1 Una negana ai Herod Ḡaubada ese Iesu harina e kamonai. 2 Bena ia ese ena hesiai taudia e hamaorodia, eto, Ina na Ioane Bapatiso; ia na mase amo vada e tore isi, una dainai siahu karadia e karamu. 3 Badina be Herod ese Ioane vada e dabaia tao, e guia, dibura rumana ai e koua, Herodia, ia kakana Filipo adavana, dainai. 4 Badina be Ioane ese e hamaoroa, eto, O tahahaia na o kereremu. 5 Ia na e urava loane baine alaia, to hutuma garidia e gariva, badina be idia lalodia eto ia na peroveta tauna. 6 A Herod ena vara dinana ilalolaina ariana e karaia, bena Herodia natuna haneulatona na vairadiai e mavaru, Herod e hamoalea. 7 Badina bunai ia na mai hereva metauna ida e gwau hamata, baine noia ḡauna baine henia eto. 8 Sinana ese vada e haduaia guna dainai, ia na eto, Ioane Bapatiso kwarana dihu ai iniseni ai ame henigu. 9 Ḡaubada lalona vada e hisihisi, to, ena gwauhamata dainai bona ena vadivadi daidiai, e gvau isi bae henia. 10 la na e hesiai, Ioane kwarana dibura rumana ai e utua oho. 11 Kwara na dihu ai e udaia, e laohaia, haneulato e henia; bena ia ese sinana dekena e laohaia. 12 Bena ena hahediba ela, tauna eha guria; ma ela Iesu e hamaoroa.

13 Iesu na vada e kamonai; bena vanaḡi ai una gabu e heautania, gabu ḡagaena ela. A aru taudia na e kamonai, bena tano amo e ḡavaia. 14 Dihona ai, ia ese hutuma bada e itadia, bena e bogadia hisi, edia gorere taudia e hamauridia.

15 Adorahi ai, ena hahediba na ia dekena ela, eto, Ina na gabu gagaena, bona dina be dihomu; aru taudia boma siaidia, hanua maraḡidia ai adia bema ha hoi. 16 A Iesu ese e hamaorodia, eto, Asi badina baela; umui hari adia ba henidia. 17 A idia ese e haere henia, eto, Ada aniani ḡaudia be ima hona, bona gwarume-gwarume rua. 18 Ia eto, Ini a mailai. 19 Bena aru taudia e haduadia, masia ai bae helai helai diho. Bena aniani gaudia imaosi bona gwarume ruaosi e abi, guba ai e gaga dae, e hanamoa; bena aniani e baki sisi, hahediba e henidia; bena idia ese aru taudia e henidia. 20 Iboudiai e aniani, bogadia e kunu; bena aniani bahudia e habou, bosea gwauta-rua e hahonu. 21 E aniani tataudia be daha ima sisivana, a hahine mai natudia na asie duahidia.

22 Bena Iesu ese ena hahediba e haduadia, vanagi ai bae gui, bae guna, gohu kahana bae heau hanai; a ia ese aru taudia do baine siaidia karoho. 23 E siaidia karoho, bena sibona ororo ta ai e dara dae, eha ḡuriḡuri. Hanua e boi, ia be sibona unuseni ai.

24 Hari vanaḡi na gohu bogaraginai, bona hurehure ese e hahegure-hegurea, badina be lai na vaira amo. 25 Bena kokoroku e tai, Iesu na dekedia ela, gohu kopina ai e raka. 26 Hahediba ese gohu kopina ai rakana ai e itaia, bena kudoudia e hetaha, eto, Una na laulau ta. Bena gari dainai e lolo. 27 Bena Iesu ese e hereva henidia, eto, A boga auka; ina na lau, asio gari. 28 Petro ese e haere henia, eto, Lohiabada e, bema oi be boma haduagu, gohu kopina amo bama vasi. 29 Ia eto, Aoma. Petro na vanagi amo e diho, gohu kopina ai e raka matama, Iesu dekena bainela eto. 30 To lai e itaia, bena vada e gari, e maloa matama, bena e lolo, eto, Lohiabada e, ame hamaurigu. 31 Bena Iesu ese imana e toia roro, e veria isi, eto, Abidadama maraḡi-maragi taumu e, dahaka o daradaramu? 32 Raruosi vanagi ai e gui, bena lai e doko. 33 Vanaḡi taudia na ia vairanai e toma diho, eto, Momokani, oi na Dirava Natuna.

34 Idia na e heau hanai, Genesaret konena ai e toa. 35 Una gabu taudia vada dibadia ia, bena e hesiai, una tano idoinai e hadibadia; bena gorere taudia iboudiai ia dekena e hakaudia lao, 36 e noia, ena dabua rimuna ai mo bae dau kau. Bena e dau kau taudia iboudiai vada e namo.