1 Unu ḡau muridiai, Iesu na ena hahediba ediai ma e hedinarai lou, Tiberia gohuna ai. Ini e hedinarai toma. 2 Simona Petro, Toma, e nemaia Hekapa, Natanael, Galilea tauna Kana amo, Sebedeo natuna raruosi, bona hahediba rarua danu, hahituosi e noho hebouva. 3 Simona Petro ese e hamaorodia, eto, Aina ha haoda. Idia eto, Ai danu oi ida aitala. Bena idia na ela, vanaḡi auta ai eha gui, to una hanuaboi e bone.

4 Daba rerena ai Iesu na kone ai e gini, a hahediba na asi dibadia una be Iesu. 5 Bena Iesu ese e nanadaidia, eto, Natugu e, mai amui eiava? Idia e haere, eto, Lasi. 6 Bena ia ese e hamaorodia, eto, Reke na enoeno kahana ai ba torea, gwarume bavabi. Taunabunai idia ese e torea, bena bae veria eto, to asi goadadia, gwarume diaḡau daidiai. 7 Bena Iesu ena lalokau hahedibana ese Petro e hamaoroa, eto, Lohiabada bunai. Simona Petro ese una hereva e kamonai ai, ena dabua e tarua, badina be vada e dokia oho; bena gohu ai e pau dobi. 8 Bena hahediba oredia na vanaḡi maraḡina ai e diho, hari reke danu, gwarume ai e honu ḡauna, e veria diho. Badina be kone na dia daudau, roha imahui sisivana.

9 Idia na kone ai e toa, bena lahi mai gidana unuseni ai e itaia, latanai gwarume haida heheato, bona flaoa atagadia haida danu. 10 Iesu ese e hamaorodia, eto, Harihari o abi gwarumedia haida ma a mailai. 11 Taunabunai Simona Petro na vanaḡi ai e ḡui kau, bena reke kone ai e haroroa vareai, gwarume badadia ai e honu, iboudiai sinahu-ta imahui toi. Ena be gwarume na momo herea, to reke na se hedare.

12 Iesu ese e boiridia, eto, Aoma, ame aniani. Bena hahediba na lalodia asie heḡereḡere bae nanadaia, baeto, Oi na daika? Idia dibadia Lohiabada bunai. 13 Bena Iesu ese flaoa atagadia e abidia, e henidia, bona gwarume danu. 14 Unu be nega ihatoina Iesu na ena hahediba ediai e hedinarai, e tore isi lou murinai.

15 Idia na e aniani vaitani, bena Iesu ese Simona Petro e nanadaia, eto, Simona Iona e, idia ese e lalokau henigu maraḡimu, oi ese o lalokau henigu badamu a? Ia e haere, eto, Oibe, Lohiabada e, dibamu na ura henimumu. Iesu eto, Egu mamoe-mamoe ba ubudia.

16 Ma e nanadaia lou, eto, Simona Iona e, o lalokau henigumu a? Ia e haere, eto, Oibe, Lohiabada e, oi dibamu na ura henimumu. Iesu eto, Egu mamoe ba reḡudia.

17 Iesu ese nega ihatoina ma e nanadaia, eto, Simona Iona e, o ura henigumu a? Petro lalona na e hisihisi, badina be nega ihatoina e nanadaia, eto “O ura henigumu a?” Taunabunai, ia na e haere, eto, Lohiabada e, oi na ḡau iboudiai dibamu; vada dibamu na ura henimumu. Iesu eto, Egu mamoe ba ubudia. 18 Momokani vaitani na hamaoromumu, tauhaumu negana ai oi ese emu rami o rioava bona emu ura gabudia ai o ha loava; a ba buruka negana ai imamu na ba toia roro, bena ese rami baine hariolaimu, bena basio ura henia gabuna baine laohaunu. 19 Una hereva amo ia ese edena mase ai Dirava baine heatolaia e hahedinaraia. Unu e hereva toma, bena ma eto, Murigu ai a raka. 20 A Petro e gini kerehai, Iesu ena lalokau hahedibana e itaia, e ḡavadia: anibou ai Iesu kemena ai e tabe kau, e nanadaia, eto “Lohiabada e, taomu itorena tauna be daika?” hahedibana bunai. 21 Taunabunai, Petro ese e itaia, bena Iesu e nanadaia, eto, Lohiabada e, una tau na ede baine heto? 22 Iesu ese e haere henia, eto, Baina ura ia na baine noho ela bona lau baina lou mai, una be dahaka oiemu ai? A oi hari murigu ai ame raka.

23 Ina hereva na Iesu ena orea taudia bogaragidiai e piua, una hahediba na basine mase eto. A Iesu na seto “Ia na basine mase”; to eto “Baina ura ia na baine noho ela bona lau baina lou mai, una be dahaka oiemu ai?”

24 Ena hahediba binai, ini ḡau e gwaurai hedinaraimu bona e toremu; bona ita dibada ena hereva na momokani.

25 Kara diaḡau danu Iesu ese e kara. lboudiai na bema tore, lau na tomamu tanobada na basinema heḡereḡere unu buka ihaboudia.