4
Miyawa Jisas Kraisak wukijibir tikwanadiy duw taakw adiy mwiya mwiyab amwiy nak kaytik-adiy.
1 Wun Pol, kalabus im kwanadi duw wun Jisas Kraisak yawiy kwurtuwalik tikuw, wun gwurak watuwadiygwurik yarakara mwiya viyakita yabib kwagwurkikik adi God gwurak wadadi yaba pik yarakara kwagwurkikik, di akiy gwurak kwiytaka-dilik tikuw dikidiy tigwurkikik. 2 Gwur gwuradiy kapa sipa danik mawul wukitikwa. Gwuradiy mawul yabiyib yaal gir tikwa nuwukadiy duw taakw dayadiy sukwak. Aw kip kwusida-takaan tikwana mawulada ada dayak. Tikuw, nuwukadiy duw takwak asimak gwuradiy dayak yigwuradiy mawul gwuradiy mawul dayak jaaw wakuw dayadiy kwakwadanadiy sukwak. 3 God dikidi Mawul nyanaam mwugiy-didiyan mawul nak tibakikik. Aw gwur wagawa yawiy akwur, mawul nak tikuw nakamwiyib kwusida-takaan kwagwurkikik. 4 Miyawa Jisas Kraisak wukijibir tikwanadiy duw taakw adiy mwiya mwiyab amwiy nak kaytik-adiy. God dikidi Mawul ab di nak-ad. Atampik, aw God nyanaam tasakwu-didiyan nakamwiyib patin tikuw, aal nyan nakamwiyib adiy yakinadiy God aban takadidiy viyakita javik mawulaar lakwukuw, rakarak titaay kavin kwabanaala. 5 Yitaypika Duw nak-ad, aad Jisas Krais-ad. Yabir nak-ad Godab wukijibir titak. Aad Jisas Krais-ad. Nyan baptais nak kwurbana. Nikim nikim baptais akis kwurkwanadiyan simaka-simakak nyan God dikidiy gwalugwa kidiy-adiyan waan. 6 Nyan miyawa Godak wukijibir tinadiy duw taakw, nyan Godawa Asayir nak tinadiyan. Di miyawa nyanaam van tidadiyan. Di miyawa nyanaam wulaan rawun kwadadiyan. Aw di miyawa nyanaar yawiy kwurkwanaad. 7 Jisas Krais diki mwiya nima apab am nakanak nakanak sitaay, nyanak kwiy-kwanaad niki yawiy niki yawiy kwurbakik. 8 Ki maaj aal God diki lapa nyigaam rina a javik:
“Aal di adawur tipaar warkuw, adiy di dikidiy mama nibaam kakilkuw, duw samasam kalakwukuw, diwa kwurin kawardidiy. Aw di niki ap niki ap di dikidiy duwawa takwak kwiydidiy.”
9 Ki kwasa maaj di warid wakuw, aal maaj liki maaw ata ataana? Aal kitawaana. Adi mwiya mwiyaba mwiya yitaypik adawur tip wapakuw, di daad kidi vaal riladi yisadapik kupwaar. 10 Aw adi kidi kupwaar daad, di diki aad adawur tipaar warid. Aw kita di ada nakamwiyib miyawa adawur tubwawa kidi kupw miyawa tamiyaam kwakwanaad. 11 Di aad duw takwak niki ap niki ap niki yawiy niki yawiy kwurdakik kwiykwanaad, aad Jisas Krais-ad. Dikidiy duw takwak sugwiyaan kwurik tikuw, nuwukadiy di tasakwu-kwadadiy diki maaj kwurin karaydakik. Aw nuwukadiy God dikidiy diki maaj wasapwiydiy duw tidakikik tasakwu-kwadadiy. Aw nuwukadiy God diki mwiya Viyakita Maaj wasapwiy-dakik tasakwu-kwadadiy. Aw nuwukadiy God dikidiy duw takwaam van titaay, aw God diki Viyakita Maaj dayak kalivadakik tasakwu-kwadadiy. 