8
Bildad ena hereva
1 Bena Bildad, tau Suhi, e haere, eto:
2 Ini hereva ba gwaurai ela bona edena nega ai?
Ela bona edena nega ai udumu herevadia na lai gubana ai baela?
3 Dirava ese hahemaoro e hagagevaiamu a?
Siahu-idoinai Diravana ese kara maoromaoro na e hagagevaiamu a?
4 Bema natumu e kara dika,
ia ese edia kara havara siahuna ai vada e atodia vareai.
5 Dirava boma tahua,
Siahu-idoinai Diravana boma noia,
6 boma ḡoevaḡoeva bona boma maoromaoro,
momokani ia na oi daimu ai baine tore isi,
emu noho gabuna korikorina baine henimu.
7 Bena, ena be emu hematama na maraḡi,
to emu dina gabedia ai ba bada herea.
8 Na noimumu, nega gunadia sivaraidia ba tahu,
bona sene taudia ese e davaridia ḡaudia na ba haero;
9 badina be ita na varani mo tauda, bona ḡau ta asi dibada,
eda mauri tanobada ai na laulau ta na heto.
10 Idia na basie hadibamu, basie hamaoromu, a?
edia diba bada amo hereva basie gwaurai a?
11 Siriho na se pariparimu tanona ai baine vara a?
Geda na asi ranuna gabuna ai baine tubu a?
12 Dounu e gohaiamu ai
do asie utudia negana ai,
ava ta do se maraimu negana ai,
idia na e marai gunamu.
13 Dirava e laloa boiomu taudia iboudiai edia dala na unu mo heto,
Dirava se matauraiamu tauna ena helaro baine doko.
14 Ena helaro na baine heḡigi rohoroho;
ena abidadama na magera valavalana na heto.
15 Ena ruma e tabekau heniamu, bena se ginimu;
e dogoa taomu, to se miamu.
16 Dina ai e tubumu,
tuhutuhuna na ena uma e ragaia ahu.
17 Ia ramuna na nadi senuna ai e hemoḡemu;
ia na nadi gabuna ai e nohomu.
18 Bena ena gabu amo baine hebutu oho;
una gabu ese baine ḡorea, baineto
“Nega ta asina itamu”.
19 A itaia, ina na moale, iena dala ai;
bona tano amo ma haida bae vara.
20 A itaia, Dirava ese asi ena kerere tauna na basine dadaraia,
bona kara dika taudia imadia basine abidia.
21 Oi udumu na doini kiri amo baine hahonua,
bona udumu bibinadia na hisi-dae amo.
22 E inai henimumu taudia na hemarai amo baine hahedokilaidia,
bona kara dika taudia edia kalaga na basine mia.