1 Una murinai ia ese hanua badadia bona hanua maraḡidia iboudiai lalodiai e haroro loaloa, Dirava ena basileia sivaraina namona e harorolaia. Gwauta raruosi ese e bamoa, 2 bona hahine haida danu, lauma dikadlia edia amo e halasidia hahinedia, bona edia gorere amo e hamauridia hahinedia. Ta be Maria, hane Magdala: iena amo lauma dikadia hahitu e halasidia. 3 Ma ta be Ioana, Kusa, Herod ena kohu ireḡuna tauna, adavana. Ta danu Susana. Ma hutuma danu, edia ḡau ia e ubulaia.

4 Taunimanima hutuma e aru ela, hanua iboudiai amo ia dekenai e hebou. Bena ia ese sivarai heḡereḡerena ta e gwauraia, eto, 5 Uhe ihadona tauna ta na uit iḡiḡi-rohorohona totona e vareai. Bena e giḡi rohorohova ai haida dala isena ai e moru, bena taunimanima ese e moi tao bona manu ese e ani ore. 6 Haida be papapapa ai e moru, e tubu, to e marai, badina be tano na dia keruma. 7 Ma haida be ava ḡiniḡini ai e moru, bena ḡiniḡini ida e tubu hebou, a ḡiniḡini ese e habubuni. 8 A haida be tano namona ai e moru, bena e tubu ḡoevaḡoeva, e dobi, anidia na sinahu sinahu. Unu e gwau toma, bena e hereva badabada, eto, Mai taiana tauna na baine hakala.

9 Bena ena hahediba ese e nanadaia, eto, Hari sivarai heḡereḡerena anina be dahaka? 10 Ia eto, Umui be lalo-parara vada e henimui, Dirava ena basileia herevadia hehunidia ba diba; a hahidaosi na sivarai heḡereḡeredia amo na hadibadiamu; taunabunai bae roharoha, to basie itaia, bae hakala, to basie kamonai. 11 Sivarai heḡereḡerena anina binai: uit nadinadidia na Dirava ena hereva. 12 Dala isena ai e moru nadinadidia be taunimanima ese hereva e kamonaimu, to Diabolo na e maimu, lalodia amo hereva na e abia ohomu, bae abia dae bona bae mauri na garina. 13 Papapapa ai e moru ḡaudia na taunimanima ese hereva e kamonaimu bona e abia daemu mai moaledia ida, to asi ramudia; taunabunai e abia daemu to asi vanahana hedibaḡani ese e butudia taomu, bena e hekwakwanaimu. 14 Ava ḡiniḡini ai e moru ḡaudia be taunimanima ese hereva e kamonaimu, to dala ai e laomu ai na tanobada ena lalo-haguhi bona ena taḡa bona ena moale ese e habubunidiamu, taunabunai idia na asi huahuadia. 15 A tano namona ai e moru ḡaudia be taunimanima ese hereva e kamonaimu mai lalodia maoromaorodia bona ḡoevaḡoevadia ida, bona e laloa tao tarika-tarikamu; asie hesikumu ela bona huahuadia e dobimu.

16 Asi tauna ta ese lamepa baine ha-araia bena tohe amo baine karuhia ahu, eiava pata henunai baine laia vareai. Ia ese lamepa patana ai baine laia kau, bena bae raka vareai taudia iboudiai ese diarina bae itaia. 17 Hehuni ḡaudia iboudiai do bae hedinarai, bona e moi tao herevadia iboudiai bae hahedibalai bona bae gwaurai hedinarai. 18 Taunabunai, emui kamonai nahuana ba tohoa; badina be mai ena ḡau tauna ma bae henia, a asi ena ḡau tauna be ia banava eto vada e abia ḡauna na iena amo do bae abia oho.

19 Ia sinana bona tadina na ia dekena ela, to hutuma daidiai asi edia dala dekena bae raka kahi lao. 20 Taunabunai haida ese e hamaoroa, eto, Sinamu bona tadimu na murimuri ai gigini, e uramu bae itamu. 21 Bena ia ese e haere henidia, eto, Sinagu bona tadigu bini: Dirava ena hereva e kamonaimu bona karana e karamu taudia.

22 Dina ta, ia na ena hahediba ida vanaḡi ta ai e gui, bena ia ese e hamaorodia, eto, Gohu unukahana baita heau hanai. Bena lara e kidaia. 23 Heaudia ai, ia na e mahuta. Bena guba ta gohu ai e kau, hurehure vanaḡi ai e roho uda, bena mokona e mutu. 24 Bena idia na ia dekena ela, e haoa, eto, Biagumai, Biagumai, ita aita mase a? Bena ia e tore isi, lai bona hurehure e gwau tao; bena e doko, vada e gaima. 25 Ia ese e gwau henidia, eto, Emui abidadama be edeseni ai? To idia na e gari bona e hoa, bona e hereva heheni, eto, Ina lai bona hurehure e haḡanimu bena erena e kamonaimu tauna be daika?

