1 Bena Iehova Sabaota ena hereva na egu ai e kau, eto, 2 Iehova Sabaota na ini e gwau tomamu: Siona dainai lalogu na e hekwarahimu, mai lalo-hekwarahigu badana ida bona mai badu-garagaragu ida. 3 Iehova ini e gwau tomamu: Siona baina lou henia, Ierusalem bogaraginai baina noho; bena Ierusalem na bae gwauraia “Heabidadama Hanuana”, bona Iehova Sabaota ena ororo na bae gwauraia “Ororo Helaḡana”. 4 Iehova Sabaota ini e gwau tomamu: Tatau burukadia bona hahine burukadia na Ierusalem hanuana ariaradia ai ma bae helai, ta ta mai edia itotohi, vada e buruka herea dainai. 5 Bona una hanua ariaradia na memero bona kekeni ese bae hahonudia, ariara lalodiai bae gadara. 6 Iehova Sabaota ini e gwau tomamu: Reana ina nega ai ina bese kwabukwabuna ese una kara na bema hoalaia dainai umui na o tomamu lau ese danu baina hoalaia a! Iehova Sabaota na e herevamu. 7 Iehova Sabaota ma ini e gwau tomamu: A itaia, egu bese taudia baina hamauridia, laurabada kahana tanodia amo bona lahara kahana tanodia amo; 8 bena baina hakaudia mai, Ierusalem bogaraginai baina hanohodia. Idia na lauegu bese ai baela, bona lau na edia Dirava ai bainala, heabidadama ai bona kara maoromaoro ai.

9 Iehova Sabaota ini e gwau tomamu: Umui, ina negana ai ini hereva o hakala henimu, dubu helaḡana baine gini totona Iehova Sabaota ena dubu badina e atoa dinana amo peroveta taudia ududia amo e lasi herevadia o kamonaimu taumui e, imamui ba ha-aukadia. 10 Badina be unu dina do asie kau ai, taunimanima ena ḡaukara na asi davana bona boromakau maruanena ena ḡaukara na asi davana, bona e raka lasi eiava e raka vareai tauna na asi ena dala ana inai tauna imana amo baine roho mauri; badina be lau ese taunimanima iboudiai na bamodia ida na haheinaidia heheni. 11 A harihari lau ese ina bese kwabukwabuna basina kara henidia nega gunadia heḡereḡeredia. Iehova Sabaota na e herevamu. 12 Badina be maino baine hehado; vine na baine huahua, bona tano anina baine vara, bona guba hununa baine diho; bona ini ḡau iboudiai na ina bese kwabukwabuna baina henidia, bae ḡaunaidia. 13 Iuda taumui bona Israel taumui e, umui na bese idau-idau bogaragidiai heuduguirai gwaurai-gwaurai herevana ai vada ola heḡereḡerena ai, lau ese do baina hamaurimui, bena hahenamo taumui ai baola. Basio gari, a imamui ba ha-aukadia.

14 Badina be Iehova Sabaota ini e gwau tomamu: Senemui ese e habadugu negana ai, lau na laloa hata baina kara dika henimui nato, bena asina helalo kerehai (Iehova Sabaota na e tomu), 15 unuhetomana ini dinadia ai ma vada na laloa hata, Ierusalem bona Iuda iduhuna baina kara namo henidia. Basio gari. 16 Ba kara ḡaudia bini: Ba hereva heheni mai momokanimui ida; emui hanua ikoukoudia ai hahemaoro karadia ba kara mai momokanimui bona mai mainomui ida; 17 ba hahedika heheni daladia na lalomui ai basio lalo hata, bona gwauhamata koikoidia basio uralai; badina be unu ḡau iboudiai na na inai henidiamu. Iehova na e herevamu.

18 Bena Iehova Sabaota ena hereva na egu ai e kau, eto, 19 Iehova Sabaota ini e gwau tomamu: Hua ihahanina bona iha-imana bona ihahituna bona ihagwautana anivagadia na moale bona hisi-dae negadia ai baela, Iuda taudia bogaragidiai, bona hahemoale ariadia negadia ai baela danu; taunabunai hereva momokani bona maino ba ura henidia.

20 Iehova Sabaota ini e gwau tomamu: Bese idau-idau taudia do baema, hanua momo inoholaidia taudia; 21 bena hanua ta taudia ese ma hanua ta taudia dekedia baela, baeto “Ina harihari aitala, Iehova baita noia ia ese baine hahenamo henida, bona Iehova Sabaota baita tahua; lau be vada na laomu”. 22 Bese momo bona basileia mai goadadia na baema, Ierusalem ai Iehova Sabaota bae tahua bona Iehova bae noia ia ese baine hahenamo henidia. 23 Iehova Sabaota ini e gwau tomamu: Unu dinadia ai tatau gwauta, gado idau-idau iboudiai besedia amo, ese Iuda tauna ta ena dabua bae dogoa tao, baeto, Mani oi ida aitala, badina be ai na vada a kamonai, Dirava na dekedekemu ai.