1 Unu ḡau muridiai Iuda taudia ese edia aria ta e karaia, bena Iesu na Ierusalem eha dara dare.

2 Ierusalem ai digu gohuna ta be mamoe ikoukouna badinai; Heberu gadodia ai ladana be Betesata. Hakerukeru rumadia auima unuseni ai. 3 Vaevae unuseni ai gorere taudia hutuma e hekureva, matakepulu, ae-hedairiki, ima-heveri ae-heveri taudia; idia ese ranu ilohina e nariava. 4 Badina be aneru ta vaia e diho loulouva, una gohu e haraivaiava; bena ranu iharaivana murinai e turu dae guna tauna ena gorere vada e namova. Gorere idauidau unu e namo tomava.

5 Siko ese e karaia tauna ta unuseni ai, ena gorere laḡanidia be toi-ahui taurahani. 6 Bena Iesu ese hekurena ai e itaia, bona dibana nega daudau unu vada e hekure tomava; bena e nanadaia, eto, Oi mauri o uramu a? 7 Gorere tauna ese e haere henia, eto, Lohiabada e, ranu e halohilohiamu negadia ai, lau na asi iato-dobigu; gohu na raka heniamu ai ta e gunamu. 8 Iesu ese e haduaia, eto, A tore isi, emu geda a lokua, a raka. 9 Bena tauna e goada haraḡa-haraḡa, e tore isi, ena geda e lokua, e raka matama.

Una dina be Dina Helaḡa. 10 Taunabunai, Iuda taudia ese hari e hamauria tauna e gwau henia, eto, Ina na Dina Helaḡa; emu geda o abia loaloamu na mai taravatuna. 11 Ia e haere, eto, E hamaurigu tauna ese e haduagu, eto “Emu geda a lokua, a raka”. 12 Bena idia ese e nanadaia, eto, Daika ese e hamaoromu, eto “Emu geda a lokua, a raka”? 13 A e hamauria tauna na asi dibana daika ese e hamauria; badina be Iesu vada e raka oho, bona taunimanima hutuma una gabu ai e hebouva.

14 Gabeamo Iesu ese una tau e davaria Dubu Helaḡa lalonai, bena e sisiba henia, eto, E, oi na vada ome mauri; basio kara dika lou, dika bada-hereana ta ese baine butumu tao na garina. 15 Bena hari tau na ela, Iuda taudia e hamaorodia, e hamauria tauna na Iesu. 16 Una dainai Iuda taudia ese Iesu e daḡedaḡe henia, badina be ia na Dina Helaḡa ai unu e kara toma. 17 Iesu ese e haere henidia, eto, Tamagu na e ḡaukaramu ema bona hari; lau danu na ḡaukaramu. 18 Una hereva dainai Iuda taudia ese iala-masena urana e urava, badina be Dina Helaḡa e hadikaia; bona dia una mo, ia danu ma e tomava Dirava be ia Tamana korikori, ia bona Dirava na heheḡereḡere.

19 Taunabunai, Iesu ese e haere henidia, eto, Momokani vaitani na hamaoromuimu, Natuna na sibona ḡau ta ikarana asi dibana, a Tamana ena kara baine ita karadia mo baine kara. Tamana e karamu ḡaudia idoidiai Natuna danu baine kara. 20 Badina be Tamana ese Natuna e lalokau heniamu, bona ena kara iboudiai e hahedinarai heniamu: bona ini e hereamu karadia danu baine hahedinarai henia, ba hoa helaoreana. 21 Badina be Tamana ese mase taudia e hatoredia isunu bona e hamauridiamu heḡereḡerena Natuna ese danu taunimanima vada e hamauridiamu, ena ura heḡereḡerena ai. 22 Tamana ese tau ta se hahemaoro heniamu; a hahemaoro siahuna idoinai Natuna vada e henia: 23 taunabunai taunimanima iboudiai ese Natuna bae matauraia, Tamana e matauraiamu heḡereḡerena. Natuna se matauraiamu tauna ese Tamana, Natuna e siaia Diravana, danu se matauraiamu. 24 Momokani vaitani na hamaoromuimu, egu hereva e kamonaimu, bona e siaigu Diravana e abidadama heniamu, tauna ese mauri hanaihanai vada eme abia: ia na hahemaoro ai basine vareai, badina be mase vada e rakatania, mauri ai vada e kau.

25 Momokani vaitani na hamaoromuimu, nega ta vada be maimu, harihari be kaumu, mase taudia ese Dirava Natuna gadona bae kamonaia, bena bae kamonai taudia vada bae mauri. 26 Badina be Tamana lalonai mauri e miamu heḡereḡerena Natuna danu unu e henia tomamu, ia lalonai danu mauri baine mia. 27 Bona siahu danu vada e henia, baine hahemaoro, badina be ia na Taunimanima Natuna.

28 Ina na basio hoalaia. Badina be nega ta be maimu, gara ai e nohomu taudia iboudiai ese ia gadona bae kamonaia; 29 bena bae raka lasi: kara namo taudia ese mauri tore-isina bae abia, a kara dika taudia ese hahemaoro tore-isina bae abia.

30 Lau na sibogu ḡau ta ikarana asi dibagu. Na kamonaimu heḡereḡerena hahemaoro na karamu; bona egu hahemaoro na maoromaoro, badina be sibogu egu ura asina karamu, a e siaigu Diravana ena ura mo na karamu. 31 Sibogu bama hegwaurai, egu hegwaurai na basinema momokani. 32 E gwauraigumu tauna be idau, bona dibagu e gwauraigumu herevadia na momomo-kakani.

33 Umui na Ioane dekena o hesiai laova, bona ia ese hereva momokani vada e gwauraia. 34 A lau igwauraigu herevana korikorina na dia taunimanuna edia amo; ḡau tamona, ini hereva name gwaurai umui ihamaunmui. 35 Ioane na e arava bona e hururu-hururuva lamepa na heto, bona umui nega sisina ena diari ai o moaleva. 36 A lau e gwauraigumu herevana ese Ioane ena e hereaiamu; badina be Tamagu ese e henigu baina haguguru ḡaukaradia, harihari na karamu ḡaukaradia, ese e gwauraigumu, Tamagu ese e siaigu. 37 Tamagu ese vada e siaigu, bona ia ese vada e gwauraigu. Ia gadona nega ta asio kamonaia bona vairana danu nega ta asio itaia, lasi vaitani. 38 Ena hereva danu lalomui ai se miamu, badina be ia ese e siaia tauna umui ese asio abia daemu. 39 Umui ese Buka Helaḡa ai o tahumu, badina be umui na o tomamu idia lalodiai mauri hanaihanai ba davaria. Benaini, idia ese lau e gwauraigumu; 40 to umui na asio uramu dekegu baoma mauri iabina totona.

41 Heimodai na taunimanima edia amo asina abiamu. 42 A lau mai dibagu umui lalomui ai Dirava iura-henina na dia mia. 43 Lau be Tamagu ladana ai nama, to asio abigu daemu; a ta be sibona ladana ai bema mai, umui ese boma abia dae. 44 Ede bavabigu dae toma? O heimodai hehenimu, a Dirava korikori ena amo e maimu heimodaina asio tahuamu.

45 Lalomui ai basioto lau ese Tamagu vairanai baina habadelaimui; lasi, ihabadelainlui tauna na Mose, o abidadama heniamu tauna. 46 Badina be umui ese Mose bonla abia dae, lau danu boma abigu dae; badina be ia ese lau sivaraigu e torea. 47 A iena revareva basio abi dae be lauegu hereva ede bavabi dae toma?