1 Iehova ese Mose e haduaia, eto, 2 Lepra tauna ihaḡoevana dinana taravatuna binai. Bae hakaua lao, hahelaḡa tauna dekenai; 3 bena hahelaḡa tauna na taruha murimurinai bainela, una tau baine itaia, ena lepra vada e boio eiava. 4 Bema boio, hahelaḡa tauna ese baine haḡanidia, lepra tauna ihaḡoevana totona manu ḡoevaḡoevadia rua mauridia ai bae abidia, bona sida audia taidia, bona dabua kakakakana taina, bona muramura avana. 5 Bena hahelaḡa tauna ese baine hahedua, manu ta uro ai bae alaia, e arumu ranuna daenai. 6 Bena manu maurina bona sida audia bona dabua kakakakana bona muramura avana baine abi, hari e arumu ranuna daenai e alaia manuna rarana ai baine uru diho. 7 Bena rara baine abia, ena lepra amo baine haḡoevaia; tauna baine nevarilaia, nega hitu; bena baine gwauraia, vada e ḡoeva. A manu maurina baine harohoa lasi murimuri ai. 8 Bena vada e ḡoeva tauna ese ena dabua baine huri, bona huina idoinai baine naua, bona baine digu: bena baine ḡoeva. Una murinai ia na taruha lalonai baine raka vareai: to ena kalaga murimurinai baine noho ela bona dina hitu bae ore.

9 Dina ihahituna ai, ia na huina idoinai, kwarana huina bona aukina huina bona ibunina, baine naua; bona ena dabua baine huri; bona baine digu. Unu amo baine ḡoeva.

10 Dina ihataurahanina ai, ia ese mamoe natudia mamaruanedia rua, asi bebeka-bebekadia, bona mamoe natuna hahinena ta, laḡani tamona ḡauna asi bebeka-bebekana, baine abidia. Bona flaoa namo-hereana efa*“Efa” be Heberu taudia edia hahetoho ḡauna ta; anina be 18 litres sisivana. ta baine karoa, karoa gwauta; bena karoa toi baine abi, dehoro ida baine bulo. Bona dehoro kebere ta danu baine abia. 11 Bena hahelaḡa tauna ese baine haḡoevaia tauna na baine hakaua lao, mai ena boubou ḡaudia ida, hebou kalagana iduarana ai baine haginia, Iehova vairanai

12 Bena hahelaḡa tauna ese mamoe natudia mamaruanedia ta baine abia, kara-dika boubouna ai bainela, dehoro keberena danu; unu ḡau ruaosi baine davedia, davedave boubouna ai baela Iehova vairanai. 13 Hari mamoe natuna maruanena na kara-rea bouboudia ḡaudia bona ḡole-oho bouboudia ḡaudia e aladiamu gabuna ai baine alaia, gabu helaḡana ai; badina be kara-dika boubouna ḡauna na hahelaḡa tauna ana, kara-rea boubouna heḡereḡerena. Ia na helaḡa herea.

14 Bena hahelaḡa tauna ese kara-dika boubouna rarana taina baine abia, e haḡoevaiamu tauna idiba taiana abona baine dahulaia, bona idiba imana sinabadana baine dahulaia, bona idiba aena sinabadana baine dahulaia. 15 Kebere danu baine abia, dehoro taina na miana laurina nuana ai baine seia; 16 bena idiba imana kwakikwakina ta una dehoro ai baine urua diho, bena dehoro na nega hitu baine daveraia Iehova vairanai. 17 Bena dehoro orena miana hahelaḡa tauna imana ai na taina baine abia, e haḡoevaiamu tauna idiba taiana abona bona idiba imana sinabadana bona idiba aena sinabadana baine dahulaidia, kara-dika boubouna rarana e dahulaidia gabudia ai. 18 A dehoro orena hahelaḡa tauna imana ai miana na ibounai e haḡoevaiamu tauna kwarana baine horolaia; unu amo hahelaḡa tauna ese ia dainai herohe-maino karana baine karaia, Iehova vairanai. 19 Hahelaḡa tauna ese kara-rea boubouna ḡauna baine alaia mase, e haḡoevaiamu tauna dainai herohemaino karana baine karaia; murinai ḡoIe-oho mamoena baine alaia mase. 20 Hahelaḡa tauna ese ḡole-oho ḡauna bona flaoa boubouna baine gabudia, ihaboulaina patana ai; Iahi ese baine ḡoledia oho. Unu amo hahelaḡa tauna ese una tau dainai herohemaino karana baine karaia, bena ia na baine ḡoeva.

