148
1 Iehova ba imodaia.
Guba amo Iehova ba imodaia,
atai doriva-dorivana ai ba imodaia.
2 Ena aneru iboumui ai, ba imodaia;
ena tuari oreadia iboumui ai, ba imodaia.
3 Dina bona hua, ba imodaia;
hisiu mai diarimui, iboumui ai ba imodaia.
4 Guba atai dorivana ai, ba imodaia;
ranu guba daenai, ba imodaia.
5 Iehova ladana bae imodaia;
badina be ia e gwau isi, bena idia na e vara.
6 Ia ese vada e atodia, bae mia hanaihanai;
ia ese hetoa vada e henidia, basie hanai.
7 Tanobada amo Iehova ba imodaia,
umui davara ḡaudia badadia bona dobu gabudia iboudiai danu.
8 Lahi bona medu hetarina, snow bona ice;
lai gubana, ena haheḡani ihamomokanina ḡauna.
9 Ororo badadia bona maraḡidia iboudiai;
huahua audia bona sida audia iboudiai.
10 Uda boromadia bona boromakau iboudiai;
tano-rau ḡaudia bona roho manudia.
11 Tanobada pavapavadia bona bese iboudiai;
hanua lohiadia bona hahemaoro taudia iboudiai.
12 Uhau bona ulato;
iahu bona memero.
13 Idia na Iehova ladana bae imodaia,
badina be ia sibona ladana na herea dae;
ia hairaina na tanobada bona guba daediai.
14 Ia ese ena bese taudia edia doa na vada e duduia isi,
ena helaḡa taudia iboudiai edia heimodai toana,
Israel besena, ia dekedekenai e nohomu taudia, toadia danu.
Iehova ba imodaia.