2
1 Ḡaubada ese ena badu ai
Siona kekenina na dagadaga henunai vada e atoa;
Israel hairaina na guba amo
vada e tahoa dobi tanobada ai;
ena badu dinana ai na
ia aena ihadaidia ḡauna se laloa tao.
2 Ḡaubada ese Iakob ena noho gabudia iboudiai
vada e habuadia tari, se bogadia hisi;
Iuda kekenina ena gabu aukadia na
ena badu ai vada e gigidia dobi;
basileia mai ikwarana taudia ida
vada e haketodia tano ai, mai hemaradia ida.
3 Israel ena goada idoinai na
ena badu ḡaraḡarana ai vada e utua dobi;
ia imana idibana na edia amo e abia oho,
inai taudia vairadiai;
Iakob enai vada e ara, lahi hururu-hururuna na heto,
heḡeḡemadai ḡaudia iboudiai vada e aradia ore.
4 Ena peva vada e marea, inai tauna na heto;
imana vada e ha-aukaia, tuari tauna na heto;
ta matarealaimu taudia na ia ese vada e aladia mase,
Siona kekenina ena kalaga ai;
ena badu ḡaraḡara vada e bubua dobi,
lahi na heto.
5 Ḡaubada na inai tauna heḡereḡerena ai vada ela,
ia ese Israel vada e habuaia tari;
ena lohia rumadia iboudiai ia ese vada e habuadia tari,
ena gabu aukadia vada e ḡiḡidia dobi;
Iuda kekenina ena taitai bona ena rohe-ahu
ia ese vada e habada.
6 Ia ese ena kalaga vada e rohoa, uma kalagana na heto,
e gwaurai ariadia gabuna vada e ḡiḡia dobi;
e gwauraia ariana bona dina helaḡana
Iehova ese vada e hadokodia Siona ai;
bona ena badu garagarana ai
pavapava bona hahelaḡa tauna vada e dadaraidia.
7 Ḡaubada ese ena ihaboulaina patana vada e uduguiraia,
bona ena gabu helaḡana vada e dadaraia;
ena lohia rumadia maḡudia na
inai tauna imana ai vada e atodia;
Iehova ena dubu ai heloḡo-heloḡo e vara,
e gwauraia ariana dinana ai na heto.
8 Iehova ese lalona vada e ha-aukaia,
Siona kekenina ena magu baine ḡiḡia dobi;
hahetoho varona amo vada e hahetohoa,
imana na ihabua-tarina amo se veria dua;
kohoro bona maḡu vada e hahisidia,
idia na e manoka heboumu.
9 Ena ikoukou na tano ai vada e hepuni,
ena auri vada e hadikadia, vada e hakwaidudia;
ena pavapava bona-ena lohia na bese idau-idau bogaragidiai,
taravatu na vada e ore,
bona ena peroveta taudia ese mata-hanai ta se abiamu,
Iehova ena amo.
10 Siona ena tau-badadia na
tano ai e helaimu, asi reḡereḡedia;
kahu na tubuadia ai vada e ḡiḡi kau,
bona puse dabuadia vada e hahedokilai;
Ierusalem ulatodia ese
tano vada e igo henia.
11 Matagu na taitai ai vada e malaka-malaka,
laumagu na e dauremu;
Ialogu na hisihisi ese e gugubaiamu,
egu bese ihabua-tarina dainai;
badina be natudia karukarudia bona memero-memero na
hanua ariarana lalodiai e manoridiamu.
12 Idia ese sinadia e tai henidiamu, e tomu
“Aniani bona vine ranuna na edeseni ai?”
Vada e bero taudia heḡereḡeredia ai e mase reamu,
hanua ariarana lalodiai;
sinadia kemedia ai
edia mauri e oremu.
13 Ierusalem kekenimu e,
ede baina gwauraimu toma bona dahaka ida baina haheḡereḡeremu?
Siona rami-hebou ulatona e,
dahaka ida baina haheḡereḡeremu, oi taumu ihalona totona?
Badina be ihabua-tarimu na bada herea, davara na heto;
daika ese baine hamaurimu lou?
14 Emu peroveta taudia ese oi daimu ai
mata-hanai koikoidia bona kavakavadia vada e itadia;
emu kara havara asie gwaurai hedinarai,
ihanamo-loumu totona,
a daimu ai peroveta herevadia koikoidia vada e itadia,
unu amo vada e hakaumu kerere.
15 Dala ai e raka hanaimu taudia iboudiai ese
imadia na e patapata henimumu;
e si dagumu, kwaradia na Ierusalem kekenina
e ladolado heniamu, e tomu,
E gwauraia “hairai herea-daena” bona “tanobada idoinai ihamoalena”
hanuana binai a?
16 Oi inaimu iboudiai ese
e ihi-ihiraimumu;
e si dagumu, gadigadidia e hahedaimu,
e lolomu, e tomu: Vada ta habuaia tari;
ta uralaia lalo-dikava dinana binai,
harihari vada ta davaria, vada ta itaia.
17 Iehova ese e laloa hata karana vada e karaia,
e gwau guna, bena vada e hamomokania;
idau nega ai e gwauraia heḡereḡerena ai
vada e hahegigia dobi, asi ena hebogahisi;
inai tauna vada e hamoalea oi latamu ai,
amu inai taudia edia siahu vada e habadaia.
18 Siona kekenimu e
Ḡaubada ba tai lolo henia!
Iruru-mata na bae aru abata na heto,
dina ai bona hanuaboi ai;
laḡamu basio ania,
matamu danu basie laḡa ani.
19 A tore isi, hanuaboi ai ba tai lolo,
hegima negadia ta ta imatamadia ai;
lalomu anina ba bubua nege ranu na heto,
Ḡaubada vairanai;
imamu na ba dudui dae henia,
natumu edia mauri daidiai;
badina be idia na hitolo dainai e mase reamu,
ariara iboudiai dokodia ai.
20 Iehova e, a hageremai, a itaia,
daidia na unu vada o kara henidia toma?
Hahine ese natudia bae anidia,
e dosidia memerodia bae anidia, a?
Hahelaḡa tauna bona peroveta tauna na
Ḡaubada ena gabu helaḡana ai bae aladia mase a?
21 Ariara ḡahudia ai
memero bona iahu e hekida boumu;
egu ulato bona egu uhau
na dare ai vada e mase;
emu badu dinana ai vada o aladia,
vada o aladia mase, so bogadia hisi.
22 E hagarigumu ḡaudia na kaha iboudiai amo o boiridia,
e gwauraia ariana dinana ai na heto;
Iehova ena badu dinana ai
ta se heau, ta se mauri;
na hadorodia bona na ubudia memerodia na
agu inai tauna ese vada e habuadia tari.