1 Nega iharuana Iehova ena hereva na Ieremia enai e kau, ia na dounu hegima taudia edia maḡu ai e hekou ahu negana ai. 2 Iehova, tanobada e karaia bona baine gini tutuka-tutuka totona oromana e henia Diravana (ia ladana na Iehova) ini e gwau tomamu: 3 Ba boi henigu, bena baina haere henimu, bona ḡau badadia, hehuni ḡaudia, do asi dibamu ḡaudia, na baina hamaorolaimu. 4 Badina be Iehova, Israel Diravana, ese ina hanua rumadia bona Iuda pavapavadia edia ruma, e larebadia tanodia bona dare ilao-ahudia totona e ḡiḡidia dobi rumadia, na ini e herevalaidia tomamu: 5 Kaldea taudia na e aru e maimu, bae tuari henidia, bona egu badu bona egu lalo-siahu ai baina rahudh mase taudia tau-anidia masedia amo bae hahonudia; badina be lau ese vairagu na ina hanua amo vada na hunia, edia kara dikadia iboudiai daidiai. 6 A itaia, lau ese goada bona tauhalo baina henia; baina hanamodia, bona noho-namo bona noho-maino na baina hahedinarai henidia badabada. 7 Iuda bona Israel edia noho-namo ma baina henidia lou, bona baina haginidia lou, e gini gunava heḡereḡerena. 8 E kara dika henigu dikana mirona idoinai amo baina haḡoevadia, bona edia kara dika bona edia gwau-edeede egu ai mirona idoinai na baina gwaua tao. 9 Bena ina hanua na egu ai lada mai moalena, heimodai ḡauna bona hairai ḡauna ai bainela, tanobada besedia iboudiai vairadiai. Idia ese kara namo iboudiai, lau ese na kara henidiamu karadia, sivaraidia bae kamonai; idia na bae gari, taudia bae heude-heude, kara namo iboudiai bona noho-namo idoinai ina hanua baina karalai henia dainai.

10 Iehova ini e gwau tomamu: Ina gabu, o herevalaiamu o tomu “Ia na vada e vahu, asi tauna ta eiava asi ubu-ubu ḡauna ta” gabuna ai, bona Iuda hanuadia ai bona Ierusalem ariaradia ai, idia danu vada e vahu, asi tauna ta eiava asi inoholaina ta eiava asi ubu-ubu ḡauna ta, unuseni ai 11 kiri gadona bona moale gadona, headava matamata tauna gadona bona headava matamata hahinena gadona, bae kamonaidia lou; bona ane-abi taudia gadodia danu. Idia ese hahenamo boubouna ḡaudia na Iehova ena dubu ai bae mailaidia, baeto,

12 Iehova Sabaota ini e gwau tomamu: Ina gabu ḡaḡaena, asi tauna ta eiava asi ubu-ubu ḡauna ta gabuna, lalonai, bona hanuana iboudiai lalodiai, mamoe ireḡudia taudia, edia mamoe e halaḡa-anidiamu taudia, edia noho gabudia ma bae hekara lou. 13 Ororo kahadia hanuadia ai bona taora hanuadia ai bona diho kahana hanuadia ai, bona Beniamina tanona ai bona Ierusalem hetabirana gabudia ai, bona Iuda hanuadia ai, mamoe seridia na iduahidia tauna imana henudia amo bae raka hanai. Iehova na e herevamu.

14 Iehova na e tomu: A itaia, negana be maimu, lau ese Israel iduhuna bona Iuda iduhuna na henidia gwauhamatana baina hamomokania. 15 Unu dinadia ai bona una nega ai, lau ese Rigi ta, kara maoromaoro ḡauna, na baina hatubua, David ena; bena ia ese hahemaoro ḡoevaḡoeva bona kara maoromaoro baine kara ina tano ai. 16 Unu dinadia ai Iuda na baine mauri, bona Ierusalem baine noho namonamo. Bona ladana na ini bae hatoa toma: “Iehova na eda kara maoromaoro”.

17 Badina be Iehova ini e gwau tomamu: David iduhuna amo nega ta ai Israel ena bese teronona ihelai-kauna taudia ta ai basine dabu, 18 bona hahelaḡa taudia Levi oreana amo nega ta lau vairagu ai ḡole-oho bouboudia ihahelaḡadia bona flaoa bouboudia igabudia bona boubou karadia ikaradia taudia ta ai basie dabu, ela bona hanaihanai.

19 Iehova ena hereva na Ieremia enai e kau, eto, 20 Iehova ini e gwau tomamu: Egu haheḡani dina enai eiava hanuaboi enai boma utua diba, bena dina bona hanuaboi na edia nega korikoridia ai basiema hedinarai, 21 bena egu gwauhamata egu hesiai tauna David enai danu ba utua diba, bena garana ta basine vara ena terono ihelai-kauna; bona egu gwauhamata hahelaḡa taudia Levi oreana amo, egu hesiai taudia, ediai danu ba utua diba. 22 Guba hisiudia na asi iduahidia bona kone miridia na asi ihahetohodia na heto, egu hesiai tauna David garana bona hahelaḡa taudia Levi oreana amo garadia unu baina hahutumadia toma.

23 Iehova ena hereva na Ieremia enai ma e kau, eto, 24 Ini taunimanima edia hereva so kamonai, eto “Iehova ese e abidia hidi iduhudia ruaosi vada e dadaraidia”, a? Unuheto, idia ese egu bese taudia vada e dadaraidia, bena harihari idia na dia bese ta idia vairadiai. 25 Iehova ini e gwau tomamu: Egu haheḡani dina bona hanuaboi ediai basinama haginia bona guba bona tanobada taravatudia danu, 26 bena lau ese Iakob bona egu hesiai tauna David garadia baina dadaraidia, bona ia garana ta basina abia hidi, Abraham bona Isaak bona Iakob vevedia ilohiadia. Badina be edia noho-namo baina havara henidia lou, bona baina bogadia hisi.