1 King Aratasasta ena lohia laḡanina iharuahuina ai, hua ladana Nisan lalonai, vine ranuna na ia vairanai e heato negana ai, lau ese vine ranuna na abia isi, hanua pavapavana na henia. A, ema bona una dina ai lalogu nega ta se hisihisi ia vairanai. 2 Bena hanua pavapavana ese e nanadaigu, eto, Dahaka dainai vairamu o huaiamu, a ḡau be so gorere? Ina na dia ḡau ta, to lalo hisihisina mo. Bena na gari dikadika. 3 Lau ese hanua pavapavana na hamoroa, nato, Hanua pavapavana baine mauri hanaihanai! Dahaka dainai senegu edia gara e miamu hanuana vada e ḡaḡae bona ikoukouna na lahi ese vada e araia oho negana ai vairagu na basina huaia? 4 Bena hanua pavapavana ese ma e nanadaigu, eto, Emu noinoi be dahaka? Taunabunai, lau ese guba Diravana na ḡuria. 5 Bena hanua pavapavana na hamaoroa, nato, Hanua pavapavana lalomu bema heḡereḡere, bona lau, emu hesiai tauna, boma lalo namo henigu, boma siaigu lao Iuda, senegu edia gara e miamu hanuana bainala, baina haginia lou totona. 6 Bena hanua pavapavana ese ma e nanadaigu (ia adavana, pavapava hahinena, na ia badinai helai), eto, Baola bena edena nega ai ma ba lou mai? Taunabunai, hanua pavapavana lalona vada e heḡereḡere baine siaigu, bona lau ese negana na gwaurai henia. 7 Bena hanua pavapavana ma na hamaoroa, nato, Hanua pavapavana lalomu bema heḡereḡere, revareva haida boma henigu, Sinavai Badana unukahana basileiana lohiadia edia, bena idia na bae gwau maoro baina raka hanai ela bona Iuda ai baina kau; 8 bona revareva ta danu, Asaf, hanua pavapavana ena uda igimana tauna, ena, bena ia ese au baine henigu, dubu kohorona ikoukoudia bona hanua maguna bona baina noholaia rumana ikaralaidia ḡaudia. Bena hanua pavapavana ese na gwaurai ḡaudia e henigu, badina be egu Dirava imana namona na latagu ai.

9 Bena Sinavai Badana unukahana basileiana lohiadia dekediai na kau, bona hanua pavapavana ena revareva na henidia. Hanua pavapavana ese tuari lohiadia bona hosi-gui taudia na vada e siaidia, lau ida. 10 A Sanbalata, tau Horono, bona Tobia, hesiai tauna, tau Amono, ina sivarai e kamonai, bena lalodia na e dika herea, ta na Israel taudia edia namo dalana itahuna vada ema dainai.

11 Taunabunai lau na Ierusalem nala, dina toi unuseni ai na noho. 12 Bena hanuaboi ai na tore isi, lau bona tatau hida mo lau ida; tau ta asina hamaoroa Dirava ese Ierusalem ihanamona dalana na lalogu ai ede vada e havaraia toma. Egu ai na asi gui gaudia, tamona mo lau ese na guilaia. 13 Bena hanuaboi ai lau na Koura Ikoukouna amo na raka lasi, ela bona Sisia Ranu Gurina bona Boromakau Tagena Ikoukouna; Ierusalem maguna heḡiḡi-dobina na itaia, bona ikoukouna danu, Iahi ese e araia oho gaudia. 14 Unu amo nala ela bona Ranu Lohilohi Ikoukouna bona Pavapava Gohuna, a hari latanai na ḡui ḡauna na asi ena raka-hanai gabuna. 15 Bena hanuaboi ai koura amo ma nala, maḡu na itaia; bena na hegiro, Koura Ikoukouna amo na raka vareai, bena na lou. 16 Heitatao taudia na asi dibadia edena gabu nala bona dahaka na karaia; lau ese Iuda taudia bona hahelaḡa taudia bona hanua lohiadia bona heitatao taudia bona taunimanima oredia, ḡaukara bae karaia taudia, na do asina hamaorodia.

17 Bena na hamaorodia, nato, Eda hekwarahi o itaiamu, Ierusalem na e gagae, bena ena ikoukou vada e ara oho. Aoma, Ierusalem maguna baita haginia, bena eda hemarai na basine mia. 18 Na hamaorodia danu egu Dirava imana na latagu ai, namo ihavarana totona; bona hanua pavapavana ese vada e hamaorolaigu herevadia danu na hamaorolaidia. Bena idia eto, Aita tore tore isi, aita haginia. Taunabunai idia ese imadia e ha-aukadia, ḡaukara namona ikarana dainai. 19 A Sanbalata, tau Horono, bona Tobia, hesiai tauna, tau Amono, bona Geseme, tau Arabia, na e kamonai, bena idia ese e kirikirilaimai bona e gonagonalaimai, eto, Ina na dahaka o karamu? Hanua pavapavana o dagedaḡe heniamu a? 20 Bena na haere henidia, nato, Guba Diravana ese baine hanamomai, bona ai, iena hesiai taudia, baia tore isi, baia haginia; a umui na asi ahumui bona asi siahumui bona asi ilalolaimui Ierusalem ai.