1 Nahuamui ba toho, emui kara maoromaoro taunimanima vairadiai basio kara, bae ita helaoreana. Unu ba kara toma, umui na asi davamui Tamamui guba ai e nohomu ena amo. 2 Taunabunai, harihari ḡaudia ba heni negana ai na vairamu ai kibi basio hiriria, koikoi taudia ese dubu ai bona ariara ai e karamu na heto, taunimanima ese bae heatolaidia helaoreana. Na hamaoromui momokanimu, davadia vada e abi. 3 A harihari ḡaudia ba heni negana ai na imamu laurina ese idibana ena kara basine diba. 4 Taunabunai emu harihari baine hehuni, bona Tamamu na ḡau hehunidia e itamu, davana baine henimu.

5 Ba ḡuriḡuri negadia ai, koikoi taudia basio tohotohodia, badina be idia na e uramu dubu ai bona ariara daigunidia ai ginidia ai bae ḡuriḡuri, taunimanima ese bae itadia totona. Na hamaoromui momokanimu, davadia vada e abi. 6 A oi na ba ḡuriḡuri negana ai na emu daiutu lalonai ba raka vareai, iduarana ba koua ahu, Tamamu na gabu hehunina ai ba noinoi henia. Bena Tamamu na gabu hehunina e itaiamu, davana baine henimu.

7 Ba ḡuriḡuri negadia ai, basio gwau lou gwau lou, bese idau-idau taudia na heheto; badina be idia na e tomamu edia hereva momo daidiai baine kamonaidia. 8 Idia ida basio heḡereḡere, badina be Tamamui na dibana dahaka ḡau dahaka ḡau ai o dabumu, do asio noinoi heniamu negadia ai. 9 Taunabunai, ini ba ḡuriḡuri toma:

14 Badina be umui ese taunimanima edia dika ba gwau tao, Tamamui guba ai e nohomu ese emui dika baine gwau tao. 15 A umui ese taunimanima edia dika basio gwau tao, Tamamui ese emui dika basine gwau tao.

16 Bavanivaga negadia ai na basio vaira hua, koikoi taudia heḡereḡeredia; badina be vairadia e hadikamu, edia anivaga toadia na taunimanima ese bae ita e tomamu. Na hamaoromui momokanimu, davadia na vada e abi. 17 A oi na bavanivaga negadia ai na kwaramu ba horoa, vairamu danu ba huria; 18 bena taunimanima na basie diba o anivagamu, a Tamamu na gabu hehunina ai baine diba. Bena Tamamu na gabu hehunina e itaiamu, davana baine henimu.

19 Emui kohu na ina tanobada ai basio habou, iniseni ai pitopito bona hogohogo ese e ani oremu, iniseni ai danu henao taudia ese ruma e dareamu bona e henaomu. 20 A emui kohu na guba ai ba habou, unuseni ai pitopito bona hogohogo ese asie ani oremu, unuseni ai danu henao taudia ese ruma asie dareamu, asie henaomu. 21 Badina be emui kohu e miamu gabuna ai, lalomui danu unuseni mia.

22 Tau-anina ena lamepa na mata. Taunabenai, matamu baine namo, taumu anina idoinai baine diari. 23 A matamu baine dika, taumu anina idoinai baine dibura. Taunabenai, diari na oi lalomu ai baine dibura, hari dibura na daka bada!

24 Asi launa ta ese biagu rarua isiaidia baine lao heni diba. Badina be ta baine inai henia, ta be baine lalokau henia; eiava baine badinaia, ta be baine dadaraia. Dirava bona Taḡa isiaidia basio lao heni diba.

25 Una dainai na hamaoromuimu, lalomui na basie hekwarahi dahaka bavania, eiava dahaka ba inua, eiava dahaka ba hahedokilaia. Mauri ese aniani se hereaiamu a? Tau-anina ese dabua se hereaiamu a? 26 Atai manudia ba itadia: idia na asie hadohadomu, asie taboromu, roge ai asie haboumu; a Tamamui guba ai e nohomu ese e ubudiamu. Umui ese idia asio hereadiamu a? 27 Umui daika ena lalo-hekwarahi amo tauna anina sisina taina mo baine halataia diba? 28 Bona lalomui basie hekwarahi dabua daidiai. Tano heraheradia ba haero, ede e vara tomamu: asie ḡaukaramu, bona asie hatuhatumu; 29 a lau ese na hamaoromuimu, Solomon mai hairaina idoinai ena namo na idia ida asie heḡereḡere. 30 Benaini, tano avadia, harihari mimia, kerukeru lahi ai bae taho kau, to Dirava ese unu e hadabualai tomamu; be, ia ese umui danu basine hadabualaimui a? Abidadama maraḡi-maraḡi taumui!

31 Taunabunai, lalomui basie hekwarahi; basioto “Dahaka baia ania?” eiava “Dahaka baia inua?” eiava “Dahaka baia hahedokilaia?” 32 Bese idau-idau taudia ese unu ḡau iboudiai e tahumu. A Tamamui guba ai e nohomu na mai dibana, o dabumu ḡaudia iboudiai bunu. 33 A umui be iena basileia bona ena kara maoromaoro ba tahu guna, bena unu ḡau iboudiai danu ma baine henimui. 34 Lalomui basie hekwarahi kerukeru dainai; kerukeru na sibona baine henari. Dina ta ena dika vada davana iena.