1 Laḡani ihagwauta-tana lalonai, hua dinana gini-gunana ai, Iehova ena hereva na egu ai e kau, eto, 2 Taunimanima natuna e, badina be Turo ese Ierusalem e herevalaia, eto “Aha, taunimanima edia ikoukou vada e makohi, egu ai vada e hekeho; ia vada e vahu dainai lau baina namo lou”; 3 una dainai Ḡaubada Iehova na ini e gwau tomamu: Turo e, a itaia, lau ese na inai henimumu. Bese momo baina mailaidia oi ihadikamu, davara ese hurehurena na e mailaidiamu na heto. 4 Idia ese Turo maḡudia bae ḡiḡidia dobi, bena kohorodia bae haheḡiḡidia tari, bena lau ese tanona baina tahia oho, nadina mo baine kikiri. 5 Ia na davara bogaraginai baine mia, reke itoredia gabuna ai bainela. Lau, Ḡaubada Iehova, vada na hereva. Bena ia na bese idau-idau damudia ai bainela; 6 bona ia natuna hahinedia tanobada ai na dare ese baine aladia mase. Bena bae diba lau na Iehova.

7 Badina be Ḡaubada Iehova na ini e gwau tomamu: A itaia, mirigini kahana amo Nebukadresara, Babulono pavapavana, pavapava edia pavapava, mai ena hosi bona ena kariota bona ena hosi-gui taudia bona ena tuari taudia hutuma herea ida, baina mailaidia, Turo latanai. 8 Ia ese natumu hahinedia tanobada ai na dare amo baine aladia mase. Ia ese maḡu ta amo baine koumu heḡeḡe, bona tano baine larebaia bona kesi momo bae duduidia isi oi ihadikamu. 9 Ena vaḡoma amo maḡumu baine hamakohidia, bona ena ira amo kohoromu baine hagaridia. 10 Ena hosi bae hutuma herea dainai, aedia kahudia ese bae govamu. Ia na ikoukoumu amo baine raka vareai, ta ese maḡuna e hamaurua hanuana ai bema raka vareai heḡereḡerena; una negana ai hosi-gui taudia bona rerue bona kariota reḡedia ese maḡumu bae haheude-heudedia. 11 Ena hosi aedia amo ia ese ariaramu iboudiai baine moimoilaidia; emu taunimanima iboudiai ia ese baine aladia mase, emu au-tubua auka-hereadia na tano ai bae moru. 12 Idia ese emui taḡa na bae dadidia oho, bona emui hoihoi kohudia na damudia ai bae halaodia; maḡumu bae gigi dobi, bona emui ruma namo-hereadia bae habuadia tari; emui nadi bona emui au bona emui uma tanodia na davara lalonai bae negedia dobi. 13 Emui ane reḡedia baina hadoko; emui gitara reḡedia na basie hekamonai lou. 14 Nadi kikiri ai baina halaomu; reke itoredia gabuna ai ba hahelao; nega ta ai basie haginimu lou; badina be lau Iehova vada na hereva. Ḡaubada Iehova na e herevamu.

15 Ḡaubada Iehova ese Turo na ini e hereva henia tomamu: Ba moru negana ai na bae bero taudia bae ganaḡana, bona ala-ala na baine bada bogaragimu ai; una negana ai kone tanodia na basie heude-heude a? 16 Bena davara lohiadia iboudiai na edia terono amo bae diho, edia hahedoki badadia bae atodia tabe bona edia hahedoki mai heraheradia bae dokidia oho. Mai heude-heudedia ida edia dabua bae hahedokilai; tano ai bae helai; nega idoinai bae heude-heude bona oi daimu ai bae gari. 17 Bena oi latamu ai bae rohe ahu, bae hamaoromu, baeto:

19 Badina be Ḡaubada Iehova na ini e gwau tomamu: Hanua ahutuna ai baina halaomu, asie noholaidiamu hanuadia heḡereḡeredia, bona gadobada ai baina hamutumu bena ranu badadia ese bae habubunimu; 20 una negana ai baina dorimu dobi, Guri Badana ai e dihomu taudia ida, sene taudia dekediai; bona tanobada henuna gabuna ai baina hanohomu, idau nega ai e heḡiḡi dobi hanuadia bogaragidiai, Guri Badana ai e dihomu taudia ida. Taunabunai, ta ese basine noholaimu, bona mauri taudia edia tano ai basio mia. 21 Dala dika-rohorohona amo baina hadokomu, bena ba puki oho; ena be bae tahumu, to nega ta ai basie davarimu lou. Ḡaubada Iehova na e herevamu.