1 Efraim taudia ese Gideon e nanadaia, eto, Ede vada o karamai toma? Dahaka dainai Midian taudia o tuari henidia negana ai so boirimai? Idia ese e gwau henia dikadika. 2 Bena ia ese e hereva henidia, eto, Lauegu kara na oiemu kara ida ede baita hahegereḡeredia toma? Efraim ena vine momorudia ihaboudia be Abiesere ena taboro idoinai e hereaiamu ani? 3 Dirava ese Midian pavapavadia Oreb bona Sebe na umui imamui ai vada e atodia. Lau be dahaka na karaia oiemu kara heḡereḡerena? Unu e hereva toma, bena idia lalodia e keru, bona edia badu e doko.

4 Gideon na Ioridane sinavaina isena ai e kau, bena e hanaia, ia bona ena orea taudia sinahu-toi ia ida. Idia na taudia e manori, to dounu e gava. 5 Bena ia ese Sukoto taudia e noidia, eto, Mani emu kara egu orea taudia na aniani ba henidia, badina be taudia vada e manori, bona Midian pavapavadia Sebaha bona Salmuna na ḡavadiamu. 6 A Sukoto lohiadia eto, Be, Sebaha bona Salmuna vada o abidia mauri, una dainai ai ese emu tuari taudia baia ubudia a? 7 Gideon eto, Matona, Iehova ese Sebaha bona Salmuna na imagu ai baine atodia negana ai, lau ese au ginigini tano ḡaḡaena amo baina abi, bona ava ḡinigini danu, bena unu amo baina dadabamui.

8 Unu amo ma e dara dae, Penuel ela, hereva heḡereḡerena e noilaidia; bena Penuel taudia ese e haere henia, Sukoto taudia ese vada e haere henia heḡereḡerena. 9 Bena ia ese Penuel taudia e hamaorodia, eto, Maino ai ma baina lou mai negana ai, ina kohoro baina ḡiḡia dobi.

10 Hari Sebaha bona Salmuna na Karakoro ai e nohova, mai edia tuari oreadia ida. Idia na tatau gerebu-ta daha-ima*Gerebu-ta daha-ima = 15,000. Domaga-ta gerebu-rua = 120,000. sisivana, mairiveina kahana taudia edia tuari oreana amo e roho mauri taudia. A dare e abi taudia domaga-ta gerebu-rua vada e mase. 11 Bena Gideon na Noba bona logobeha mairiveina kahana ai e taruhava taudia edia dala amo ela, una tuari oreana e tuari henia, asie hegimava negana ai. 12 Sebaha bona Salmuna na e heau; bena Gideon ese e hahavadia. Ia ese Midian pavapavadia raruosi, Sebaha bona Salmuna, e abidia mauri; a edia tuari oreadia e hakarohodia.

13 Bena Gideon loasa na tuari amo e lou, Here ororona amo. 14 Bena ia ese Sukoto tau-eregabena ta e dabaia tao, e nanadaia. Han eregabe tauna ese Sukoto Iohiadia bona tau-badadia ladadia e tore, iboudiai na tatau hitu-ahui hitu. 15 Sukoto taudia dekediai e kau, bena e hereva henidia, eto, Sebaha bona Salmuna a itadia. Umui ese o hevaseha henigu, oto “Sebaha bona Salmuna vada o abidia mauri, una dainai emu orea taudia na edia manori ai baia ubudia a?” 16 Bena ia ese hanua tau-badadia e abidia, au ginigini, tano ḡaḡaena ḡaudia, bona ava ḡiniḡini, amo e dadabadia. 17 Penuel kohorona danu e ḡiḡia dobi, bona hanua taudia e aladia mase.

18 Bena ia ese Sebaha bona Salmuna e nanadaidia, eto, Taboro ororona ai o aladia mase taudia na edeseni ai? Idia na e haere, eto, Idia iboudiai na oi ida-idamu, oromadia na pavapava natuna na heheto. 19 Gideon eto, Idia na lau tadigu, lau sinagu natuna; Iehova e maurimu heḡereḡerena, boma hamauridia lau ese basinama alamui mase. 20 Bena ia ese natuna roboana letere e hamaoroa, eto, A tore isi, avaladia mase. A tauhau na ena dare se veria lasi; ia na e gari, badina be ia na dounu tauhau mo. 21 Bena Sebaha bona Salmuna eto, Oi sibomu a tore isi, avalamai mase; tau ta be ena goada heḡereḡerena ai baine kara. Bena Gideon e tore isi, Sebaha bona Salmuna e aladia mase. Bena edia kamelo aiodia iheralaidia mairidia e abi.

22 Bena Israel taudia ese Gideon e hereva henia, eto, Ba halohiamai: oi bona natumu bona tubumu danu bae halohiamai; badina be Midian taudia imadia amo vada o hamaurimai. 23 A Gideon na e haere henidia, eto, Lau ese basina halohiamui, natugu danu basine halohiamui; Iehova ese baine halohiamui. 24 Gideon ma e hereva henidia, eto, Mani emui kara egu noinoi binai: umui ta ta ese gold gadeidia tuari ai o abi vada ba henigu. (Taiadia na mai gadeidia, hadina be idia na Ismael taudia). 25 Idia na e haere, eto, Baia henimu mai moalemai ida. Bena dabua ta e lahaia, iboudiai ese tuari ai e abidia gadeidia na dabua ai e taho dobi. 26 Hari gold gadeidia, ia ese e noilai ḡaudia, edia metau idoinai be sekele†Sekele 1700 = 28 kilograms sisivana. daha-ta sinahu-hitu. Ma ḡau haida be mairi bona ageva bona dabua kakakakadia, Midian pavapavadia edia hahedoki ḡaudia, bona edia kamelo aiodia ḡaudia danu. 27 Bena Gideon na una dabua e abia, hahedoki helaḡana ta e karaia, ena hanua, Ofra, lalonai e taua dae. Bena Israel taudia iboudiai ese una ḡau e toma henia diho; unu amo ia na hekwakwanai ḡauna ai ela, Gideon bona ena ruma taudia ediai.

28 Taunabunai, Midian vada e darere, Israel taudia vairadiai; idia na asie gaga isi lou. Bena tano na vada e maino, laḡani hariahui lalodiai, Gideon ena mauri dinadia ai.

29 Ierubu-baal Ioasa na e lou ela, ena ruma ai e nohova. 30 Hari Gideon natuna mamaruanedia na hitu-ahui, ia natuna korikoridia, natu-adoradia; badina be adavana na momo. 31 Ma hahine ta Sekem ai danu e adavaia, iena amo danu mero ta e abia, ladana e hatoa Abimelek.

32 Gideon loasa e buruka herea, bena e mase. Tamana loasa ena gara ai e guria, Ofra ai: Abiesere taudia edia hanua bunai.

33 Gideon e mase murinai, asi vanahana Israel taudia ma e raka muri, Kanaan taudia edia dirava e toma henidia diho; bona ta, ladana na Baalberiti, e abia, edia dirava ai e halaoa. 34 Israel taudia ese Iehova, edia Dirava, inaidia e koudia heḡeḡe taudia imadia amo e hamauridia Diravana, na asie laloa tao; 35 bona Ierubu-baal (una na Gideon) ena ruma taudia asie hanamodia, ia ese Israel e hanamoa davana asie kara.