Galesiya
o
Sansandek Pol mar tonan saw Galesiya-ib lahta
Gamuk ameb lehaqta
Mataw en ameb diq Yesus anan helmo haqiyta na in Juda-mo. An teq abeb Yesus in Pol eman lehim in og saw bunmo on mataw en ta asor Juda a haiqta na gigo hib lehad in mataw na inaqmo Yesus awagamun dimunta gibilenyaq. Gibilensa on mataw na kabemmo bolim le Yesus ago asenlulib tugwahtiqim in Juda mataw helmo haqiyta na nenaq tuwastoniy. Teq mataw en ta asor helmo haqiyta na in God ago maror Moses bilamta na anan uliq araq ago maror haqad in a hi muzin yaqayta, Juda em yaqayta nazaq. Nazaq iyan mataw na in maror na agamukan a hi muzinsa Juda mataw helmo haqiyta na in ginan bilaq yaqay, Mataw na in God ago on matawmo diq a hi iy daqay haq yaqay.
Afaqan nazaq gwahtiqan teq Juda mataw asor saw Galesiya-ib lehim Yesus ago dauh nab osiyta na suleq katiyta gibilenad in ginad tuwalebol yaqay. Ad in giwaz diq meqniyeq mataw en ta asor helmo haqiyta na giqemid in God ago maror Moses bilamta na muzinad gihol abatan asan urotnan ton yaqay. In bilaq yaqay, Ne gisan a hi uroteq teq ne God ago maror aduganib le a hi gwahtiq daqay haq yaqay.
Haqsa Pol nagah na abin huritimmo in Galesiya ginan anad meqniysa in gimen sansandek ka mar tonim eman in gigo hib tilah, in ginad agadanta na tuwastitaynan haqad. In bilam, I Yesus Krais anan helmo haqauqta naqmo amomo i giqeman i God ameb on mataw titnonta kayeqmo kuluwa-kuluwmo osamta tiqiyim osauq ham. Haqad in bilam, Yaqgo gamuk ka ya inadibmo a hi bilaqaiqta ham. Teq ya gamuk ka mat araq ago hib a hi wayta ham. Ya Yesus awagamun bilaqaiqta ka God-mo isihunan ya ne gibilenaiq ham. Nazaq iyan ne ginad katiyta na hulosad gamuk hel diqta ya gibilenaiqta kaqmo ne waz naqmo hiqiyiy ham.
God inmo Pol atowun eman in Aposel akabiyan emaqta
1
Yaqmo Pol, ya Aposel araq. Teq mat diq araq ya itowun eman ya Aposel gwahtiqim a hi luwaiq. Haiqgam. God Yesus Krais hodhodab wazan eraqim in Amam inaq kabiy na yagiyta. Yaqmo teq ya imaqbaban ya ginaq kawa osauqta ka, i bunmo sansandek ka mar tonim saw Galesiya-ib on mataw Krais ago nan huritayta na gidauhan bunmo gimen eman leh negaq.
I Gimam God teq i gigo Iyahta Yesus Krais inaq in gigem dimunta negad in ne gigem emid kute neman. Yesus Krais-mo i Gimam God anad muzinim bolim i gimen ahol nog hulosim i gigo daq meqinta tizay bug. Zay bugan og ka ago daq meqinta nagan i ginad a ta hi wamuzsa muran i samanmo tiluw osauqta. Nazaq iyan kam bunmo i God abin iluwad osuq. Hel diqtaqmo.
Yesus awagamun amulikmoqmo usaqta
Mataw! Ya ne gibin araq diq huritim ihol turuh nam. Na in kazaq. Krais agem dimunta negad gilumsihan teq God ne gililewunim giwamta. Giwaqan sisaq haiq ne gihol buliyim Yesus awagamun lul araq diqta muzinad ne God gileh ug nog iyim tuqosay. Ya ne gibin nazaq huritim ya ritenim inadnad diq tiqemaiq. Helmo, Yesus awagamun araq araq haiqgamta. Teq mataw asor ne giwazbalnan haqad in Krais ago wagam dimunta na wazbuliyim ne gibilenayta. Ta teq igmo gigo araq ne gigo hib leheq Yesus awagamun i mebmebmo gibilenta na buliyeq wagam lul ta araq gibilenid God in kusluw ugid ban meqintab wolehan. Ari angelo araq Heven-ib gehitiqeq Yesus awagamun buliyeq wagam ta araq gibilenid God in kusluw ugid in nazaq ban meqintab wolehanmo. Ya nawa tibilayta nazaq ya a ta bilaq tonaiq. Mat araq Yesus awagamun ne mebmebmo huritim anan helmo haqiyta na buliyeq wagam ta araq gibilenid God kusluw ugid in ban meqinta nab wolehan.
