1 Daba matana ai, Iosua na e tore isi, Sitim e rakatania, Israel taudia iboudiai ida, Ioridane sinavaina isena ai e kau. Bena maoromaoro asie hanaia; do e taruha guna. 2 Dina toi e ore murinai, bese lohiadia ese taruha bogaragina amo e raka hanai, 3 taunimanima e haḡanidia, eto, Hahelaḡa taudia Levi iduhuna amo Iehova emui Dirava ena maua helaḡana bae huaia ba itadia negana ai, ba tore isi, ia murina amo ba raka. 4 Uno amo emui raka dalana ba diba, badina be ina dala amo nega hata asio raka. A maua helaḡana basio raka henia kahi; umui bona ia padamui na kiubit daha rua sisivana bae mia.*Kiubit daha rua = 890 metres sisivana. 5 Bena Iosua ese taunimanima e hamaorodia, eto, Hari dina ai sibomui ba hahelaḡa, badina be kerukeru Iehova ese hoa karadia baine kara bogaragimui ai. 6 Iosua ese danu hahelaḡa taudia e hamaorodia, eto, Taravatu mauana bavabia isi, taunimanima vairadiai ba raka guna. Bena idia ese taravatu mauana e abia isi, taunimanima vairadiai e raka ela.

7 Iehova ese Iosua e hereva henia, eto, Hari dina ai baina imodaimu matama, Israel taudia iboudiai vairadiai, bena bae diba lau ese oi na bamomumu, Mose na bamoava heḡereḡerena. 8 Hahelaḡa taudia, taravatu mauana e huaiamu taudia, ba haḡanidia, baoto “Ioridane sinavaina ai ba diho ela bona ranu isena ai, bena ba gini”.

9 Bena Iosua ese Israel taudia e hamaorodia, eto, Ini aoma, Iehova, emui Dirava, ena hereva ba kamonai. 10 Iosua ma eto, Ini amo vada ba diba Mauri Diravana na umui bogaragimui ai e nohomu; momokani, ia ese Kanaan taudia bona Hiti taudia bona Hivi taudia bona Perisi taudia bona Girigasa taudia bona Amoro taudia bona Iebusu taudia na vairamui ai baine luludia lasi. 11 A kamonai: tanobada idoinai Lohiana ena taravatu mauana ese baine gunalaimui, Ioridane sinavaina ai. 12 Taunabunai, tatau gwautararua bavabidia, ta ta iduhu ta ta amo. 13 Bena hahelaḡa taudia, Iehova, tanobada idoinai lohiana, ena maua e huaiamu taudia, aedia palapaladia na Ioridane sinavaina ranuna ai bae turu dobi negana ai, Ioridane sinavaina ena aru baine doko, bona sinavai dorina amo e maimu ranudia na bae gini tao.

14 Taunabunai, Israel taudia ese edia taruha gabuna e rakatania, Ioridane sinavaina ihanaina totona. Bena hahelaḡa taudia ese taravatu mauana e huaia lao, Israel taudia vairadiai, 15 ela bona taravatu mauana ihuana taudia aedia na sinavai ranuna ai e turu dobi. Hari Ioridane sinavaina ena kara be taboro negana ai abata e daeva. 16 Bena sinavai dorina amo e maiva ranuna na dauhai e gini tao, hanua ladana Adam badibadinai; una na Saretan kahana hanuana ta. A e laova, Araba gohuna (ladana ta be Tadi gohuna) e aru heniava ranuna e kororo. Bena Israel taudia na e raka hanai, Ieriko hegaga hehenina ai. 17 A Israel taudia iboudiai tano kaukauna ai e raka hanaiva negana ai, hahelaḡa taudia, Iehova ena taravatu mauana e huaia taudia, na tano kaukauna ai e gini, Ioridane bogaraginai, ela bona bese idoinai Ioridane e rakaia hanai vaitani.