48
Iduhu ladadia bini. Mirigini kahana hetoana na davara amo baine hematama, Hetelono amo bainela ela bona Hamat raka-vareaina, ela bona Hasara-enono (una na Damasko mirigini kahana hetoana, Hamat hevaira-hehenina ai), laurabada kahana amo ela bona lahara kahana: una na Dan ahuna, ahu ta. Dan ena tano ohena ai, laurabada kahana ela bona lahara kahana, Asere ahuna, ahu ta. Asere ena tano ohena ai, laurabada kahana ela bona lahara kahana, Napatali ahuna, ahu ta. Napatali ena tano ohena ai, laurabada kahana ela bona lahara kahana, Manase ahuna, ahu ta. Manase ena tano ohena ai, laurabada kahana ela bona lahara kahana, Efraim ahuna, ahu ta. Efraim ena tano ohena ai, laurabada kahana ela bona lahara kahana, Ruben ahuna, ahu ta. Ruben ena tano ohena ai, laurabada kahana ela bona lahara kahana, Iuda ahuna, ahu ta.
Iuda ena tano ohena ai, laurabada kahana ela bona lahara kahana, tano ta ba gwauraia hidi. Ena lababa na kiubit gerebu-rua daha-ima, ena lata na unu iduhu ahudia ta heḡereḡerena, laurabada kahana ela bona lahara kahana; ia bogaraginai na gabu helaḡana. Iehova ena ba gwauraia hidi tanona ena lata na kiubit gerebu-rua daha-ima, bona ena lababa na kiubit gerebu-rua. 10 Tano helaḡana inogodia bini: hahelaḡa taudia edia inogo ena lata na kiubit gerebu-rua daha-ima murigini kahana ai, ena lababa na kiubit gerebu-ta lahara kahana ai bona kiubit gerebu-ta laurabada kahana ai, bona ena lata na kiubit gerebu-rua daha-ima diho kahana ai. Iehova en: gabu helaḡana na ia bogaraginai. 11 Una na vada e hahelaḡadia taudia, Sadok vevena, edia; idia ese egu hahedua e badinadiava, bona Israel taudia e raka siri negana ai idia na asie raka siri, hari Levi taudia e raka siri na heto. 12 Idia ahudia korikorina ai bainela, tano helaḡana lalonai, gabu helaḡa-hereana ai bainela, Levi taudia edia tano ohena ai. 13 Hahelaḡa taudia edia tano ohena ai, Levi taudia ese edia inogo bae abia; ena lata na kiubit gerebu-rua daha-ima bona ena lababa na kiubit gerebu-ta. Latana idoinai na kiubit gerebu-rua daha-ima, bona lababana idoinai na kiubit gerebu-rua. 14 Taina basie hoia, eiava basie hebodohilaia. Ina ahu namohereana tanona na haida basie henidia, badina be ia na helaḡa, Iehova ena.
15 Orena miana, ena lababa na kiubit daha-ima bona ena lata na kiubit gerebu-rua daha-ima, na hanua ena, ruma bona gabiruma tanodia. Ilanua badana na bogaraginai baine gini. 16 Ena bada be iniheto: mirigini kahana, kiubit daha-hani sinahu-ima; diho kahana, kiubit daha-hani sinahu-ima; laurabada kahana, kiubit daha-hani sinahu-ima, bona lahara kahana, kiubit daha-hani sinahu-ima. 17 Hanua ena gabiruma tanona danu baine mia: mirigini kahana ai, kiubit sinahu-rua imahui; diho kahana ai, kiubit sinahu-rua imahui; laurabada kahana ai, kiubit sinahu-rua imahui; bona lahara kahana ai, kiubit sinahu-rua imahui. 18 Orena miana ena lata tano helaḡana ohena ai na kiubit gerebu-ta laurabada kahana ai bona kiubit gerebu-ta lahara kahana ai, tano helaḡana ohena ai. Una tano huahuana na hanua ena ḡaukara taudia adia aniani. 19 Hanua ena ḡaukara taudia, Israel iduhudia iboudiai amo, ese bae biru henia. 20 Ba gwauraia hidi, tano idoinai ena lata bona ena lababa bae heḡereḡere, kiubit gerebu-rua daha-ima; una na tano helaḡana bona hanua tanona.
21 Tano orena, tano helaḡana bona hanua tanona ohena ohena ai, na hanua pavapavana ena. Tano helaḡana ena kiubit gerebu-rua daha-ima amo ela bona laurabada kahana hetoana, bona lahara kahana ai hari kiubit gerebu-rua daha-ima amo ela bona lahara kahana hetoana, na hanua pavapavana ena tano. Una tano bona iduhu ta ta ahudia padadia na basie maraḡi bona basie bada edia lata idoinai. Tano helaḡana bona dubu helaḡana ia bogaraginai danu, 22 bona Levi taudia edia tano bona hanua tanona, na hanua pavapavana ena tano bogaraginai bae mia. Hanua pavapavana ahuna na Iuda ena tano bona Beniamina ena tano padadiai baine mia.
23 Iduhu oredia na iniheto: laurabada kahana amo ela bona lahara kahana, Beniamina ahuna, ahu ta. 24 Beniamina ena tano ohena ai, laurabada kahana amo ela bona lahara kahana, Simeon ahuna, ahu ta. 25 Simeon ena tano ohena ai, laurabada kahana amo ela bona lahara kahana, Isakara ahuna, ahu ta. 26 Isakara ena tano ohena ai, laurabada kahana amo ela bona lahara kahana, Sebulun ahuna, ahu ta. 27 Sebulun ena tano ohena ai, laurabada kahana amo ela bona lahara kahana, Gad ahuna, ahu ta. 28 Gad ena tano ohena ai, diho kahana ai, hetoa na Tamara amo bainela, ela bona Meribatakade ranu gabudia bena Aigupto Dokana amo bainela, ela bona Davara Badana. 29 Tanona bunai ba haria, Israel iduhudia ahudia ba henidia; ahudia ta ta bunu. Ḡaubada Iehova na e herevamu.
Hanua ikoukouna bona ladana
30 Hanua lalona amo bae raka lasi gabudia bini: Mirigini kahana ai (ena lata na kiubit daha-hani sinahu-ima), 31 ikoukou toi bae mia, Ruben ena ikoukou, Iuda ena ikoukou, bona Levi ena ikoukou. Hanua ikoukoudia na Israel iduhudia ladadia bae nemaidia. 32 Laurabada kahana ai (ia danu ena lata na kiubit daha-hani sinahu-ima), ikoukou toi bae mia, Iosef ena ikoukou, Beniamina ena ikoukou, bona Dan ena ikoukou. 33 Diho kahana ai (ia danu ena lata na kiubit daha-hani sinahu-ima), ikoukou toi bae mia, Simeon ena ikoukou, Isakara ena ikoukou, bona Sebulun ena ikoukou. 34 Lahara kahana ai (ia danu ena lata na kiubit daha-hani sinahu-ima) ikoukou toi bae mia, Gad ena ikoukou, Asere ena ikoukou, bona Napatali ena ikoukou. 35 Hanua na bae hahetohoa heḡeḡe na kiubit gerebu-ta daha-taurahani. Bona una negana amo hanua ladana bae hatoa “Iehova ena noho gabuna”.