9
Israel ena gwau-edeede davana
1 Israel e, basio moale,
basio hisi dae, bese idau-idau taudia na heheto;
badina be ariara karadia vada o kara,
emu Dirava vada o rakatania.
Ariara karana davana vada o ura henia,
uit ikwadilaina gabudia iboudiai reireidia latadiai.
2 Uit ikwadilaina gabuna bona vine itaolaina gurina ese basie ubudia,
bona vine-ranuna matamatana ai bae dabu.
3 Idia na Iehova ena tano ai basie noho;
a Efraim taudia ese Aigupto tanona bae lou henia,
bona idia ese aniani mai taravatudia bae ani Asuria ai.
4 Iehova uduna ahuna vine-ranuna basie bubua,
bona edia boubou karadia amo basie hamoalea.
Adia aniani na mase itailaina taudia adia heḡereḡerena ai bainela,
bae ania taudia iboudiai na bae miro;
badina be adia aniani na boga helaoreana mo,
Iehova ena dubu ai basie vareailaia.
5 E gwauraia guna ariana dinana ai ede ba kara toma?
Iehova ena aria dinana ai ede ba kara toma?
6 Badina be, a itaia, idia na Asuria e laomu;
Aigupto ese baine haheboudia,
Memefisi ese baine guridia.
Ava hegarana ese edia silver ḡaudia herea-daedia bae habubunidia,
au ginigini na edia kalaga ai bae vara.
7 Mata-hakani dinadia vada e kau,
dava-abi dinadia vada e gini dae;
Israel ese baine dibaia.
Peroveta tauna na kavakava,
bona lauma ese e roheamu tauna na kava,
emu kara havara bada-herea
bona emu daḡedaḡe bada-herea daidiai.
8 Peroveta tauna na Efraim, egu Dirava ena bese, igimana tauna,
ḡau tamona, manu-tahu tauna ena idoa na ena dala iboudiai lalodiai,
bona daḡedaḡe na ena Dirava ena dubu ai.
9 Idia na sibodia vada e hahemiro herea,
Gibea*Gibea dinadia. Hahemaoro Taudia, Karoa 19, lalonai Gibea sivaraina e torea. dinadia heḡereḡeredia ai.
Edia kara havara baine lalodia tao,
edia kara dika davadia baine henidia.
10 Vine huahuadia tano ḡaḡaena ai na heheto,
Israel unu na davaria toma.
Suke au huahuana roboana, ena huahua laḡanina gini-gunana ai,
senemui unu na itadia toma.
A idia na Baal-peoro ela,
sibodia e hahelaḡa Baal enai;
bena vada e dika rohoroho,
e ura henia ḡauna heḡereḡerena.
11 Efraim hairaina na baine roho oho, manu na heto;
ta basine vara, ta basine rogorogo,
ta basine haherogorogo.
12 Ena be natudia haida bae havaradia,
to lau ese mase ai baina abidia oho,
ela bona ta basine noho.
Lau ese baina rakatanidia negana ai,
idia na bae baia.
13 Efraim natuna vada na itadia, idia na damu ai baela;
Efraim ese natuna baine hakaudia lasi, ala-ala enai.
14 Iehova e, ḡau ta ba henidia.
Dahaka ba henidia?
Mara-dika bogana bona rata asi anidia,
unu na ba henidia.
15 Edia dika iboudiai na Gilgal ai,
unuseni ai na inai henidia matama.
Edia kara na dika rohoroho dainai,
lau ese egu ruma amo baina luludia lasi;
ina murinai basina ura henidia lou;
edia lohia iboudiai na mai dagedagedia.
16 Efraim taudia na vada e rahudia mase,
ramudia vada e marai, huahuadia basie dobi.
Ena be natudia bae havaradia,
to lau ese edia lalokau memerodia baina aladia mase.
17 Egu Dirava ese baine negedia daure,
badina be idia ese asie kamonai henia;
idia na bese idau-idau bogaragidiai
bae loa kava loa kava.