12 Jisas Krais adiy duwaam tasakwu-kwadadiy adiy God dikidiy duw takwaam walakwu-dakik dikik yawiy kwurdakik, awarab God dikidi gwalugwum mwugiydaak apawa ap yiwardikik. 13 Atawa kwurkuw, aw mwiyir nyan mwiya mwiyab wukijibir tikuw, aw God dikidi Nyinim lakwuyakikuw, nyan ata ya mwiya mwiyab mawul nak tikinadiyan. Alik tikuw, aw Jisas Krais nyanadiy mawulaam wulaan wapwurukwun kwadalik tikuw, aw kwasa nyanugw kaytik tan nimadiy duw taakw tikwadana pik, nyan atawa ya taay God dikidi gwalugwum kwasadiy nyanugw kaytik tikuw, aw ginyir ap yiwar-kidiyan mwiyir Jisas Krais kaytik tibakikik. 14 Aw nyan Godak wukijibir tikibanadiy mawul ap tikidana, aal nyan kwasa nyanugw kaytik ti maa ya, mawul warapiy warapiy niki jaav niki javik, aw aal nuwukadiy duw nyanak niki maaj kaliva-danalik tikuw. Awarabab lakatiyakin nyanak gwiyip kwurdaak aw nyan wukibakik daya gwiyipa maaj aal mwiya maaja waan, aw day samab rav maa nyanaam liyliyik. 15 Aw atawa tiyaay, nyan mwiya mwiyaba majir nuwukadiy duw takwak wakibanadiy mawul yiyi tikwanadiy mawulawa. Atawa kwurtaay, mwiya mwiyab Jisas Krais wukin nak tikuw, nyan ata di diki pik tikinadiyan. Di aad miyawa adiy God dikidi gwalugwum tikinadiy duw taakw dayadi Yitaypika Duw. 16 Amwiy kaytik likim kwiyawa ap kaykitin tikwabira pik, aw Jisas Krais nyanaam nakamwiyib kwurjuwtaka-kwadadiyan. Aw adiy amwiyim tikwanadiy jaav day dayadiy kapa yawiyib kwurkwadana pik, aw di nyanak kwiy-kwadadiyan nyan kwur-kwabanadiy kapa yawiyib yawiyib. Miyawa God dikidi gwalugwum tinadiy duw taakw atawa kwurtaay, aw nyan awarwa awarwa titaay mawul yikibana, aw aal God dikidi gwalugw mwiya ap samasam tikinaad.
Jisas Krais dikidiy duw taakw dayadiy kwakwadanadiy sukw.
17-18 Aw Jisas Krais wunaam tasakwu-dilik yitaypika duw tituwkikik tikuw, alik wun ki javik gwurak wasapi-nadiwun: Gwur adiy Godaam laakw maarkwanadiy duw taakw kwakwadanadi yaba pik kwakwak awap ya. Aw dayadiy mawul nikim nikim kip wukiyi wukiyan tikwanadiy. Aw day dayadiy mawul pakwun tikwanadiy. Aw aal day dayadiy maka apaam kabaak ridanalik tikuw, aw day kip saal viyaan kwakuw, aw day samab rav maa Godawa nakamwiyib kwakwak. Day bwu dikim kajakuw, kapab tikwanadiy. 19 Aw day adiy niki vaal niki vaal kip yikwanadiy adiy day dayadiy vaal yiyi tikwanadiy dayadiy mawul kwurik mawul warkwadanadiy jaav. Duwawa taakw nakamwiyib awarwa awarwa vaal yikwadanadiy. Aw day samab akis adiy day dayadiy valik wap ab saykwanadiy. 20 Aw nyan gwurak atawa maa kaliv Jisas Kraisak. 21-22 Aw li gwur yarakara waan takak-gwura Jisas Krais diki majik, aw yarakara di dikik bwulana mwiya mwiyaba viyakita majib kwakik-gwura di dikiwa nakamwiyib nak tikuw, ata adiy gwuradiy miyawa kupwarapa vaal yiyi tikwanadiy mawulak bwan akwiy ya. Adiy kupwarapa vaal yiyi tikwanadiy mawul gwuraam mwugiy-kwadanadiygwurik kupwarapa yabib kwaya-gwurkik. Aw day mwugiy-kidanadiygwur jawjaay tigwurkikik. Adiy gwiyupw kwurkwur tikwanadiy mawul gwuraam sisuw-kwadanadiygwurik atawa adi yabib kwaya-gwurkik. 