1 Iehova ese Mose e hereva henia, eto, 2 Israel taudia ba hamaorodia, lau binai Iehova, emui Dirava. 3 O noholaiva tanona, Aigupto, taudia na edia kara basio kara; baina hakaumui vareai tanona, Kanaan, taudia danu edia kara basio kara bona edia taravatu basio badinadia. 4 A lauegu haheḡani bavabidia dae, bona lauegu taravatu ba badinadia; lau binai Iehova. emui Dirava. 5 Taunabunai, egu taravatu bona egu haheḡani ba badinadia; unu baine kara toma tauna be baine mauri. Lau binai Iehova.

6 varavaramu ta ida basio eno bou; lau Iehova na gwaumu. 7 Tamamu ena geda ai basio hekure, sinamu ida basio eno bou; ia na sinamu, basio abia. 8 Tamamu adavana ta ida basio eno bou; ia na tamamu ena. 9 Taihumu ida basio eno bou; tamamu natuna hahinena ta eiava sinamu natuna hahinena ta, oi ida ruma tamona ai e vara, eiava idau ruma ai e vara, basio abia. 10 Tubumu kekenina ida basio eno bou; natumu maruanena natuna eiava natumu hahinena natuna basio abia, badina be iena hemarai na oiemu hemarai. 11 Tamamu adavana natuna hahinena, tamamu ese e havaraia, ida basio eno bou, ia na taihumu. 12 Lalamu ida basio eno bou; ia na tamamu ida hidiotamona. 13 Sinamu lahaina ida basio eno bou; ia na sinamu ida hidio tamona. 14 Tamamu lahaina ena geda ai basio hekure, ia adavana ida basio eno bou; ia be varavaramu. 15 Ravamu hahinena ida basio eno bou; ia na natumu adavana; basio abia. 16 Ihamu ida basio eno bou; ia na tadikakamu ena. 17 Hahine ta ida boma eno bou, ia natuna hahinena eiava tubuna kekenina ida basioma eno bou; idia na hidio tamona. Una na hemarai karana. 18 Hahine ta boma adavaia, ia tadina ida basio hodara.

19 Hahine ta basio raka henia kahi, ia ida ba eno bou totona, rara e hekaramu negana ai. 20 Dekemu tauna adavana ida basio heuda hanai; una na kara mirona. 21 Natumu ta dirava ladana Molek basio henia, ḡole-ohoboubouna ḡauna ai basinela; una na emu Dirava ladana ihadikana karana. Lau binai Iehova. 22 Tatau ida basio eno bou; una na kara mirona. 23 Mauri ḡauna idauna ta ida basio eno bou; hahine danu unu basine kara toma; una kara na dika rohoroho.

24 Ini kara mirodia iboudiai na basio kara; badina be vairamui ai baina luludia lasi besedia be unu kara amo e hahemiromu. 25 Tano danu vada e hamiroa; una dainai ena dika davana vada na henia. Tano na vada e dika; e noholaiava taudia vada e loridia lasi. 26 A umui ese egu taravatu bona egu haheḡani ba badinadia, bona unu kara mirodia basio kara, umui Israel taumui bona bogaragimui ai e noho hedoamu taudia danu. 27 Badina be hari tano e noholaia gunava taudia ese unu kara mirodia e karava ema bona tano na vada e hamiroa. 28 Bena umui ese unu ba hamiroa toma, ia ese umui danu baine lorimui lasi, e noholaia gunava taudia e loridia lasi na heto. 29 Badina be unu kara mirodia bae kara taudia iboudiai na edia bese amo bae negedia daure. 30 Taunabunai, egu hahedua ba badinaia: unu kara mirodia, e gunalaimui taudia ese e kara, na umui basio kara, unu kara amo basio hahemiro. Lau binai Iehova, emui Dirava.