26 Idia ese Gerasa tanona ai eha kau, Galilea hegaga hehenina ai. 27 Dihona ai tau ta hanua amo ia ida e hedavari; una tau na mai lauma-dikana, bona nega daudau kopi kavakavana e loava, bona ruma ai se nohova, midava ai mo e nohova. 28 Ia ese Iesu e itaia, bena e boi lolo, e goru diho, e hereva badabada, eto, Iesu e, Dirava Herea Mikamika Natuna e, egu ai dahaka o karamu? Na noimumu, basio hahisigu. 29 Badina be Iesu ese hari lauma dikana vada e haduaia, una tau ena amo baine raka lasi. Nega momo, e boloava negadia ai, gadea bona auri amo e guiava, to iḡuina gadeadia e hamotuva, bena lauma dikana ese tano ḡaḡaena ai e doria laova. 30 Bena Iesu ese e nanadaia, eto, Oi ladamu be daika? Ia eto, Tuari Oreana; badina be lauma dikadia hoho ese e boloava. 31 Bena e noia, dobu gabuna basie siaidia.

32 Una ororo gabana ai boroma serina badana ta e nuanuava, bena lauma dikadia ese e noia, bae bolodia. Bena ia ese e siaidia. 33 Bena lauma dikadia na hari tau ena amo e lasi, unu boroma e bolodia; bena seri idoinai e heau hekei gohu ai, e dono mamase.

34 A ireḡudia taudia ese una kara e itaia, bena e heau, hanua lalonai bona uma gabudia ai harina eha piua. 35 Bena taunimanima e aru ela, e vara ḡauna bae itaia eto. Bena Iesu enai e kau, lauma dikadia e lasitania tauna e itaia, Iesu aena badinai e helai, mai dabuana bona mai darana. Bena idia na e gari. 36 A kara e itaia taudia ese kava tauna e hamauria dalana e hamaorolaidia. 37 Bena Gerasa tanona taudia iboudiai ese e noia, edia amo baine raka oho eto; badina be gari ese e butudia tao. Bena ia na vanaḡi ai ma e gui, e lou.

38 Bena hari lauma dikadia e lasitania tauna ese e noia, baine bamoa eto. A Iesu ese e haloua, 39 eto, Emu ruma ba lou henia, Dirava ese e kara henimu karadia iboudiai ba harorolai. Taunabunai, ia na e lou ela, ena hanua idoinai Iesu ena kara ienai e harorolai.

40 Iesu e lou negana ai na hutuma ese e abia dae mai moaledia ida, badina be idoudiai ese e nariava. 41 Bena tau ta, ladana Iairo, dubu biaguna ta, ela, Iesu aena badinai e goru diho, e noia, ena ruma baela eto. 42 Badina be ia natuna kekenina, vara-edeana, laḡanina be gwauta-rua, masena vada e kahirakahira. Bena e laova ai, aru taudia ese e rakaia biribiriva.

43 Hahine ta, ena gorere na rara moru, laḡani gwauta-rua unu e gorere tomava, bona ena kohu idoinai idume ai vada e ore, to ta ese se hamauria: 44 ia na Iesu murina amo ela, ena dabua rimuna ai e dau kau; bena ena rara moru vada e doko. 45 Iesu eto, Daika ese e daugu toho? Iboudiai e heḡore. Bena Petro mai bamona ida e hereva henia, eto, Biagumai e, aru taudia ese e rakamu biribirimu, e rakamu hesede-hesedemu. 46 A Iesu eto, Ta ese e daugu toho; badina be dibagu siahu na egu amo vada e lasi. 47 Hahine na e itaia basine hunia diba, bena mai garina ida ela, ia vairanai e goru diho, dahaka dainai e daua toho bona ede e mauri toma sivaraina e gwauraia hedinarai, taunumanima iboudiai vairadiai. 48 Bena Iesu ese e hamaoroa, eto, Natugu e, emu abidadama ese vada e hamaurimu; mai mainomu ida aola.

49 Ia dounu e herevava ai, ta dubu biaguna ena ruma amo ema, eto, Natumu vada eha mase; hahediba tauna basio haturiaia. 50 A Iesu e kamonai, bena ia ese Iairo e hamaoroa, eto, Asio gari, bavabidadama henigu, bena ia na do baine mauri. 51 Ruma ai e kau, bena ia ese taunimanima e gwaudia tao, basie raka vareai; Petro bona Iakobo bona Ioane mo, kekeni tamana sinana ida. 52 Iboudiai e taitaiva, kekeni taina e taiva. To ia eto, Asio tai: ia na se mase, e mahutamu. 53 Idia ese e kirikirilaia; dibadia kekeni na vada e mase vaitani. 54 Bena ia ese kekeni imana e abia, e boi henia, eto, Kekeni e, a tore isi. 55 Bena laumana e lou, kekeni na vada e tore isi. Bena Iesu ese e haduadia, ana bae henia. 56 Tamana sinana e hoa dikadika; a ia ese e tamanudia, tau ta basie hamaoroa eto.