Taitusre Quraŋ
Polji Taitusre Quraŋ ruaya.
Mimitaniŋ
Ŋi jeŋoŋ tinaine Taitus iŋoji maŋine kerisieru Polke sogokoŋ kiperu bapi garu misin gio babu. Baku koe botuineo nu tinaine Krit (Crete) oo gokabire Polji botuineo ketiguru ogo babapiine bokeme zioz gio burugaru ŋone osoeru siŋaŋ gaya. Polji bokeru raru iŋore oŋga wosiru goku Biŋe Quraŋ yo quraŋgaya.
Krit oi buŋo Grik oike egu bojibuganimiŋ. Krit oi koe botuineo nu mo eru Grik (Greece) oi kantri mo.
Polji Taitusre manebu yokaomo maneru uŋsowoŋ buŋo iŋi quraŋgaru oteya: Krit yoŋore fuŋne oi kasiga foreko kaneŋ jiŋokombi fukeru gobuŋ. Goineji maŋyaŋuŋ kerisiebi gogoyaŋunji poretiŋneya, yoŋoji moke egu sembeanimiŋ. Ore eru yoŋore mineboboji mosi fiine yobu oduru oŋgawowosi eru Baibel stadi gio so bokeru kubuyaŋuŋ botiŋgaru goinebi ore miga. Maŋyaŋuŋ kerisiebuŋ, yoŋore botugo qoko memenda oi uruŋu botiŋgaru qaji yareru gonobuŋ? Ŋi pogo, ŋigo pogo, ŋigo jeŋoŋ, ŋi jeŋoŋ eru kiŋaŋqoqo yoŋore uŋsowoŋ buŋo oi bubu iŋi mitaniŋgaga: “Maŋyaŋuŋ kerisieru Biŋe buŋo boyoberu womoo goku soguine yoŋore buŋo rurumaŋgo raru miine komuniti gio fiine akoŋ baku dimaku egu pouganimiŋ ore rosi kekepari bokeru goinebi.”
Buk yoore mobe qoruine 5 oi iŋi:
Polji aposol gioinere fuŋne miga 1.1-4
Anuture minebobo yoŋore kajeqouŋ buŋo 1.5-16
Ŋiŋigo qoko memenda yoŋore kajeqouŋ buŋo 2.1-15
Maŋbapakare eru siŋaŋ bobo buŋo 3.1-11
Momojo eru buŋo tatariine goine 3.12-15
1
Polji aposol gioinere fuŋne miga.
1 Anutuji ŋiŋigo roosoe yabeya, yoŋore mamanesinji fukeru sogueiŋ ore eru Yesu Kristoji Pol noŋ sore nume iŋore aposol fukego.
Nonji Anutu kiŋaŋ qateru buŋo foriine qaji yareego. Buŋo foriine oi mane mukuru kegborenimiŋ ine, ŋoŋore gogoji qopieru qowirieeiŋ. Ore eru quraŋ yo quraŋgago.
2 Anutuji buŋo ikoine miiŋ ore so mata, iŋoji ronere ronekoŋgo gogo sanaŋine noreiŋgo mikiperu ore ŋadiineo ya sosowo bofukeya. Ŋoŋoji buŋo foriine mane mukuru manesiŋ gabi oiji maŋgo eŋareko gogo sanaŋineo ropenimiŋgo odigaru origaegobi. 3 Anutu, Munaŋqoqo Raunoŋunji seŋgiŋbaŋgiŋ gogoinere buŋo mikiperu ore damaŋine poretiŋ bame wareru fukeme oo Biŋe buŋoine barariŋga noreru oi misauekiminde mimiti ruaya. Ore so oi mitaniŋgabi Anutuji noŋ oi misauebemiŋgo manesiŋ nuru igodoŋ nuya.
4 O maŋkekerisie made sarine Taitus! Nonji bapi gube maŋgo kerisieru ogo babapine fukeru moko Ofoŋ manesiŋ garu goegobere.
Mamanoŋuŋ Anutu eru Munaŋqoqo Raunoŋuŋ Yesu Kristo yokoji yauŋmoriri garekabire womoo goigoŋ.*2 Kor 8.23; Gal 2.3; 2 Tim 4.10
Siŋaŋ minebobo yoŋore buŋo buru
5 Koe nu Krit (Crete) oo moko misin gio baku botuineo boke gubemiŋ ore eru iŋi mitiga gareboŋ: “Maŋkekerisie yoŋoji iriŋbiriŋ kosa gogobi, oi bio buru yaberu (ŋirau pasto eru) minebobopuyaŋuŋ kae eru taoŋ so igodoŋ yaberu qaji yarende buruyaŋuŋke zioz gio baku goinebi.” Oŋu miku roiŋgabe.
