1 Aneru raruosi na Sodoma ai e kau, dina kerekerena ai. Lot na hanua ikoukouna ai e helai, bena e itadia negana ai na vairadiai e heau, tano ai e goru diho, 2 eto, Egu lohia e, lau, emui hesiai tauna, egu ruma ai mani a dae kau, ba noho rani, aemui danu ba huri; bena daba ai ba tore isi, emui dala ai ba raka. Idia eto, Lasi; hanua ariarana ai baia noho rani. 3 To e noidia goadagoada, bena idia na ia ida e dae kau, ena ruma ai e raka vareai. Bena ia ese aniani e nadua, bona flaoa kavakava, se hatubua ḡauna, e gabua, e dabara, bena raruosi e ani. 4 Idia na do asie hekure ai, hanua taudia kikina-badana, hari Sodoma taudia, hanua kahadia iboudiai amo e heau bou heau bou ela, ruma na e ginia hegege. 5 Bena idia ese Lot e boi henia, eto, Hari hanuaboi emu ruma ai e dae kau taudia be edeseni ai? Ba hakaudia lasi; baia dibadia. 6 Bena Lot na iduara amo e raka lasi bona iduara e koua ia murinai; 7 bena e hamaorodia, eto, Tadikakagu e, ina kara dikana basio karaia. 8 A itaia, natugu raruosi nonoho, ulato rami-hebou: mani aina hakaudia lasi emui ura heḡereḡerena ba kara henidia. A ini raruosi basio hadikadia, badina be egu guhi metaina ai e nohomu. 9 A idia eto. A gini siri. Ma eto, Ina tau sibona ema, bogaragidai e noho hedoamu: matona. baine hahemaoro henida e tomu. Harihari idia baia hadikadia maraḡi, a oi baia hadikamu bada. Bena idia ese Lot e doria siri, iduara bae taraia patapata eto. 10 To unu raruosi na ruma lalona amo imadia e toi roro, Lot e veria vareai, bena iduara e koua ahu. 11 A ariara ai e gini hebouva taudia kikina-badana na matadia e hakepuludia; bena iduara e tahua malakamalaka ela bona e hesiku.

12 Bena hari raruosi ese Lot e nanadaia, eto, Varavaramu iboudiai bini eiava? Bema ravamu eiava natumu mamaruanedia eiava natumu hahinedia haida ina hanua ai nonoho, ina gabu amo ba hakaudia lasi. 13 Badina be ina gabu baia habuaia tari, badina be haridia dika-hereadia na Iehova enai vada e kau, taunabunai Iehova ese vada e siaimai, baia habuaia tari. 14 Bena Lot e raka lasi, ela, ravana, ia natuna hahinedia haida adavadia, e hereva henidia, eto, A tore tore isi, ina gabu aita rakatania, badina be Iehova ese ina hanua baine habuaia tari. To ravana banava ia e hevaseha henidia eto.

15 Daba e rere, bena hari aneru ese Lot e haduaia goadagoada, eto, A tore isi haraḡa-haraḡa, adavamu bona natumu ulatodia raruosi bini avabidia, baola; ina hanua ihabua-tarina ai oi danu ba mase na garina. 16 E halahe, bena raruosi ese ia imana bona adavana imana bona natuna ulatodia raruosi imadia e abi, hanua murimurinai e hakaudia lasi; badina be Iehova ese e bogaia hisi. 17 E hakaudia lasi, bena eto, Ba heau mauri, basio roha muri, taora ai basio halahe. Ororo ba heau lao, ba mase na garina. 18 Bena Lot ese e noidia, eto, Egu lohia e, dia unuheto. 19 Mani a itagu, emui hesiai tauna; vada o harihari henigu bona vada o bogagu hisi bona vada o hamaurigu. A lau na asi goadagu ororo baina heau henidia, hahedika ese baine ḡavagu tao, bena baina mase. 20 A una hanua na kahirakahira, baina heau henia diba; ia danu hanua maraḡina mo. Mani emui kara unu bainala. Ia na hanua maraḡina ani? Bena mauri baina davaria. 21 Bena Iehova eto, Emu noinoi tamona binai ma na abia daemu; hari o noilaiamu hanuana na basina habuaia tari. 22 Ba lao henia haraḡa; badina be ḡau ta basina karaia diba ela bona oi na unuseni ai ba kau. Una dainai una hanua ladana e hatoa Soara.*“Soara” anina be “Maragi”.

23 Dina e taolara ai Lot na Soara ai e kau. 24 Bena Iehova ese nadi siahudia bona lahi na guba amo e hadiho, Sodoma bona Gomora latadiai. 25 Unu hanua ruaosi, bona una taora idoinai, bona hanua taudia, bona taora ai e vara ḡaudia, ibouboudiai ia ese a habuadia tari. 26 A Lot adavana e roha muri, bena ia na damena nadina ai e hahelao. 27 Una daba ai Abraham e tore isi, Iehova ida e hereva-hereva gabuna e raka henia; 28 e roha lao, Sodoma bona Gomora bona taora idoinai e ita, una tano idoinai ai kwalahu e daeva, amu kwalahuna na heto.

29 Unuhetomana, taora hanuadia e habua tari negana ai, Dirava ese Abraham e laloa, bona Lot e hamauria, e noho kau heni hanuadia e habua tari negana ai.

30 Bena Lot na Soara e rakatania, ororo e dara dae, unuseni ai e nohova, natuna ulatodia raruosi ida; badina be Soara ai baine noho na garina e gariva. Ia mai natuna ulatodia raruosi ida kohua ta ai e nohova. 31 Bena hane guna ese tadina e hamaoroa, eto, Tamada e burukamu, bona asi tauna ta tanobada ai baine adavada tanobada ena kara heḡereḡerena. 32 Aitala, tamada na vine ranuna amo baita hakekeroa, bena ia ida baita eno bou, tamada ena amo natuda baita abidia. 33 Bena una hanuaboi vine ranuna amo tamadia e hakekeroa, bena hane guna na ia ida e eno bou; a ia be ena hekure negana bona ena toreisi negana asi dibana. 34 Daba ai, hane guna ese tadina e hamaoroa, eto, Boi hanuaboi lau na tamagu ida na eno bou; hari hanuaboi ma baita hakekeroa lou, bena oi danu ia ida ba eno bou; bena ita raruosi na tamada ena amo natuda baita abidia. 35 Bena una hanuaboi danu idia ese tamadia e hakekeroa; bena hane muritai na ia ida e eno bou; a ia be ena hekure negana bona ena tore isi negana asi dibana. 36 Taunabunai Lot natuna ulatodia raruosi na tamadia ese e harogorogodia. 37 Bena hane guna na mero ta e abia, ladana e hatoa Moab; Moab besena taudia iboudiai ema bona harihari senedia na ia. 38 Hane muritai danu mero ta e abia, ladana e hatoa Ben-ami; Amono besena taudia iboudiai ema bona harihari senedia na ia.