1 Iehova ena hereva na egu ai e kau, eto, 2 Taunimanima natuna e, hahine rarua e nohova, hahine tamona natuna. 3 Idia ese ariara karadia e karava, Aigupto ai; ulatodia ai ariara karadia e karava. Unuseni ai tatau haida ese kemedia e rosidia; bona ulato rami-heboudia ai ratadia e ḡiḡidia. 4 Hane guna ladana na Ohola; ia tadina ladana na Oholiba. Lau ese na adavadia; bena idia ese natudia mamaruanedia bona hahinedia e havaradia. Ladadia anidia na iniheto: Ohola na Samaria, bona Oholiba na Ierusalem.

5 Ohola na lau adavagu negana ai, ia ese ariara karadia e karava; e ura heniava taudia, Asuria taudia, na e mata dika henidiava. 6 Idia na tuari taudia, dabua kakakakadia e hahedokilaiva; idia na hekwara taudia bona tuari lohiadia; iboudiai na eregabe taudia namo-hereadia, hosi ai e guiva taudia. 7 Ia ese e kara lebulebu henidia; iboudiai na Asuria taudia ḡoeva-daedia; bona e mata dika henidia taudia iboudiai edia kaivakuku iboudiai ediai e hahemiro. 8 Ena ariara karadia, Aigupto ai e nohova dinadia amo vada e kara, na se hadokodia; badina be ulatona ai tatau na ia ida e eno bou, bona ulato rami-hebouna ai idia ese ratana e ḡiḡidia; bona e kara lebulebu henia. 9 Taunabunai, e ura heniava taudia, hari Asuria taudia, ia ese e mata dika henidia taudia, imadia ai na atoa. 10 Idia ese ena geda e hamiroa; ia natuna mamaruanedia bona hahinedia na e dabaidia tao, a ia be dare amo e alaia mase; hahemaoro na ia latanai vada e haḡuḡurua negana ai, ia na gwaurai-gwaurai herevana ai ela hahine bogaragidiai.

11 Ina kara na ia tadina Oholiba ese e itaia, ḡau tamona ia ese kakana e hereaia, ena mata dika ai bona ena ariara karadia ai; unu kara ai kakana na dika, a ia be dika herea. 12 Ia ese Asuria taudia e mata dika henidia; hekwara taudia bona tuari lohiadia, edia auri dabuadia e hahedokilaiva taudia, edia hosi ai e guiva taudia, iboudiai na eregabe taudia namo-hereadia. 13 Bena na itaia, vada e miro vaitani; idia raruosi na dala tamona ai vada e raka. 14 A ia ese ena ariara karadia ma e habada; ia ese tatau laulaudia haba ai e raraidia, Kaldea taudia laulaudia, muramura kakakakana amo vada e tore ḡaudia, 15 mai edia gaba ḡaudia koekoedia ai bona edia kwara dabuadia kwaradia ai, iboudiai ita-itadia na lohia taudia, Kaldea taudia, Babulono tanona ai e nohomu taudia, laulaudia. 16 E itadia negana ai na e mata dika henidia; bena gwaukau taudia na dekedia e siaidia lao Kaldea ai. 17 Bena Babulono taudia na ia dekena ela, ia ida e eno bou, ela bona edia lebulebu karadia amo e hamiroa. E hamiroa murinai, ia ese e rakatanidia mai hedadaraina ida. 18 Ena ariara karadia e kara hedinarai bona tau-anina e heaḡilaia negana ai na na rakatania mai hedadaraigu ida, kakana na rakatania heḡereḡerena. 19 To, ia ese ena ariara karadia e habada, hane-ulatona negana e laloa tao; una negana ai ia ese ariara karadia e karava Aigupto tanona ai; 20 unuseni ai ia e ura heniava taudia, taudia reḡedia na doniki reḡedia na heheto bona natudia na hosi natudia na heheto taudia, na ia ese e mata dika henidia. 21 Unuheto hane-ulato ai Aigupto taudia ese kememu e rosia bona ratamu e ḡiḡi negana ai lebulebu karadia o karava na oi ese o lalodia tao, mai lalo-hekisehekisemu ida.