6 Maŋyaŋuŋ kerisiebuŋ, yoŋore botugone ŋi yo oŋuine roosoeigoŋ: Monde sakigo bakare buŋo tomiri, ŋonuŋine moakoŋ roru goga. Odumadepuineji maŋyaŋuŋ kerisieru Anutu manesiŋ garu qoqomuku kajegi mosiyaŋunde buŋo sakiyaŋuŋgo so ruaru miyareegobi.*1 Tim 3.2-7
7 Maŋkekerisie kufufunde soguneyaŋuŋ pasto (bisop)*Rubobo, zioz paris lida, bisop, gio siŋaŋ qoruine iŋoji tina soguine omaine so osigaiŋyoŋ, paris kubupuine yoŋore oŋga wosiru qaji yareru maŋyaŋuŋ bapakareko gioyaŋunde buru yareru kajeqouŋ uŋsowoŋ paiineo siŋaŋ yaberu botiŋ yabeeiŋ. iŋoji Anuture kufufuŋ siŋaŋ yabeeiŋ, ore eru ŋi yo oŋuine igodoŋgaigoŋ: Monde sakigo bakare buŋo tomiri, jauba-iriŋbiriŋ eru maŋgiine tomiri. Obu sanaŋine so noku jigo kosa so qaku gbegbedi paiineo rembeŋine so goku moneŋ yare so yameŋ keega. 8 Iŋoreo warenimiŋ, oi soine kepore yaberu maŋgo mama eyareku buŋo eebobo fiinere aŋi maneru maŋine oo ruaru goiŋ. Kunuŋkunuŋ iiŋguŋ tomiri, buŋo sosowo poretiŋ akoŋ osoeru gbagbataeŋine tiriine fuŋine mo fukeru iŋoyoŋunde eebobo poretiŋ sisiŋaŋ ee ega.
9 Biŋe buŋo qaji norebi oiji otuŋ ŋiine oŋuine gogo koboru kitiŋ gaiŋgo ore dimaga, pastoji oi gbeŋ baru oi qakatoru dimaiŋ. Oŋu dimaku soine Biŋe Quraŋ boyoberu mamanesinde buŋo mobeine mobeine ŋiŋigo qaji yareru oiji maŋyaŋuŋ bapakareeiŋ eru goineji Biŋe buŋo boŋorieru igogaenimiŋ, yoŋore buŋo kekesiine oi soine kepieru botiŋgaeiŋ. Oŋu.
Qaqaji jijibuine oi qomuku yareinebi.
10 Ŋiŋigo kokoineji buŋo qaku kajegi eru jijikora oŋuine buŋo rerekaine miku ŋiŋigo eadu yabeegobi. Anuture moge sakiyaŋuŋgo ketigabuŋ, yoŋore kubuone ŋiŋigo jiŋoraraji oŋuine fukeegobi.
11 Ŋiŋigo oŋuine yoŋore buŋo oi bokobeinebi. Yoŋoji Biŋe buŋo qaji yarekiminde ore gbedigaru moneŋ ya furugaiŋgo maneru pepesisiri buŋo kosa mibi mimigaŋgaŋineke fukeega. Oŋu eru garikiŋ goine sosowo bojibu yabebi mimijibu fukebuŋ. 12 Krit yoŋoyaŋunde kajeqouŋ ŋi moji eeboboyaŋunde iŋi miku quraŋgaya, “Krit ŋiŋigoji damaŋ so buŋo ikoikoine miku rembeŋine qefeŋ goku gieŋ kaneŋ rukakiine oŋuine oruŋoruŋ keku kanenji nonone akoŋ kudi qaku noegobi.” 13 Yoŋore buŋo oŋu kitiŋgaku miya, oi foriine. Ore eru jibeyaŋuŋ oiji mataeme mamanesiŋyaŋunji fukeru foriineke fukeiŋ ore oi sanaŋine miku kane yabeeigoŋ.
14 Mamanesiŋyaŋunji foriineke fukeko Juda niŋore nemu saiŋ eru ŋiŋigo buŋo foriine tiriru mimiti eegobi, buŋo oŋuinere kaje so ruainebi. 15 Maŋnoŋuŋ kerisiebeneŋ Moro Tiriineji kekeririke enoreko gbagbataeŋine fukegobeneŋ, noŋunde uqo munjaŋ more sowa oi so pega. Noŋuŋ uqo munjaŋ sosowo soine nokimiŋ ore so fukegayoŋ, penaroŋ ŋiŋigo buŋo foriinere qoqomuku eegobi, yoŋoji oi me oi ebi maŋyaŋunji jibu kejigaega. Maŋyaŋunji bapeboriŋineke fukeko maŋ kajeyaŋuŋ gigako kaneŋ jiŋokombi kamasi oŋuine gogobi.
16 Yoŋoji “Anutu mane mukugobeneŋ,” miyaŋunji oŋu miku eeboboyaŋunji oi mugaru kepiegobi. Oŋu fukeru Anuture buŋo qabi ŋone yabeme mamagiyaŋuŋke fukeme gio fiine mo baniminde so, so fukegobi. Oŋu.
*1:4: 2 Kor 8.23; Gal 2.3; 2 Tim 4.10
*1:7: Rubobo, zioz paris lida, bisop, gio siŋaŋ qoruine iŋoji tina soguine omaine so osigaiŋyoŋ, paris kubupuine yoŋore oŋga wosiru qaji yareru maŋyaŋuŋ bapakareko gioyaŋunde buru yareru kajeqouŋ uŋsowoŋ paiineo siŋaŋ yaberu botiŋ yabeeiŋ.