, ranu momo gabuna ai. E hadoa arabimi*Arabimi na sinavai isena ai e varamu auna ta ladana. rigirigina na heto, 6 bena ia na e tubu, vine auna ai ela, e raga rohoroho; bena gavena na ia e tubu henia, a ramuna na ena gini gabuna ai e mia. Taunabunai, ia na vine auna ai ela, gavena e tubu bona rauna e urumo-urumo.

7 A ugava ma ta ema; hanina na babada, bona huina na momo. A itaia, hari vine ramuna ese ia e hata hema bona gavena danu e tubu henia, baine hapariparidia totona. Bena e hadoa tanona amo 8 ma e hadoa hanai, tano namona ai, ranu momo gabuna ai, gavena bae tubu bona hu huana bae dobi bona vine auna herea-daena ai bainela totona. 9 Baoto, Ḡaubada Iehova na ini e gwau tomamu; Baine tubu namonamo a? Ramuna basine raḡadia bona gavena basine utudia, rauna matamatadia iboudiai bae marai totona, a? Dia ima mai goadana mo, eiava taunimanima hutuma mo, bae heḡereḡere ramuna amo bae raḡaia, ani? 10 A itaia, bae hadoa hanai negana ai, baine tubu namonamo a? Laurabada baine toa henia negana ai, ia na basine marai a? E tubu gabuna ai baine marai ani?

11 Bena Iehova ena hereva na egu ai e kau, eto, 12 Harihari ene daḡedaḡe besena taudia ba hamaorodia, baoto: Ini ḡau anidia na asi dibamui a? Bena ba hamaorodia, baoto, A itaia, Babulono pavapavana na Ierusalem ela, hanua pavapavana bona lohiana verina Babulono e hakaudia mai. 13 Bena ia ese hanua pavapavana natuna maruanena ta e abia, ia taravana e atua, bona gwauhamata helaḡana henunai e hanohoa. (Tano lohiadia na ia ese vada e abidia oho, 14 basileia na baine manau, basine hekokoroku, bona iena taravatu ibadinana ai baine gini helaorearia.) 15 A ia ese e daḡedaḡe henia, gwaukau taudia na Aigupto e siaidia lao, idia ese hosi haida bona tuari oreana badana ta bae henia helaoreana. Baine kwalimu a? Kara unuhetomadia e karamu tauna na baine roho mauri diba a? Taravatu baine tataia utu, bena baine roho mauri diba a? 16 Ḡaubada Iehova na e tomu: Lau na maurimu heḡereḡerena, momokani hanua pavapavana ta ese tau ta na pavapava tauna ai e halaoa, bena una pavapava ai e halaoa tauna ese dagi na e henia tauna ena gwauhamata helaḡana e dadaraia, bona e atua taravatuna e tataia utu; benaini, una tau na dagina e henia pavapavana ena noho gabuna ai baine mase, oibe, Babulono ai baine mase. 17 Farao bona ena tuari oreana mai goadana bona ena orea badana idoinai ese basie durua tuari ai, hutuma iala-masedia totona tano bae larebaia bona hanua bae magua heḡeḡe negana ai. 18 Badina be gwauhamata helaḡana e dadaraia bona taravatu e tataia utu, bona imana e dudui heni to ini kara iboudiai e kara, dainai ia na basine roho mauri. 19 Taunabunai, Ḡaubada Iehova na ini e gwau tomamu: Lau na maurimu heḡereḡerena, momokani egu gwauhamata helaḡana, e dadaraia ḡauna, bona egu taravatu, e tataia utu ḡauna, davadia na ia tubuana ai baina kara. 20 Egu huo baina otoa, ia iabina, bona egu idoa ai baina idoaia; bena Babulono baina laohaia, unuseni ai baina hahemaoro henia, ena koikoi karadia egu ai e kara na baina hahemaorolai. 21 Ena abi-hidi tuari taudia na dare ai bae mase, bona roho-mauri taudia na lai kahadia iboudiai bae pere rohoroho; bena ba diba, lau Iehova vada na hereva.

22 Ḡaubada Iehova na ini e gwau tomamu: Lau sibogu ese sida auna dorina amo rigirigi ta baina abia, bena baina hadoa; dorina rigirigidia ediai manoka-manokana ta baina gadaia oho, bena lau sibogu ese baina hadoa, ororo bada-hereana bona lata-hereana dorina ai. 23 Israel ororona dorina ai baina hadoa, rigina bae tubu bona huahuana bae dobi bona sida auna herea-daena ai bainela totona; bena ia henunai mauri ḡaudia idau-idau bae noho; bona ia rigina ikerukerudia ai manu idau-idau ese edia ruma bae kara. 24 Bena tano paka audia iboudiai na bae diba lau Iehova ese au latana na hakwadogiamu bona au kwadogina na halataiamu, au maurina na hakakoroamu bona au masena na hatubuamu. Lau Iehova vada na hereva, bona karana baina karaia.