1 Benaini, varavaragu e, Lohiabada lalonai ba moale. Hereva tamona na torea louloumu, asina hesikumu; badina be ia ese umui baine hamaurimui.

2 Sisia nahuadia ba toho; dika ikarana taudia nahuadia ba toho; heiva kava taudia nahuadia ba toho. 3 Badina be peritome korikori be ita: ita, lauma ai Dirava ta toma henia dihomu, bona Keriso Iesu ta heaḡilaiamu, bona tau-anina asita abidadama heniamu, tauda. 4 Lau ese tau-anina bama abidadama henia diba; ena be tau ta ese tau-anina bema abidadama henia, to lau ese bama hereaia. 5 Na vara, dina ihataurahanina ai e peritomegu. Lau na Israel besena taugu, Beniamina ena iduhu taugu. Senegu danu Heberu taudia. Taravatu ibadinana ai lau be Farisea taugu. 6 Egu goada na hahedinaraiava, ekalesia oreana na daḡedaḡe heniava. Taravatu ena kara maoromaoro ibadinana ai lau na asi bebeka-bebekagu.

7 A gunaguna e hanamolaigu ḡaudia iboudiai harihari Keriso dainai dikadia na gwauraimu. 8 Oibe, ḡau iboudiai na dadaraimu, a ḡau herea-daena, Keriso egu Lohiabada baina dibaia ḡoevaḡoeva, na helaorealaiamu; ia dainai ḡau iboudiai vada na haboiodia, negenege ḡaudia ai vada na halaodia, Keriso baina abia tarika-tarika helaoreana. 9 Bena ia lalonai bae davarigu, dia taravatu ai na kara maoromaoro dainai, to Keriso ibadinana ai na kara maoromaoro dainai; Dirava ese eda abidadama dainai e henidamu kara maoromaorona bunai. 10 Bena ia bona ena toreisi-lou siahuna baina diba; bona ia e ani hisidia lau danu baina ani, ena mase dalana ai danu baina mase. 11 Unu amo mase amo toreisi-louna baina ḡavaia.

12 Lau asina tomamu vada na abia, eiava vada na ḡoeva dae. Doini na ḡavaiamu, baina abia na tomamu, Keriso Iesu ese lau e abigu na heto. 13 Varavaragu e, asina tomamu vada na abia; a kara tamona na goadalaiamu, murigu ḡaudia name lalo boio, vairagu ḡaudia na ḡavamu; 14 dokona na heau heniamu, davana baina abia na tomamu; una dava be Keriso Iesu lalonai Dirava ese e boirida dae.

15 Benaini, mai darada tauda iboudai unu baita kara toma; a umui haida lalomui bema idau, Dirava ese lalomui baine hadiaridia. 16 Ḡau tamona, vada ta davari ḡaudia heḡereḡeredia ai baita raka.

17 Varavaragu e, lau ba ḡavagu hebou, bona ai e haḡoimaimu taudia na ba haerodia. 18 Badina be vada na hamaoromui gunava, bona mai taigu ida na hamaoromui loumu, haida na e raka kereremu, Keriso ena satauro e inai heniamu. 19 Dokodia na mase; edia dirava na bogadia; edia heaḡi na edia hemarai karadia; edia helalo na tanobada ḡaudia. 20 A ita eda hanua konkori na guba ai; eda helaro be Ihamaurida Tauna, Lohiabada Iesu Keriso, unu amo bainema. 21 Ia ese ini tau-anida manokadia baine hamatamata, ia tau-anina ḡoeva-daena heida-idana ai baine halao; badina be ia siahuna vada e heḡereḡere ḡau iboudiai baine hamanada.