10 Ya kazaq atoranmo bilaqid ne ya iwazineq inan dimun haq daqay haqad ya gamuk ka bilaqaiq e? Haiqgam. God-mo ya inan dimun haqdaq haqad ya gamuk ka bilaqaiqta. Ya matawmo giqemid ginad dimniy daqay haqad kabiy a hi emaiqta. Na ezaqgo ya mataw ginad muzinad kabiy emeq teq ya Krais ago kabibiy mat a hi iydaiq.
Pol in Aposel gwahtimta awagamun
11 Ya imaqbaban, ya ne hel diqtaqmo gibilenaiq. Yesus awagamun dimunta ya bilaqaiqta ka mat araq og kabta eman a hi gwahtimta. 12 Wagam na ya mat araq ago hib a hi huritta. Teq mat araq wagam na asuleqin a hi yagtamo. Haiqgam. Yesus Krais-mo gamuk na iqisihunta.
13 Ne yaqgo tur os kwaziqta na awagamun tuhuritiyta. Ya Juda gigo maror ahaqenib osad ya God ago on mataw Krais ago nan huritayta na atoranmo gimeqin tonad giwalebolyaiqta. 14 Kam nab ya mat araq diq nazaqta ya luwyaiqta. Yaqgo on mataw gilikmanib ya iyogniz kabemmo giquriyamim ya ameb diq iyim i gisesan Juda gigo daq teq in gigo gunun bunmo ya muzin bugyaiqta.
15 Ta teq kwaziqmo ya inen a hi iqemsamo God agem dimunta yagad itowun tiqamta. Itowun eman ya tugwahtiqan teq ya in ago kabiy emgo haqad in tiqililewun. 16 Ililewunad in Atatin tiqiqisihun, iqisihunid ya in Atatin awagamun na a leheq on mataw en ta asor Juda a haiqta nagan gibilendaiq haqad. Ari God in Atatin tiqiqisihunan ya teq ezaq tondaiqta na ago ya mat araq ago hib lehim a hi susumun ug. 17 Teq ya uliq Jerusalem-ub mataw ya iquriyamim danmeb Aposel gwahtiqiyta na gigo hib a hi lehmo. Haiqgam. Ya era hid naqmo saw Arebiya ban lehim tuqos. Osim abeb ya uliq Damaskus-ib muleqim ta leh. 18 Ad abeb ulig ezeqmanmo tihiqiyan teq ya Pita ahol waqnan haqad uliq Jerusalem-ub tugwaleh. Gwalehim ya Pita inaq wik giger nazaq tuqos. 19 Osad ya Aposel asor bunmo a hi gibiyad ya Iyahta amikqan Jems amomo ahol way.
20 (Gamuk kawa ya ne gimen mar tonaiqta ka God ibiysa ya hel diqmo bilaqaiq. Ya a hi katiyaiq.)
21 Ari abeb ya saw giger Siriya ayow Silisiya inaq gigo saw ban lehim tiluwyaiq. 22 Luwsa kam nab Yesus ago on mataw gidauhan saw Judiya-ib osiyta na in ya inobun asit ahol a hi waqad in yaqgo a hi hurit kem yaqayta. 23 Teq mataw ya iwagamun asitmo kazaq bilaqsa in hurit yaqay. Mat kwaziqmo i Yesus anan helmo haqsa in i gimeqin tonad luwyaqta amatin na muran in anad buliyim Yesus awagamun dimunta on mataw tigibilenaq haq yaqay. 24 Haqsa Yesus ago on mataw saw Judiya-ibta na in ya iwagamun asitmo nazaq huritim in God abin tiqiluw yaqay.