Sukwudaal Maaj
YIPIRUW
Kristen Duw Takwak
1
Kita kidiy nyab God dikidi Nyinir wadidiyan.
1 Tayir God nyanadiy waragak diki Mawulaam ridiy maaj wadidiy dikidiy diki maaj wasapwiydiy duwaar. Nuwukadiyik yiginir wadidiy. Aw nuwukadiyik di diki dayawa nakamwiyib tikuw, wadidiy. 2 Aw kita kidiy nyab di dikidi Nyinir wadidiyan. Dikidi Nyinir ababa jaav yitakadidiy. Nyi, bap, tugwiy, kwungar, kidi kupwawa miyawa dikim rinadiy jaav yitakadidiy. Ginyir kidiy ababa jaav kwusidaak, God bwutaay tasakwudidiy day dikidiy tidakikik. 3 Di Goda pik tikuw, di God dikidi nimadi ap simakadid kariyanadi lait kitik. Di diki bwuladi maaj apaar adiy ababa yitakadidiy jaav kip dayadiy tamiyab tikwanadiy. Di duw taakw dayadiy valik kiyakuw day mwiyir tidakikik, di God diki mava tabaam yitaypika duw tamiyaam ata daan rad.
God dikidi Nyan God diki maaj kardadiy duwaam mwiya yitaypik tikwanaad.
4 God tasakwudid dikidi Nyan yitaypik tidikikik dikidiy maaj kardadiy duwaam. Dikidi si ab atawa yitaypik tinaad dayadiy saam. 5 Aw God maaj kardadiy duw nikik maa wu,
“Min wunadi Nyan-adimin. Aw nibwul wun minadi Asaay tinadiwun.”
Aw ki maaj ab dayaam nikik maa wu,
“Wun Asaay dikik tikidiwun. Aw di Nyan wunak tikinaad.”
6 God dikidi gumwa Nyan kidi kupwaar wayakik tikuw, di ki maaj ata wadil,
“Wunadiy maaj kardadiy duw dikik gaba maaj sukwukwadiy.”
7 God ki maaj wadil nyanak dikidiy maaj kardadiy duwak,
“Wunadiy maaj kardadiy duw mwurwa yiy kitik yin yaan tikidiy.”
8 God ki maaj wadil nyanak dikidi Nyinik,
“O God, min ababa javim nyanyi nyanyi van tikiminadiy. Van tikuw, min mwiya javida kwurkidimin.
9 Min mwiyir tinadiy javik yaakiya wakwanadimin. Aw adiy kupwarapa javik maa wakwanadimin. Alik tikuw, wun, minadi God tasakwu-tuwadimin yitaypik timinkikik minadiy kapa duwaam. Yitaypik tikuw, min rakarak tikidimin a javik.”
10 God dikidi Nyinik niki maaj wadil,
“Min bas kidi kupwawa ababa adawur tubwaam tinadiy jaav min mina yitakaminidiy.
11 Day abab kwusikidiy. Aw min kip tikidimin. Day wapwiy kaytik jaab yikidiy.
12 Jaab tidaak, duw adiy jaab tinadiy wapwiy yakikwadanadiy kwula wapwiy kwurik. Atampik min kwurkidimin kidi kupwawa adawul tubwaam tinadiy javim. Aw min adiy java pik jaab yi maa. Min a karubw nyanyi nyanyi kwakidimin.”
13 God dikidiy maaj kardadiy duwak akis wadidiy,
“Min ki wuna mava tabaam daan ada. Daan rikuw, wun minadiy mama nibaam kakilkuw, mina tabaam taka-kituwadiy min dayaam van timinkikik.”
14 Alik tikuw, God dikidiy maaj kardadiy duw agwa jaav-adiy? Day kayik kitik tikuw, day yawiy kwurkwanadiy Godak. Aw God nuwukadiy duw takwaam nyigilik tikuw, di dikidiy maaj kardadiy duw dayak wayaki-kwadadiy sugwiyaan kwurdakik dayaam.