1 Iehova ese Mose e hamaoroa, eto, 2 Tau ta baine kerere, Iehova baine koia, bona dekena tauna ena kohu inarina ai baine koikoi, eiava abitorehai iheni-louna ai baine koikoi, eiava baine dadidadi, eiava dekena tauna baine hahisia, 3 eiava boio ḡauna baine davaria bena baine herevalaia koikoi eiava baine gwau hamatalaia koikoi: unu baine koikoi toma tauna 4 na mai ena kerere bona mai ena kara dika. Ia ese e dadihaia ḡauna, eiava taunimanima ihahisidia amo e abia ḡauna, eiava e henia baine naria ḡauna, eiava e davaria ḡauna, 5 eiava e gwau hamatalaia koikoi ḡauna, na una ḡau biaguna baine henia lou, mai ato-kauna ida: ato-kauna be una ḡau davanabema karoaia, karoa ima, bena karoa ta bema abia, ato-kauna na unubadana baine heni, ena kara-koikoi boubouna baine mailaia dinana ai. 6 Bena ena kara-koikoi boubouna baine mailaia Iehova enai, mamoe maruanena asi bebeka-bebekana ta, ena seri amo, oi ese davana ba gwauraia ḡauna, hahelaḡa tauna baine henia. 7 Bena hahelaḡa tauna ese ia bagunai herohemaino karana baine karaia, Iehova vairanai; unu amo ena kara dika idoinai baine hegwau tao.

8 Iehova ese Mose e hamaoroa, eto, 9 Aaron mai natuna verina ida ini ba haḡanidia toma. Ḡole-oho boubouna taravatuna binai: boubou ḡauna na ihaboulaina patana lahina latanai baine mia rani, lahi danu baine ara rani. 10 Bena hahelaḡa tauna ese ena dabua bona ena piribou, dabua aukadia amo e kara ḡaudia, baine hadoki; bena ḡole-oho ḡauna kahuna na ihaboulaina patana latana amo baine abia oho, ihaboulaina patana badinai baine bubua. 11 Bena ena dabua aukadia baine doki oho, dabua idaudia baine hadoki; bena kahu na taruha murimurinai baine laohaia, gabu ḡoevaḡoevana ta ai baine bubua. 12 Ihaboulaina patana lahina na baine ara hanaihanai, basine bodo. Daba iboudiai hahelaḡa tauna ese rakuraku audia baine ato kau, ma ḡole-oho boubouna idia latadiai baine atoa kau; herohemaino boubouna digarana danu lahi ese baine ḡolea oho. 13 Lahi na ihaboulaina patana latanai baine ara hanaihanai, basine bodo.

14 Flaoa boubouna taravatuna binai: Aaron natuna ese Iehova vairanai bae mailaia, ihaboulaina patana vairanai. 15 Hahelaḡa tauna ta ese boubou flaoana kahana mai dehorona imana ai baine abia, bona muramura mai bonana idoinai, ihaboulaina patana ai baine gabua, helalo toana ai bainela, bonana namo ḡauna Iehova ena. 16 Flaoa orena na Aaron mai natuna ida bae ania: asi ihatubuna bae ania, gabu helaḡana ai, hebou kalagana maḡuna lalonai. 17 Ihatubuna muramurana ida basie buloa. Vada na henidia, idia ahudia ḡole-oho boubouna ai. Una na helaḡa herea, kara-rea bouboudia bona kara-koikoi bouboudia heḡereḡeredia. 18 Aaron ena iduhu mamaruanedia iboudiai bae ania diba; una na idia ahudia Iehova ena ḡole-oho bouboudia ai, emui uru iboudiai ela bona hanaihanai. Baine daua toho tauna na baine helaḡa.

19 Iehova ese Mose ma e hamaoroa, eto, 20 Aaron mai natuna ida ese Iehova ini bae boua toma, ia ihorona dinana ai: flaoa namo-hereana efa ta bae karoaia, karoa gwauta, karoa ta be flaoa boubouna ai bainela ela bona hanaihanai, kahana daba ai ma kahana adorahi ai. 21 Dehoro ida bae buloa, ataga ai bae gabua. Bena oi ese ba mailaia, ba bakia, boubou ḡauna ai ba halaoa, bonana namo ḡauna Iehova ena. 22 Hahelaḡa tauna danu Aaron natuna edia amo bae abia hidi, tamana ibolona ai bae horoa, ia ese Iehova unu baine boua toma. Mia-hanaihanai taravatuna binai: idoinai bae gabua Iehova ena, lahi ese baine ḡolea oho. 23 Hahelaḡa tauna ena flaoa boubouna be baine heḡole-oho vaitani; basie ania.

24 Iehova ese Mose ma e hamaoroa, eto, 25 Aaron mai natuna verina ida ini ba haḡanidia toma. Kara-rea boubouna taravatuna binai: kara-rea boubouna ḡauna na Iehova vairanai bae alaia mase, ḡole-oho bouboudiaḡaudia e aladia masemu gabuna ai, ia na helaḡa herea. 26 Hahelaḡa tauna ese baine hahelaḡaia, kara dika boubouna ai bainela, bena baine ania; gabu helaḡana ai, hebou kalagana maḡuna lalonai, baine ania. 27 Hidiona baine daua toho tauna na baine helaḡa. Rarana na dabua ta ai baine hetuturu, una dabua na gabu helaḡana ai bae huria. 28 Lalonai e nadua urona na bae hamakohia, eiava bema auri urona, bae kakasia bona ranu ai bae huria. 29 Maruane iboudiai hahelaḡa taudia edia iduhu ai bae ania diba; ia na helaḡa herea. 30 A kara-rea bouboudia raradia na hebou kalagana lalonai bema vareailai, gabu helaḡana ai herohemaino ḡauna ai bae halaoa, dika iabi-ohona totona, ia be basie ania; idoinai lahi ese baine ḡolea oho.