1 Tuari oreadia biagudia bona Iohanan Karea bona Asaria Hosaia, bona taunimanima iboudiai, asi dagidia bona mai dagi-badadia taudia, na e raka kahira, 2 peroveta tauna Ieremia e hereva henia, eto, Emai noinoi bavabia dae; bona Iehova, emu Dirava, ba noia, ini kwabukwabumai daimai ai, badina be ai na orea badana taumai to, o itamaimu, gadoimai mo e rakatanimai. 3 Iehova, emu Dirava, ese baia rakalaia dalana bona baia karaia karana na baine hadibalaimai.

4 Peroveta tauna Ieremia ese e haere henidia, eto, Emui hereva vada na kamonai; a itaia, lau ese Iehova, emui Dirava, baina ḡuria, emui noinoi heḡereḡerena, bena Iehova na ede baine haere toma, una na baina hamaorolaimui; ḡau ta emui ai basina hunia. 5 Bena idia ese Ieremia e hamaoroa, eto, Bema Iehova, emu Dirava, ese ai daimai ai baine henimu herevana idoinai heḡereḡerena ai basia karaia, Iehova ese baine habadelaimai mai maoromaorona bona mai momokanina ida. 6 Bema hereva namona eiava hereva dikana, to ai ese Iehova, eda Dirava, dekena a siaimumu Diravana, gadona baia badinaia, Iehova, eda Dirava, gadona ibadinana ai baia namo helaoreana.

7 Dina gwauta e ore ai Iehova ena hereva na Ieremia enai e kau. 8 Bena ia ese Iohanan Karea bona tuari oreadia biagudia iboudiai, ia ida e nohova taudia, bona taunimanima iboudiai, asi dagidia bona mai dagibadadia taudia, na e boiridia, e hereva henidia, 9 eto, Iehova, Israel Diravana, dekena o siaigu, daimui ai baina noia totona, Diravana, na ini e gwau tomamu: 10 Ina tano ai boma noho, bena lau ese baina haginimui, basina gigimui dobi; baina hadomui, basina ragamui oho; badina be na hadikalaimui karana na helalo kerehailaiamu. 11 Babulono pavapavana, o gari heniamu tauna, na garina basio gari. Iehova na e tomu, Basio gari henia, badina be lau na umui ida, baina hamaurimui bona ia imana amo baina harohomui mauri totona. 12 Lau ese baina bogamui hisi; unu amo ia ese danu baine bogamui hisi, bona emui tano korikori ai baine hanohomui. 13 A boma toma “Ina tano ai basia noho”; Iehova, emui Dirava, boma gwau edeede henia, 14 boma toma “Lasi, Aigupto tanona baiala, unuseni ai tuari basia itaia, bona kibi reḡena basia kamonai, bona basia hitolo, bena unuseni ai baia noho”; 15 Iuda kwabukwabumui e, Iehova ena hereva ba kamonai. Iehova Sabaota, Israel Diravana, na ini e gwau tomamu: Lalomui boma ha-auka Aigupto ai boma raka vareai bona unuseni ai boma noho, 16 bena o garilaiamu darena ese unuseni ai, Aigupto tanona ai, baina lasimui tao, bona o garilaiamu doena ese baine gavamui havara-havara ela bona Aigupto; bena unuseni ai ba mase. 17 Lalodia bae ha-auka Aigupto baela unuseni ai bae noho taudia iboudiai na dare eiava doe eiava dai-hanai gorerena amo bae mase; asi kwabukwabuna, asi tauna ta, na lau ese latadiai baina hadihoa dikana amo baine roho mauri.

18 Badina be Iehova Sabaota, Israel Diravana, na ini e gwau tomamu: Egu badu bona egu badu-garagara na Ierusalem inoholaina taudia latadiai na bubu dobi heḡereḡerena ai, egu badu-garaḡara na umui latamui ai danu baina bubua dobi, Aigupto baola negana ai. Heihi-ihirai, hahegari, heuduguirai, hegonaḡonalai ḡaudia ai baola. Ina gabu na ma basio itaia lou. 19 Iehova ese vada e hamaoromui, eto, Iuda kwabukwabumui e, Aigupto basiola. Ba diba momokani, hari ina dina ai vada na sisiba henimui, 20 vada o raka siri davana na emui mauri. Badina be o siaigu, Iehova, emui Dirava, dekenai, oto “Iehova, eda Dirava, ba fiuria ai daimai ai, bena Iehova, eda Dirava, ede baine gwau toma na ba hamaoromai, bena baia karaia”. 21 Bena hari dina ai vada na gwaurai henimui, to e siaigu baina hamaorolaimui ḡauna ta ai Iehova, emui Dirava, gadona asio badinaia. 22 Taunabunai, ba diba momokani, ilao-henina bona inoholaina o uramu gabuna ai dare eiava doe eiava dai-hanai gorerena amo vada ba mase.