4
Iehova ena maino
1 Dina gabedia ai Iehova ena dubu ororona na
ororo atai-hereana ai baine hahelao,
ororo daediai baine heabi isi.
Taunimanima ese ia lalonai bae didi vareai,
2 bona bese momo baema, baeto:
Aoma, Iehova ena ororo ai baita dara dae,
Iakob ena Dirava ena dubu baita dae henia;
ia ese ena dala baine hadibalaida
bona iena dala ai baita raka helaoreana.
Badina be Siona lalona amo taravatu baine lasi,
bona Iehova ena hereva danu Ierusalem amo.
3 Ia ese taunimanima momo padadiai baine hahemaoro,
bona dauhai e nohomu besedia mai goadadia daidiai baine gwau maoro;
bena edia dare na ruarua isivadia bae karalaidia,
bona edia io na ilapa bae karalaidia;
bese ta ese dare basine abia isi, bese ta ituari-henina totona,
bona tuari daladia basie tahudia;
4 a ta ta ena vine auna ena vine auna bona ena suke auna ena suke auna
henudiai bae helai,
bona tau ta ese basine hagaridia;
badina be Iehova Sabaota na uduna amo vada e hereva.
5 Badina be bese iboudiai na e rakamu,
ta ta ena dirava ladana ena dirava ladana ai;
a ita ese Iehova, eda Dirava, ladana ai baita raka,
ela bona hanaihanai.
Israel iruha-negena
6 Iehova na e tomu:
Una dina ai lau ese ae-hedairike taudia baina haboudia,
bona vada e luludia oho taudia ma baina gogodia,
bona vada na hahisihisidia taudia danu.
7 Ae-hedairike taudia na bese kwabukwabuna ai baina halaodia,
bona e negedia daure taudia na bese mai goadana ai baina halaodia;
bena Iehova ese baine lohiadia Siona ororona ai,
ina negana amo ela bona hanaihanai.
8 Oi, mamoe serina igimana kohorona,
oi, Siona natuna kekenina ena ororo,
oi dekemu ai siahu gunana ma baine kau,
Ierusalem natuna kekenina ena basileia danu.
9 Dahaka dainai harihari o tai lolololomu?
Oi na asi pavapavamu a?
Emu hahealo tauna vada e mase,
bena hisihisi ese e gugubamu
hekamonai hahinena na heto a?
10 Siona natuna kekenina e,
ba hehure-hehure, ba ḡanaḡana,
hekamonai hahinena na heto;
badina be hanua lalona amo ba raka lasi,
tano paka ai ba noho,
Babulono do baola.
Unuseni ai do bae rauamu,
unuseni ai Iehova ese oi inaimu imadia amo baine hamaurimu.
11 Harihari bese momo e heboumu,
ituari-henimu totona;
idia na e tomu “Bae hamiroa,
bena matada ese Siona bae raraia tao”.
12 A idia na Iehova ena lalo-hadai asi dibadia,
ena lalo-hata ḡaudia asi dibadia;
asi dibadia ia ese vada e haboudia,
uit ikumidia na uit ikwadilaina gabuna ai e haboumu na heto.
13 Siona natuna kekenina e,
a tore isi, a kwadidia!
Badina be doamu na auri ai baina halaoa,
bona aemu na auri-laboralabora ai baina halaodia;
bese momo ba botadia patapata,
edia kohu na ba hahelagaia, Iehova ena,
edia taḡa na ba hahelaḡaia, tanobada idoinai Lohiana ena.