1 Kurese, Parasa pavapavana, ena lohia laḡanina gini-gunana ai, Iehova ena hereva Ieremia uduna amo e gwauraia na anina baine vara totona Iehova ese Kurese, Parasa pavapavana, e rohea; bena ia ese haheḡani ta e gwauraia ena basileia idoinai laionai, bona e torea danu.

2 Haheḡani na binai. Kurese, Parasa pavapavana, na ini e gwau tomamu: Iehova, guba Diravana, ese tanobada basileiadia iboudiai vada e henigu, bona vada e haḡanigu ena dubu auta baina haginia Ierusalem ai, Iuda tanona ai. 3 Daika daika umui bogaragimui ai na iena bese tauna, Iehova, ia ena Dirava, ese baine bamoa. Ia na Ierusalem, Iuda tanona ai, baine dae lao, Iehova, Israel Diravana, ena dubu baine haginia lou. Ia na Ierusalem ai e nohomu Diravana. 4 Bona edena gabu edena gabu ai doini e noho hedoamu taudia ta ta na unu e nohomu gabudia taudia ese bae durudia, silver bona gold bona kohu bona ubu-ubu ḡaudia bae henidia, bona lalo-namo herahiadia danu, Dirava ena dubu Ierusalem ai ena.

5 Bena Iuda bona Beniamina iduhu kwaradia na e tore isi, bona hahelaḡa taudia bona Levi taudia danu, Dirava ese vada e rohedia taudia iboudiai, Iehova ena dubu Ierusalem ai bae haginia lou totona; 6 bona dekedia taudia iboudiai ese silver ḡaudia bona gold bona kohu bona ubu-ubu ḡaudia bona dava-bada ḡaudia na e henidia, mai edia lalo-namo herahiadia iboudiai ida. 7 Hanua pavapavana Kurese ese danu Iehova ena dubu kohudia, Nebukadnesara ese Ierusalem amo e laohai bona ena dirava edia dubu ai e ato ḡaudia, na e abidia lasi. 8 Kurese, Parasa pavapavana, ese e abidia lasi, moni inarina tauna Mitredata imana ai e atodia; bena una tau ese e hagaudia, Iuda lohiana Sesebasara e henia. 9 Ihagaudia bini: gold naudia toi-ahui, silver naudia daha-ta, kaia ruahui taurahani-ta, 10 gold kibokibodia toi-ahui, silver kibokibodia idaudia sinahu-hani gwauta, bona ma ḡau idau-idau daha-ta danu. 11 Gold bona silver ḡaudia iboudiai na daha-ima sinahu-hani. Ini iboudiai na Sesebasara ese e daelaidia, e laohaidia idau gabu ai e hanohodia taudia na Babulono amo Ierusalem e hakaudia dae lao negana ai.