22 Taunabunai, Oholiba e, Ḡaubada Iehova na ini e gwau tomamu: A itaia, e ura henimumu taudia, mai hedadaraimu ida o rakatanidia taudia, na baina hatoredia isi, kaha iboudiai amo baina haboudia, oi ihadikamu totona: 23 Babulono taudia bona Kaldea taudia iboudiai, Pekodo bona Soa bona Koa taudia, bona Asuria taudia iboudiai idia ida, iboudiai na eregabe taudia namo-hereadia bona hekwara taudia bona tuari biagudia, lohia taudia bona tuari taudia, iboudiai danu hosi gui taudia. 24 Idia na oi ihadikamu totona mirigini kahana amo baema, mai edia kariota bona edia rerue bona edia orea taudia hutuma ida. Idia ese bae koumu heḡeḡe, mai edia keme auridia bona edia kesi bona edia kwara ḡaudia, bona siahu baina henidia bae hanemaoro, bena edia hahemaoro herevadia amo bae hahemaoro henimu. 25 Bena egu badu na baina siai henimu, edia badu ḡaraḡara ai bae kara henimu totona. Idia ese udu-baubaumu bona taiamu bae utudia oho, bona emu roho-mauri taudia na dare ai bae mase. Idia ese natumu mamaruanedia bona hahinedia bae dabaidia tao, bona emu roho mauri taudia na lahi ese baine aradia ore. 26 Idia ese danu emu dabua bae hadokidia oho, bona emu herahera nadidia namo-hereadia bae abidia oho. 27 Unuhetomana lau ese emu lebulebu bona emu ariara karadia, Aigupto amo o mailai, na baina hadokodia; una dainai, Aigupto taudia na basio gaga dae henidia lou, bona basio lalodia tao lou. 28 Badina be Ḡaubada Iehova na ini e gwau tomamu: A itaia, lau ese o inai henidiamu taudia, mai hedadaraimu ida o rakatanidia taudia, imadia ai baina atomu; 29 bena daḡedaḡe ai bae kara henimu, emu hekwarahi anina idoinai bae abia oho, gagaemu ai bae rakatanimu, bena emu ariara karadia anidia korikori bae hedinarai. Emu lebulebu bona emu ariara karadia ese 30 ina kara na latamu ai vada e hadihoa, badina be bese idau-idau ida ariara karadia o kara, bona edia kaivakuku ediai o hahemiro. 31 Kakamu ena dala ai vada o raka; taunabunai iena kehere na oi imamu ai baina atoa. 32 Ḡaubada Iehova na ini e gwau tomamu:

36 Iehova ese e hamaorogu, eto, Taunimanima natuna e, Ohola bona Oholiba ba hahemaoro henidia a? Benaini, edia kara dika-rohorohodia ba gwaurai henidia. 37 Badina be idia na vada e heuda hanai, bona rara na imadia ai; edia kaivakuku ida vada e heuda hanai; bona natudia mamaruanedia, lauegu amo e abidia memerodia, na boubou karana ai idia e henidia, adia. 38 Ina danu vada e kara henigu: dina tamona ai egu gabu helaḡana bona egu dina helaḡadia vada e hamirodia. 39 Badina be natudia e aladia mase, edia kaivakuku iboulaidia ḡaudia ai e halaodia, dinana lalonai idia ese egu gabu helaḡana lalonai e didi vareai, bae hamiroa totona. A itaia, egu dubu ai unu e kara toma. 40 Idia ese danu gwaukau tauna ta e siaia lao, dauha amo tatau haida baema; bena vada ema. Idia daidiai o digu, matamu o ouda, bona taumu o haheraia; 41 ege-diho patana namo-hereana ai o helai; ia vairanai pata ta o atoa, bona egu muramura mai bonana bona egu dehoro na pata latanai o atodia. 42 Hutuma edia moale reḡedia na taiana ai; bona gunika taudia na tano ḡaḡaena amo e hakaudia mai, kekero taudia; bena vaḡivaḡi na hahine imadia ai e atodia, bona havava ḡaudia mai hairaidia na kwaradia e havavalaidia.

43 Bena lau nato, Tatau na ia ida e eno boumu negadia ai, idia na asie heuda hanaimu a? 44 Badina be idia na ia dekenai vada e raka vareai, haida ese ariara hahinena dekenai e raka vareaimu na heto. Ohola bona Oholiba dekediai unu e raka vareai toma, bae kara lebulebu totona. 45 A ka a maoromaoro taudia ese bae hahemaoro henidia, heuda-hanai hahinedia bona rara ihahebubuna hahinedia davadia bae henidia; badina be idia na heudahanai hahinedia, bona rara na imadia ai.

46 Badina be Ḡaubada Iehova na ini e gwau tomamu: Tuari oreana ba hakaua mai, gari ihavarana ḡauna ai bona dadidadi ḡauna ai ba halaodia. 47 Bena hari tuari oreana taudia ese nadi amo bae hododia bona edia date amo bae aladia mase; natudia mamaruanedia bona hahinedia danu bae aladia mase, bona edia ruma bae doudia. 48 Unu amo lebulebu karadia na tano ai baina hadokodia, hahine ese nahuadia bae toho totona, bena lebulebu karadia basie kara, umui vada o kara heḡereḡeredia. 49 Bena emui lebulebu davana do bavabia, bona emui kara dika ai kaivakuku o toma henidia diho na davadia bavabi; bena vada ba diba lau na Ḡaubada Iehova.