1 Una negana ai haida ese Galilea taudia haida sivaraidia Iesu e hamaorolaia, Pilato ese idia raradia na edia boubou ḡaudia raradia ida e bulo hebou. 2 Bena Iesu ese e haere henidia, eto, Umui na o tomamu unu Galilea taudia hahidaosi edia dika na Galilea taudia oredia edia dika e hereaia, taunabunai unu e mase toma a? 3 Na hamaoromuimu, lasi; to umui na basio helalo kerehai, iboumui ai unu ba mase toma. 4 Eiava, Siloam kohorona ese e kohudia tao bona e hamasedia taudia gwautataurahaniosi; umui na o tomamu edia dika na Ierusalem taudia oredia edia dika e hereaia a? 5 Na hamaoromuimu, lasi; to umui na basio helalo kerehai, iboumui ai unu ba mase toma.

6 Ina sivarai heḡereḡerena e henidia, eto, Tau ta ena vine imeana lalonai suke auna ta e hadoa; gabeai huahuana itahuna ela, to se davaria. 7 Bena ia ese imea ireḡuna tauna e hamaoroa, eto, Laḡani ihatoina binai ina suke huahuana name tahua, to asina davaria; ba utua, ia na tano e lahea taomu. 8 A ia e haere, eto, Biagugu e, hari ina laḡani tamona mo do baine mia; tano na baina ruaia, baina haseriseria; 9 bena huahuana baine dobi be baine namo, a bema lasi boma utua.

10 Dina Helaḡa ta ai, ia ese dubu lalonai e hahediba. 11 Unuseni ai hahine ta lauma dikana ese vada e boloa, laḡani gwauta-taurahani, bona doruna vada e laoho, asi gini tore dibana. 12 Iesu ese e itaia, bena e hamaoroa, eto, Hahine e, emu doru laoho vada eme maoro. 13 Imana danu ia latanai e dau kau; bena doruna e maoro. Bena hari hahine ese Dirava e imodaia.

14 A dubu biaguna e badu, Iesu Dina Helaḡa ai e hahemauri dainai; bena ia ese aru taudia e gwau henidia, eto, Dina tauratoi mimia, taunimanima edia ḡaukara dinadia: unu dinadia ai hahemauri totona baoma, a Dina Helaḡa ai basioma. 15 A Lohiabada ese e haere henia, eto, Koikoi taumui e, Dina Helaḡa ai emui boromakau eiava emui doniki asio ruhaiamu, ranu ihenina asio hakaua laomu a? 16 A ina hahine, Abraham besena hahinena, laḡani gwauta-taurahani Satana ese e guia, be Dina Helaḡa ai basina ruhaia a?

17 Unu e gwau toma, bena e inai heniava taudia vada e hemarai. A aru taudia ese ena kara herea-daedia e moalelai.

18 Bena ia eto, Dirava ena basileia na edeheto? Dahaka ai baina haheḡereḡerea? 19 Ia na sinapi nadinadina ta na heto, tau ta ese e abia, ena uma ai e hadoa. Bena e tubu, au badana ai ela, bona atai manudia na rigina ai e roho kau.

20 Ma eto, Dirava ena basileia na dahaka ai baina haheḡereḡerea? 21 Ia na halubu muramurana na heto, hahine ta ese e abia, flaoa nau autoi ida e buloa, ela bona idoinai vada e tubu.

22 Ia na Ierusalem dalana ai e laova ai na hanua badadia bona maraḡidia lalodiai e hahedibava. 23 Bena tau ta ese e hereva henia, eto, Lohiabada e, gagadoi mo bae mauri eiava?

Ia e haere, eto, 24 Ba raka balaheni, ikoukou hekahi-hekahina amo ba raka vareai. Badina be na hamaoromuimu, hutuma bae raka vareai toho, to dala na basie davaria. 25 Ruma biaguna baine tore isi, iduara baine koua; gabeamo umui na murimuri ai ba gini, iduara ai ba pidipidi, baoto “Lohiabada e, mani a kehoa”. To ia na baine haere henimui, baineto “Umui be ede amo lau asi dibagu”. 26 Bena umui ma baoto “Ai na oi vairamu ai a anianiva, a inuinuva, bona emai ariara ai o hahedibava”. 27 To ia baineto “Na hamaoromuimu, ede amo oma lau asi dibagu; kara havara taumui, iboumui ai dauha aola”. 28 Bena Abraham bona Isaak bona Iakob bona peroveta taudia iboudiai ba itadia, Dirava ena basileia lalonai; to umui na murimuri ai bae dorimui lasi; una negana ai ba tai, gadigadimui ba hahedai. 29 Bena dina dae amo bona dina diho amo, mirigini kahana amo bona diho kahana amo, idia na baema, Dirava ena basileia lalonai bae ege diho. 30 A gabe taudia haida do bae guna, bona guna taudia haida do bae gabe.

31 Una negana ai Farisea taudia haida ia dekena ela, e hamaoroa, eto, Dauha aola, badina be Herod ese e tahumumu, baine alamu mase e tomu. 32 Bena ia ese e haere henidia, eto, Aola, una uda sisiana ba hamaoroa, lau na harihari bona kerukeru lauma dikadia baina luludia lasi, bona gorere taudia baina hamnauridia, a dina ihatoina ai egu ḡaukara baina haḡuḡurua. 33 A harihari, kerukeru, vanegai, egu laolao bainala; badina be peroveta tauna na idau gabu ai basine mase, Ierusalem ai mo.

34 Ierusalem e, Ierusalem e, oi ese peroveta taudia o aladiamu, bona e siaidia vasimu taudia nadi amo o hododiamu. Nega momo natumu bama haboudia, kokoroku hahinena ese natuna e gorudia ahumu na heto, to umui na asio uramu. 35 Benaini, emui ruma eme mia kava. Na hamaoromuimu, umui na basio itagu lou, ela bona negana baine gini dae ai umui baoto “Lohiabada ladana ai e maimu tauna aita hanamoa”.