23 Gwur mayaakw adakw Godak gwuradiy mawulaam warapiy-dikik aw day kwula mwiyir mwiya viyakita kapaba mawul tidakikik. 24 Aw gwur adiy kwula mawul akwur. God adiy mawul yitakadidiy di diki kapa mawula pik tidakikik. Aw atampika mawul mwugiy-kiladiygwur mwiya mwiyaba mwiya viyakita yabab kwagwurkikik. 25 Nyan miyawa nakamwiyib God dikidi gwalugwa kidiy-adiyan. Alik tikuw, samab ginyir awarwa awarwa titaay, gwiyupw kwuryi kwurya-tikwa. Kip mwiya mwiyaba majida titaay, abwul. 26 Aw li gwur yaal gira-kigwura, samab mayaakw kwa-wayik aal gwuraki yaal giragwura mawul gwuraam mwugiylik, vaal yigwurkikik. Aw gwur yaal girakuw, jayib nak aal jaav alakatiy. Kip yaal girajibir tan, gaan tilik si kwatikwa. Aw taay gwura yaal giragwura mawul amwugiy kwusilikik. 27 Aw li nyan kip yaal girajibir tikik-bana, aal nyan Satanak kwakik-banaala nyanadiy mawulaam val kwurdikik. Alik tikuw, samab atawa kwur-wayik. 28 Adi luwkuw kwurkwanadi duw, di kwusikwaad ya luwkuw kwurkwurik. Di adiy mwiya viyakita yawiyda tan kwurkwaad aw mwiyir di rivikinaad adiy saal yikwanadiy duw takwaam sugwiyaan kwurkwurik. 29 Aw gwur nuwukadiy duw takwawa maaj bwulak-gwura, adiy dayaam saal viyanadiy maaj bwula-tikwa. Adiy nuwukadiy duw taakw dayadiy wukijibir tikwanadiy mawulaam ap tidakikik sugwiyaan kwurkinadiy viyakita majida titaay abwul. Aw li gwur atawa kwurkigwura gwur sukwasukw kwurkigwuraala adiy gwuradiy majim wukikinadiy duw takwaam. 30 Alik tikuw, aw adiy kwur-kwagwuradiy javir samab God dikidi mwiya mwiyaba mwiya viyakit tikwanadi Mawulaam mwugiy-wayik sarmabap tidikikik adiy gwur kwur-kigwuradiy javik tikuw. Di dikidi Mawulad kwiy-kwadaad aw mwiyir gwur lakwugwurkik gwur di dikidiy nyanugw tikwanadiygwurik waan. Aw God dikidi Mawul mwugiy-kwadadiygwur mwiyir lakwugwurkik aw Jisas Krais sibinin dakuw, di kwurin kawar-kidadiygwurik di dikiwa nyanyi nyanyi kwayagwurkik. 31 Wadiy gwuradiy nyidim rinadiy javik miyawa bwan akwiy. Nuwukadiy duw taakw saal viyaan tidakikik mwugiy-kwanadiy majawa, yaal girakwanadiy mawulawa, nimadib gaam sitaay awarwa awarwa sapis jiki majawa, nuwukadiy duw takwaam wasupwun vasibariy majawa, duw takwak wasupwu wasupwu mawulawa, adiy miyawa javik miyawa gwuradiy bwan akwiyak. 32 Aw atampika javadiy kwur-yaay, rikarik akwur nuwukadiy duw takwak dayak mawul wukikuw. Gwur Jisas Krais dikidiy duw taakw tigwuralik tikuw, alik God di gwuradiy vaal yibwiy-didiy. Alik tikuw, gwurabab gwur gwuradiy awarwa awarwa yigwuradiy vaal ayibwiy.