5
1 A boiboi; ta ese baine haere henimu a?
Helaḡa taudia na edena ba haḡerea?
Momokani, badu ese kavakava tauna e alaiamu,
2 bona vaḡeḡe ese asi aonegana tauna e hamaseamu.
3 Kavakava tauna ramuna e dihova na itaia;
asi kaimana ena ruma na uduguiraia.
4 Natuna na asi edia roho-mauri gabuna,
hahemaoro gabuna ai e taodia tao,
asi ihamauridia tauna ta.
5 Ena uma anidia na hitolo taudia ese e animu,
a ia be ava ginigini amo e abiamu;
ena taḡa na ranu-mase taudia ese e laga dae laḡa dae heniamu.
6 Badina be hisihisi na gahu amo se varamu,
bona hekwarahi na tano amo se tubumu;
7 a taunimanima iboudiai ahudia be hekwarahi,
lahi kimoremoredia na e pisi daemu na heto.
8 A lau na Iehova itahuna na uramu,
bona egu mauri na Dirava imana ai baina atoa.
9 Ia ese kara badadia, ita asi dibada karadia, e karamu,
bona hoa karadia diaḡau.
10 Ia ese medu na tanobada latanai e hadihoamu,
bona ranu danu uma latadiai.
11 Manau taudia na e abidia daemu atai ai,
bona taitai taudia na e abidia isimu, mauri gabuna ai.
12 Kara dibaka taudia edia lalo-hadai na e laodia ahumu;
taunabunai, imadia gaukaradia na anidia asie varamu.
13 Aonega taudia na edia kara dibaka ai e abidiamu,
bona kara heḡuiheḡui taudia edia lalo-hadai na e hadokodia haraḡamu.
14 Dina na ediai e diburamu,
dina tubua ai idia na e raka hedarahumu, hanuaboi ai na heto.
15 Ia ese ihareha na idia ududia amo e hamauridiamu,
bona ogoḡami taudia na siahu taudia imadia amo e harohodia maurimu.
16 Taunabunai, ogoḡami taudia na mai edia helaro,
bona hahemaoro kerere-kererena ese uduna e kouamu.
17 A itaia, Dirava ese e sisiba heniamu tauna na namo;
taunabunai, Siahu-idoinai Diravana ena mata-hakani basio dadaraia.
18 Badina be ia ese e haheberomu, a bero ma e kumimu;
e herahu masemu, a imana amo ma e hahemaurimu.
19 Hekwakwanai tauratoi lalodia amo baine hamaurimu,
bona hitu lalodiai dika na basine daumu toho.
20 Doe negana ai ia ese mase amo baine rauamu,
bona tuari negana ai dare ena siahu amo baine hamaurimu.
21 Mala ena ikwadi amo baine hunimu;
hahebua-tari negana ai basio gari.
22 Hahebua-tari bona doe na ba kirikirilaidia;
bona uda boromadia na garidia basio gari.
23 Badina be tano paka nadidia ida ba hetura,
bona uda boromadia ida ba herohe maino.
24 Vada ba diba, emu kalaga na namo;
emu maḡu ba itaia, ia lalonai ḡau ta se boio.
25 Vada ba diba, garamu bae hutuma;
besemu bae loḡora tanobada reina na heto.
26 Burukamu ai gara ai ba kau,
uit ikumina na ena nega korikori ai ikwadina gabuna ai e kaumu na heto.
27 A itaia, ina na vada a tahua, ia na momokani;
a kamonai, emu diba namona ai ba halaoa.