1 Bena Mamoe Natuna na itaia, ia ese ikouna toana ta e hamotua, bena mauri ḡauna ta erena na kamonai, e kara guba e rahua na heto, eto “Aoma”. 2 Bena hosi kurokurona ta na itaia; e ḡui kau tauna na mai ena peva. Kwarana ivavalaina ḡauna e henia, bena mai siahuna ida ela, baine kwalimu totona.

3 Ikouna toana iharuana e hamotua, bena mauri ḡauna iharuana erena na kamonai, eto “Aoma”. 4 Bena hosi kakakakana ta e lasi; e ḡui kau tauna na siahu e henia, maino tanobada amo baine abia oho, taunimanima bae heala-ala heheni helaoreana. Bena dare badana e henia.

5 Ikouna toana ihatoina e hamolua, bena mauri ḡauna ihatoina erena na kamonai, eto “Aoma”. Bena hosi korema-koremana ta na itaia; e ḡui kau tauna na metau ihahetohona ḡauna e abia kau imana ai. 6 Bena ere ta mauri ḡaudia haniosi bogaragidia amo na kamonai, eto “Uit irau ta davana na silver monina ta, bona bali irau toi davadia na silver monina ta; bona nahuamu ba tohoa, dehoro bona vine ranuna ba hadika na garina”.

7 Ikouna toana ihahanina e hamotua, bena mauri ḡauna ihahanina erena na kamonai, eto “Aoma”. 8 Bena hosi mia kurona ta na itaia; e ḡui kau tauna ladana na Mase, bona Mase Lohiana na ia murina amo ema. Siahu na raruosi e henidia, tanobada ena inogo haniosi ai inogo ta bae biagua, dare bona doe bona dai-hanai goreredia bona tanobada ena hekori boromadia amo taunimanima bae aladia mase.

9 Ikouna toana iha-imana e hamotua, bena pata helaḡana henunai Dirava ena hereva dainai bona ena hereva igwauraina dainai e aladia mase taudia laumadia na itadia. 10 Idia na e lolo badabada, eto “Biagumai e, Helaḡa bona Momokani, edena nega ai tanobada taudia ba hahemaoro henidia, davadia ba henidia, ai raramai dainai”. 11 Bena dabua kurokurodia ta ta e henidia, bona e haduadia, nega taina laḡadia do bae ani, ela bona bamodia bona tadihakadia hahidaosi iala-masedia, idia e aladia mase heḡereḡerena do baine ḡuḡuru.

12 Ikouna toana ihatauratoina e hamotua, bena na roha lao, tano e laḡa bada, dina danu e dibura, dabua koremana na heto, bona hua na rara na heto. 13 Bona hisiu na guba amo e moru, lai gubana ese suke huahuadia kasiridia e hahehuhumu na heto. 14 Guba danu e puki, kopi mai revarevana e lokuamu na heto; ororo bona motumotu iboudiai danu gabudia amo e heraḡa oho. 15 Bena tanobada pavapavadia bona lohiadia, bona tuari biagudia, bona taḡa taudia, bona goada taudia, bona hesiai taudia, bona ura kwalimu taudia, iboudiai na kohua lalodiai bona ororo nadi-hagadia henudiai e komu; 16 bena ororo bona hagahaga e noidia, eto, Ame karuhimai tao, terono ai e helaimu Diravana vairana amo bona Mamoe Natuna ena badu amo ba hunimai; 17 badina be edia badu dinana badana vada e gini dae. Daika baine gini diba?