21 Tau ta bema ogoḡami dainai unu ḡau idavaridia basinema heḡereḡere, ia ese mamoe natuna maruanena tamona mo baine abia, ena kara-dika boubouna, hahelaḡa tauna ese baine davea, ia dainai herohemaino karana baine karaia; bona flaoa efa ta baine karoa, karoa gwauta, karoa toi dehoro ida baine bulo, ena flaoa boubouna; bona dehoro kebere ta; 22 bona kerea rua eiava pune natuna rua, ena moni heḡereḡerena, ta kara-rea boubounabona ta ḡole-oho boubouna. 23 Bena dina ihataurahanina ai, ia ese baine laohaidia, hahelaḡa tauna dekenai, hebou kalagana iduarana ai, Iehova vairanai, hahelaḡa tauna ese baine haḡoevaia totona. 24 Bena hahelaḡa tauna ese kara-dika boubouna mamoena bona kebere mai dehorona ida baine abidia, baine davedia, davedave boubouna ai baela Iehova vairanai. 25 Bena kara-dika boubouna mamoena baine alaia mase, bona rarana baine abia, e haḡoevaiamu tauna idiba taiana abona bona idiba imana sinabadana bona idiba aena sinabadana baine dahulaidia. 26 Bena hahelaḡa tauna ese dehoro na ia imana laurina nuana ai baine seia, 27 bona idiba imana kwakikwakina ta amo baine daveraia nega hitu, Iehova vairanai. 28 Bena hahelaḡa tauna ese dehoro taina imana ai mia baine abia, e haḡoevaiamu tauna idiba taiana abona bona idiba imana sinabadana bona idiba aena sinabadana baine dahulaidia, kara-dika boubouna rarana e dahulaidia gabudia ai. 29 A dehoro orena hahelaḡa tauna imana ai mia na e haḡoevaiamu tauna kwarana baine horolaia, ia dainai herohemaino karana baine karaia Iehova vairanai. 30 Bena ia ese hari kerea rua eiava pune natuna rua, ena moni heḡereḡerena ai e hoi, baine heni, 31 ta kara-rea boubouna ai bainela, ma ta ḡole-oho boubouna ai bainela, flaoa boubouna ida; unu amo hahelaḡa tauna ese herohemaino karana baine karaia, Iehova vairanai, e haḡoevaiamu tauna ena. 32 Lepra tauna, ena moni dia heḡereḡere ihaḡoevana ḡaudia korikoridia baine abi, taravatuna bunai.

33 Iehova ese Mose bona Aaron ma e hamaorodia, eto, 34 Baina henimui emui tano korikori ai bainela tanona, Kanaan, ai ba kau murinai, readia ruma auta ai lepra gorerena baina atoa kau. 35 Unu bema heto, ruma biaguna ese hahelaḡa tauna dekena bainela, baineto, Lau na laloamu gorere dikana ta be egu ruma ai mia. 36 Bena hahelaḡa tauna ese baine hahedua, ruma ḡaudia iboudiai na ruma amo bae huadia lasi, hahelaḡa tauna baine raka vareai bena ruma ḡaudia baine gwauraidia miro na garina. Bena gabeamo hahelaḡa tauna na baine raka vareai, ruma baine itaia: 37 bena gorere toana baine itaia; bema ruma habana na mai toutou gadoka-gadokadia eiava kakakakadia, bona toutou na dia haba kopina ai mo to sisina dobu, 38 hahelaḡa tauna ese ruma iduarana amo baine raka lasi bona ruma na baine koua kunuka-kunuka, ela bona dina hitu bae ore.

39 Dina ihahituna ai, hahelaḡa tauna ma bainela, baine itaia, ruma habana ai toutou vada e bada eiava. 40 Bena hahelaḡa tauna ese baine hahedua, nadi mai toutoudia bae raḡadia oho, hanua murimurinai bae negedia, momoru gabuna ai. 41 Ruma laloma kahana idoinai danu bae kakasia, bona bae kakasia oho momoruna danu hanua murimurinai bae negea, miro ḡaudia e negemu gabuna ai. 42 Bena nadi matamatadia bae abi, e raḡadia oho ḡaudia bae bolodia; murinai ruma laloma kahana, idoinai taba-taba ḡauna amo bae tabaia ahu.

43 Unu nadi bae raḡadia oho bona ruma laloma kahana bae kakasia bona tabataba ḡauna amo bae tabaia ahu murinai unu gorere toutoudia ma bema vara lou ai na 44 hahelaḡa tauna ese ma baine ha itaia. Bema gorere toutoudia vada e bada ruma ai, una na lepra korikori, ruma e hadikaiamu; ruma na miro. 45 Ia ese ruma na baine rohoa, nadi bona au bona tabataba ḡauna baine ḡiḡi dobi; bena bae laohai, hanua murimurinai, miro ḡaudia e negemu gabuna ai, bae nege. 46 Daika ese ruma lalonai vada e raka vareai, hahelaḡa tauna ese e koua murinai, ia na baine taubu ela bona dina baine diho. 47 Una ruma ai e aniani tauna na ena dabua baine huri, bona una ruma ai e mahuta tauna danu ena dabua baine huri.

48 A hahelaḡa tauna baine raka vareai negana ai na baine itaia, tabataba ḡauna amo e tabaia ahu murinai gorere toutoudia asie vara lou, ia ese una ruma baine gwauraia, vada e ḡoeva; badina be gorere vada e boio. 49 Bena ruma ihaḡoevana totona ia ese manu rua bona sida audia rua bona dabua kakakaka bona muramura avana baine abidia. 50 Manu ta be uro lalonai baine alaia mase, e arumu ranuna daenai; 51 bena sida audia bona muramura avana bona dabua kakakaka bona manu maurina na manu masena rarana ai bona e arumu ranuna ai baine uru diho, bena ruma baine nevarilaia nega hitu. 52 Ruma na unu baine haḡoevaia toma, manu rarana amo bona e arumu ranuna amo bona manu maurina amo bona sida audia amo bona muramura avana amo bona dabua kakakaka amo. 53 Bena manu maurina na baine harohoa, hanua amo baine roho lasi uda ai. Unuhetomana ia ese ruma dainai herohemaino karana baine karaia. Bena ruma na baine ḡoeva.

54 Lepra bona taunimanima kopidia e varamu goreredia taravatudia bunu; 55 bona dabua bona ruma lepra ese e hamirodiamu taravatudia; 56 bona ḡou bona taoha bona toutou taravatudia. 57 Unu amo ba diba, mirona be edena bona ḡoevana be edena. Lepra taravatuna bunai.