32
1 Ena kara dika eme hegwau tao tauna be namo,
ena kara havara e heḡova ahu tauna danu namo.
2 Iehova ese se habadelaiamu tauna na namo,
laumana na asi koikoina tauna danu namo.
3 Egu kara dika asina gwauraia hedinarai negana ai,
lau taugu anina na e varoda-varodava,
dina idoinai na ḡanaḡanava dainai.
4 Badina be imamu metauna na latagu ai e miava,
dina ai bona hanuaboi ai danu;
taugu vada e geakageaka,
lahara negana ena dina ḡaraḡara ese bema raraia na heto. (Selah)
5 Egu kara dika na vairamu ai na gwauraia hedinarai,
egu kara havara na asina hunia;
nato “Egu kerere baina gwaurai hedinarai Iehova vairanai”;
bena oi ese egu kara dika ena metau o abia oho. (Selah)
6 Taunabunai, helaḡa taudia iboudiai ese oi bae ḡurimu,
bena hisihisi negana ai utu-utu baine utua dae,
to ediai basine kau.
7 Oi na egu komu gabuna,
dika amo o hamaurigumu,
bona hahemauri anedia amo o hahegeḡegu daemu. (Selah)
8 Lau ese baina hadibamu, emu raka dalana baina hadibalaimu;
lau matagu ese baine itamu tao.
9 Hosi eiava doniki ida basio heḡereḡere,
idia na asi daradia;
ududia auridia bona varodia amo bae hamanadadia,
basie kamonai henimu na garina.
10 Kara dika taurla ena hisihisi na momo;
a Iehova e abidadama heniamu tauna na
hebogahisi ese e ḡeḡea daemu.
11 Iehova ba moalelaia! Kara maoromaoro taumui e, ba moale!
Lalomui mamaoro-mamaoro taumui, ba moale hisidae.